Ennanga 42 - BIBLIYA NTAGATIFU OMU MASHI

Iralà ly’okubona Nyamuzinda omu ka-Nyamuzinda

¹ Gwârhi omukulu w’abimbiza. Lwimbo lwa Nyigîrizo. Lwa bene Korè.

² Kulyâla akashafu kacîfinja ecikunguzo c’olwîshi, kwo omurhima gwâni gudwîrhe gwakwifinja, Nnâmahanga.

³ Omurhima gwâni gugwerhwe n’enyôrha ya Nyamuzinda, ya Nyamuzinda ozîne, mangaci nabona enjira ndole oku busù bwa Nyamuzinda?

⁴ Emirenge lwo lukola lwîko lw’omûshi n’obudufu. Erhi bacimbwîra bwacà bwayira, mpu: «Ngahi Nyamuzinda wâwe aligi?»

⁵ Nankengêre nyumve omurhima gundwîrîr’omu nda, nankengêre oku nabonaga nakananda omu bandi, oku nabonaga nabarhang’aha ka-Nyamuzinda, omu cihôgêro c’omwîshingo n’obukuze, omu kafurhè k’olusiku lukulu.

⁶ Murhima gwâni carhuma warhoga, carhuma wandwîrira omu nda? Cîkubagire Nnâmahanga bulya nkala nashub’imukuza, ye kucira kw’obusù bwâni ye na Nyamuzinda wâni!

⁷ Omurhima gwandwîrîre omu nda, bwo buno nkukengêrîre eno munda e Yordani n’e Hermoni, oku hirhando hya Misarhi.

⁸ Emunda izibyo liyakûza eryâbo omu karhî k’enshalalo zâwe, amîshi gâwe, ag’enshalalo n’ag’omulaba, gangezire aha ntonda y’irhwe.

⁹ Nyakasane arhankarhang’injira oyu ashobôza oku burhonyi bwâge, buno bw’omûshi, lêro nanalâla namuyimbira, nkuze Nnâmahanga wampâga akalamo kâni.

¹⁰ Mbwîzirage Nnâmahanga, nti: «Kabuye kâni ci wanyibagira mâshi?» nti: «Cirhumirage nieki nagenda ndi burhè?» nti: «Cirhumirage nieki ababisha bambuza buhunga?»

¹¹ Ndwîrhe nayumva narhoga enjingo ababisha erhi banacinjacira, erhi banacinkangula, mpu: «Ngahigi Nyamuzinda wâwe aligi?»

¹² Murhima gwâni carhuma warhoga, carhuma wandwîririra omu nda? Cîkubagire Nnâmahanga, bulya nkola nashub’imukuza, ye kucira kw’obusù bwâni, ye na Nyamuzinda wâni.