Ennanga 45 - BIBLIYA NTAGATIFU OMU MASHI

Lwimbo lwa kuyimbira Mwâmi-Mushîgwa ye Masiha

¹ Gwârhi omukulu w’abimbiza. Lwa kuzihirwa oku «Liliya». Lwa bene Korè. Lwimbo lwa buzigire.

² Omurhima gwâni gukola gwarhengamwo ebinwa bilengehe, nkola nayimbira mwâmi ehimbo hyâni; olulimi lumba ekanwa mugera gwa muntu oyîsh’iyandika duba.

³ Omu baburhwa n’abantu w’oyo olushire abandi busole: obwinjà bàbuyansire babubulagira oku kanwa kâwe: okwo kwarhuma Nyamuzinda akugisha oku myâka n’emyâka.

⁴ Yanka engôrho yâwe oyihire oku lurhungu, Ciri-misî, yanka obukulu n’obwinjà bwâwe obicûkane.

⁵ Ofôle onagende otamîre oku ndogomi, okanye oj’ilwîra oburhabêsha n’obushinganyanya: okulyo kwâwe bwinjà kufôla.

⁶ Emyampi yâwe erhahimwa bwôji; wabona oku amashanja gàyisha gal’ikushiga, n’abashomba mwâmi barhibe omurhima.

⁷ Entebe yâwe Nnâmahanga, ho ebà ensiku n’amango, akarhi kâwe k’obwâmi kabà ka bushinganyanya.

⁸ Orhahimwa kurhonya obushinganyanya, orhanakwîrirwa bulyâlya, Nyamuzinda wâwe akushîga amavurha g’enshagali wêne omu binyu.

⁹ Emyambalo yâwe edwîrhe yabaya bwinjinjà nka nshangi, obukù na nka bubâni n’omu burhwâli bwâwe buyûbake n’ihembe, ennanga zidumûsire zinakushagalusize.

¹⁰ Abaluzi-nyere bashûbûzinye mpu bayish’ikuyankirira, makambà aha kulyo kwâwe ayîmanzire, arhwinjire n’amasholo g’e Hofiri.

¹¹ Mwâli wâni yumva nkubwîre, alole bwinjà onarhege okurhwiri; orhacikengêraga ab’emwinyu, orhacikengêraga n’enyumpa ya sho.

¹² Wâbona oku mwâmi àyâgalwa n’iranga lyâwe: ye kola nnawinyu; omushige bwinjà.

¹³ Wâbona oku abantu b’e Tiri bâyisha n’entûlo; n’abagale b’omu cihugo bâyîsh’ilonza okurhona emund’oli.

¹⁴ Mucîlange, mwâli wa mwâmi oyôla oyishire: mwinjà mwinjà! Emishangi ayambîrhe ya masholo.

¹⁵ Bàmuhêkera mwâmi n’emishangi yâge y’obutonè-butonè, abâbo banyere bamukunjûsirekwo, bakudwîrhîrebo nabo.

¹⁶ Bayisha bayimba banacishinga, bâbo bamâshesherera omu bwâmi.

¹⁷ Bagala bâwe bo bâyîsh’iyîma omu bya bashakulûza bâwe; wêne we wânabayîmika babè barhegesi b’igulu lyoshi.

¹⁸ Izîno lyâwe nâlibwîra amâburhwa n’amâburhwa, kurhume amashanja gakukuza omu myâka n’emyâka.