Ennanga 53 - BIBLIYA NTAGATIFU OMU MASHI

Obuhwinja bw’omuntu olahira Nyamuzinda

¹ Gwârhi omukulu w’abimbiza. Oku ndwâla. Lwimbo. Lwa Daudi.

² Omuhwinja anaderhe, erhi: «Nyamuzinda arhahabà!» Bàhabusire, bàjizire eby’okugayîsa, ntâye ojira aminjà.

³ Kurheng’enyanya Nyamuzinda asinzize ababurhwa n’abantu alole erhi abonamwo omuntu w’obwenge amulongereza.

⁴ Boshi bàherîre haguma, boshi bàsherîre; ntâye ojira aminjà ciru n’omuguma!

⁵ Ewe! k’abajira amabî barhayengeha, bala bashanshanyula omulala gwâni nka kula balya omugati? Ka barhashenga Nyamubâho?

⁶ Banîre omushunzi, n’obwo ntâbyo bibayôbohize, bulya Nyamuzinda ashandâza ebivuha bya balya balikugosire; enshonyi zâbabumbire, bulya Nyamuzinda anabakabulîre boshi.

⁷ Lêro ndi walêrhera Israheli obucire bwarhenga e Siyoni? Hano Nyamuzinda agalula empira z’omulala gwâge Yakôbo âshagaluka, Israheli asîme.