Ennanga 67 - BIBLIYA NTAGATIFU OMU MASHI

Omusengero gw’olubaga nka lwamâyus’isârûla emyâka

¹ Gwârhi omukulu w’abimbiza. Oku nzihwa z’emisî. Lulanga. Lwimbo.

² Nyakasane Nyamuzinda arhubabalire anarhugishe, arhumolekere n’obusù burhulwîre.

³ Abantu boshi bamanye enjira zâwe, n’amashanja goshi gamanye obucunguzi bwâwe.

⁴ Igulu lyoshi likukuze linakuvuge omunkwa, Yâgirwa Nnâmahanga; igulu lyoshi likukuze linakuvuge omunkwa.

⁵ Amashanja goshi gasime ganacîshinge, bulya oyishi cîranulir’abantu n’oburhondekezi; bulya we Mwâmi w’amashanja g’en’igulu.

⁶ lgulu lyoshi likukuze linakuvuge omunkwa, Yâgirwa Nnâmahanga; igulu lyoshi likukuze linakuvuge omunkwa.

⁷ Obudaka bwayezire emburho; Nnâmahanga Nyamuzinda wîrhu ye rhuhà omugisho.

⁸ Nyamuzinda arhugishe, n’amahanga goshi gamurhinye en’igulu.