Ennanga 56 - BIBLIYA NTAGATIFU OMU MASHI

Ntà mango omwemêzi ahuligane

¹ Gwârhi omukulu w’abimbiza. «Ak’engûkù y’omu mirhi y’ihanga». Lwa Daudi. N’izù linyinyi. Amango Daudi àbaga amâgwârhirwa e Gati n’Abafilistini.

² Ombè lukogo mâshi Nnâmahanga, niono bahizire okw’idaho, badwîrhe bamvulindika burhahusa, nieshi bajirire manywanywa.

³ Babisha abo badwîrhe bandabarha ntyo burhahusa, banali banji banji abadwîrhe bandwîsa.

⁴ Yâgirwa, we bà enyanya, wêne ncîkubagîre, olusiku entemu yânshamula.

⁵ Ndagâno ya Nyamuzinda eno nâcîtakîrira muli ye, Nyamuzinda oyu ncîkubagîre: ntà bwôba bungwêrhe: kurhi zanjira engonyi?

⁶ Badwîrhe balegerera bampurana, enkengêro zâbo nie zishimbire, zirhânnongeza oburhali buhanya.

⁷ Erhi bayish’ibugânana, bagwîke emirhego, igenda lyâni balij’ebulâbi, balonze oku bakankûlamw’omûka.

⁸ Nyamuzinda mâshi, obalengere oku bubî bwâbo bunakwânîne, orhang’iluba oher’embaga.

⁹ Emihanda bàngezagyamwo erhi bandibirhakwo orhayihabiri; n’emirenge nalasire bulya omu hirembe hyâwe eri migunje: k’arhali mulya hitabu hyâwe eri miyandike?

¹⁰ Amango nkakuyâkûza, ago mango lyo abanshomba bâshukira; mmanyire bwinjà oku Nyamuzinda nie âlwîra.

¹¹ Ndagâno ya Nyamuzinda eno nâcîtakîrira muli ye.

¹² Nyamuzinda oyu ncîkubagîre: ntà bwôba bungwêrhe: kurhi zânjira engonyi?

¹³ Cirya ciragâne nakulaganyagya Nnâmahanga, co cino cingwêrhe, nkolaga nalîka enterekêro z’okukukuza:

¹⁴ Nabwîne walîkûza omûka gwâni oku lufù, n’amagulu gâni, oku gali gakola mpu garhereze, wagagalukira, mpu lyo nkaz’ikananda omu ka-Nyamuzinda, omu bumoleke bw’abazîne.