Ennanga 4 - BIBLIYA NTAGATIFU OMU MASHI

Musengero gw’ebijingo

¹ Gwârhi omukulu w’abimbiza. Oku luzihwa lusâlikwa n’emisî: Lulanga lwa Daudi.

² Nkakulakira, oyumvîrhize izù lyâni, Yâgirwa, Nnâmahanga, mucîranuzi wâni: Kàli nàlimbengîre, wanciza: ndîkûza we kasinga, onayumvîrhize omusengero gwâni.

³ Mwe bantu, mangaci mwaleka obudandalisi bwinyu, mangaci mwaleka okurhonya empûsi n’okulonza obunywesi?

⁴ Ci mumanye bwinjà oku Nyamuzinda àjirîre omurhonyi wâge ecirhangâzo, nkamulakira, Nyakasane anayumve izù lyâni.

⁵ Muyôbohe n’irhondo murhacijiraga ecâha, n’amango mukola muli aha ncingo, mucîje emurhima, muhulike!

⁶ Murherekêre enterekêro z’okuli, mucîkwêbe omu maboko ga Nnâmahanga!

⁷ Banji bacîduduma, mpu: «Ndi wankacirhuha akalembe wâni?» Yâgirwa Nyakasane, orhumolekere n’obumoleke bw’obusù bwâwe.

⁸ Waliha Nnâmahanga, omurhima gwâni oguyunjuze masîma, galushire ag’amango engano n’irivayi lyâbo biyêzire.

⁹ Ncikolera aha ncingo n’omurhûla, na nkola ndi îrò: bulya we onyimangire wênene, Yâgirwa Nnâmahanga.