Ennanga 32 - BIBLIYA NTAGATIFU OMU MASHI

Okuciyâza kunarhenze omu byâha

1 Lwa Daudi. Lwimbo lwa Nyigîrizo.

¹ Lwa Daudi. Lwimbo lwa Nyigîrizo. Ali muny’iragi omuntu obabalirwe obubî bwâge, omuntu ecâha cirhenzîbwe.

² Ali muny’iragi omuntu Nyakasane arhatumuzizi obubî, omuntu orhagwêrhi bulyâlya omu murhima.

³ Amango nali mpulisire erhi orhuvuha rhwâni banarhubujegera, erhi n’omulenge gurhankala oku isù.

⁴ Bulyâla okuboko kwâwe kwàli kuzidohire oku irhwe lyâni mûshi na budufu, emisî yâni yakaz’iyonda nka kuno bayiyanikira oku izûba ly’ecanda.

⁵ Lyo nkajâga nacîshobeka emund’oli buzira kufulika obubî bwâni; naderha, nti: «Obubî bwâni ncîshobesirebwo Nyakasane», nâwe wakûla obubî bw’ecâha câni.

⁶ Okwôla kwarhuma ngasi mushibirizi ayishikaz’ikushenga amango alagîrîre. Amango amîshi manji-manji gashabira, garhâhike ah’ali.

⁷ We lwâkiro lwâni, we wânankûle omu bulagîrire, onampire omu karhî k’enshagadu y’obucire.

⁸ Nkolaga nakuyigîriza nkulangûle enjira wakaz’igeramwo, nkolaga nakubwîriza nankuje ebulâbi.

⁹ Murhakazâg’ibà ak’endogomi nîsi erhi ecihêsi, byo birhajira bukengêre, byo birhayumva olurhali lugîsho n’olukoba; nka ntalwo ogwêrhe birhankakuyegêra.

¹⁰ Omubî amababale gâge gabà mwandu, ocîkubagira Nyakasane yêhe, obwonjo bumuzungulusire.

¹¹ Mwe bashinganyanya musîme munacîzigirize muli Nyakasane; muzuruke mwe b’omurhima gushongwîre.