Ennanga 65 - BIBLIYA NTAGATIFU OMU MASHI

Olwimbo lw’okuvuga omunkwa

¹ Gwârhi omukulu w’abimbiza. Lwa Daudi. Lwimbo.

² Nyamwagirwa, nêci kukwânîne bakuyimbire omu Siyoni, banayûkirize omulagi bàkulaganyagya.

³ Bulyâla abakusengera, kuyumvîrhiza obayumvirhiza. N’emund’oli yo ngasi muntu ayêrekîre, erhi byâha byâge birhuma.

⁴ Ebyâha bîrhu byàrhuhizire okw’idaho, câba wâbirhenza.

⁵ Omuntu ocîshoga okanamuhêka, erhi muny’iragi, omu côgo câwe aj’ibêra. Rhwalya rhuyigurhe ebinja by’omu mwâwe, rhuyigurhe obwimâna bw’engombe yâwe.

⁶ Warhuyumvirhîze omu bushinganyanya bwâwe, wanarhuyêrekakwo n’ebimanyîso bisômerîne, Nyamuzinda, Mufungizi wîrhu, Mwîkubagirwa w’enyanja z’ekulî, n’ow’amahanga goshi.

⁷ We gwîka entondo n’okuboko kwâwe, we komekera n’obuhashe bwoshi.

⁸ We Cirhûza-nyanja, Cirhûza-mulaba, Cirhûza-kadugundu-ka-bantu.

⁹ Ab’emahanga omu bihamba bali, erhi bisômerîne byâwe birhuma; ab’ebushoshôkero n’ab’ebuzikiro bw’izûba, boshi omu mwishingo bali.

¹⁰ Igulu walirhandwîre, walidômera lyagala; olwîshi lwa Nyamuzinda luyunjwîre, wabayêgîze emyâka yâbo.

¹¹ Wadômera endike wakoma amalongo, walibombêza n’enkuba wanagisha emyâka yamuli.

¹² Omwâka waguhîre aminjà gâwe: aha wagera erhi na mugisho.

¹³ Amalambo g’omu irungu kuhulula gahulula migezi, n’entondo omwîshingo gwazizonzire.

¹⁴ Amalambo gayunjwîre masô, emmanda zirhâbonè bwikizo n’engano! ecihôgero n’enyimbo, mpu: «Rhw’oyo, murhuyumve!»