Ennanga 63 - BIBLIYA NTAGATIFU OMU MASHI

Omwîfinjo gw’okubona Nyamuzinda

¹ Lulanga. Lwa Daudi. Amango àli omu irungu lya Yûda.

² Nnâmahanga we Nyamuzinda wâni, w’ono ndwîrhe nalongereza. Nyôrha yâwe omurhima gwâni gwalwâla, ndwîrhe nakwifinja nieshi nieshi nka kul’idaho lyûmu licîfinja amîshi bwenêne.

³ Nkulolekwo omu bwâmi bwâwe, mbone bulya buhashe bwâwe n’irenge lyâwe.

⁴ Okurhona emund’oli kulushire obuzîne, akanwa kâni kakukuze là.

⁵ Oku nciyîs’omûka erhi kugashâniza nnankugashâniza, nalengereza amaboko emund’oli okukuza izîno lyâwe.

⁶ Omurhima gwâni gudendêze obwo ak’owalyag’ey’amashushi, n’akanwa kâni kayunjule mwishîngo kanakukuze.

⁷ Erhi nacikukengera nangwishîre, obudufu bunakule erhi wêne nakengêra.

⁸ Bulya nêci washubire mufungizi wâni, n’omu byûbi byâwe nuno ndwîrhe nacîshingira.

⁹ Omurhima gwâni gukwishwekìrekwo; n’okulyo kwâwe kwo nyegemîre

¹⁰ Balya badwîrhe balonza okumpeza, bajè omuw’idaho kuli kulî.

¹¹ Engôrho ebamîme, ebibwa bibashêge,

¹² Mwâmi yêhe Nnâmahanga acîtakîra; ngasi muntu ocîtakìra Nyamuzinda kukuzibwa anakuzibwa, bulya akanwa kaderha ebibî kuhumbârhala kanahumbârhala.