Ennanga 64 - BIBLIYA NTAGATIFU OMU MASHI

Enkola-maligo zimanye aha zafumira Nyamuzinda

¹ Oku mukulu w’abimbiza. Lulanga. Lwa Daudi.

² Yumva omulenge gwâni, mâshi Nnâmahanga, kulaka kuno ndimwo. orhenze ebihamba bindi emirhima.

³ Oncinge okw’ihano ly’ababî, n’oku kavulindi ka zira nkola-maligo.

⁴ Kwo zirhyaza olulimi nka ngôrho, kwo zimeshera ebinwa bibî nka kula zirîka mwampi.

⁵ Zo zira nkola-maligo zikaz’icîfulika mpu ziyâgaze omuhanya, mpu zimuyûbûke zimuyâgaze, zirhânababale bici.

⁶ Obubî lusima zibujîra, bwifulikwè zilâlira okurhega emirhego, mpu: «Ka hali owârhubone?»

⁷ Enkola-maligo bibî zigerereza, kufulika zikaz’ifulika enkengêro zikengire. Nêci wâni, omurhima gwa bene nyenga!

⁸ Ohumbe kwône, Nyamuzinda azirikiramwo emyampi, zifuduke zamâyagalika.

⁹ Lulimi lwâbo lwâbaheze, ngasi yêshi wâbalolekwo, okw’idaho ânameshere.

¹⁰ Ikola lya Nyamuzinda boshi balirhînya banalikuze, ebijiro byâge byoshi byâhizâna.

¹¹ Omushinganyanya kucîshinga acîshinga anashamambire Nyakasane; n’ab’omurhima nkana boshi, irenge bâja.