Ennanga 29 - BIBLIYA NTAGATIFU OMU MASHI

Olwimbo kuli Nyamuzinda Nnankubâ

1 Lulanga. Lwa Daudi.

¹ Lulanga. Lwa Daudi. Mukazirhûla Nyakasane, bene Lungwè we, Mukazirhûla Nyakasane irenge n’obukulu.

² Mukazirhûla Nyakasane irenge likwânîne izîno lyâwe, mukaziharâmya Nyakasane n’omwambalo gukwânîne.

³ Izù lya Nyamuzinda lirhalusire ery’amîshi, Nyamuzinda Nnâmahanga akûngwîre: amîshi manji-manji gacîhambage.

⁴ Izù lya Nyakasane obuhashe lijira wâni! Izù lya Nyakasane lirhaluga wâni!

⁵ Izù lya Nyakasane linahongole enduluma, Nyakasane anahongole enduluma z’e Libano.

⁶ Anarhume ecihugo ca Libano cahama nka mutwîrà arhume na Siriyoni ahama nka kanina ka mbogo.

⁷ Izù lya Nyakasane linamanule engulumira y’omuliro.

⁸ Izù lya Nyakasane linadirhimanye irungu, Nyakasane anageze irungu lya Kadesi mw’omusisi.

⁹ Izù lya Nyakasane linakube emirhi lisige emizirhu bûmu-bûmu: n’omu ngombe yâge boshi kwo baderha, mpu: Aj’irenge!

¹⁰ Nyakasane atamîre agandâza kurhaluka ecihonzi, Nyakasane ye wanayôrha ayîmire ensiku n’amango.

¹¹ Nyakasane ye wâyîsh’ihà olubaga lwâge emisî, Nyakasane ye wâyîsh’igisha ishanja lyâge omu kulihà. omurhûla.