Ennanga 28 - BIBLIYA NTAGATIFU OMU MASHI

Amingingo n’okuvuga omunkwa

1 Lwa Daudi.

¹ Lwa Daudi. Yâgirwa w’ono nayâkûza; omanye wafuka amarhwîri, mâshi Kabuye kâni; bulyâla erhi wakabula bwanyumva, nânashusha abacôcobera omu mwîna.

² Yumvîrhiza guno musengero gwâni, yumva kuno nakubirikira; lolà oku ndengerize amaboko ebwa ngombe yâwe ntagatîfu.

³ Omanye wampêka omu nsânya haguma n’abanya-byâha, haguma n’enkola-maligo; balyâla babwîra abâbo mpu murhûla, n’obwo bagwêrhe obubî omu murhima.

⁴ Obatwîre nk’oku ebijiro byâbo bikwânîne, n’oku obubî bw’ebyâha byâbo budesire, obashobôze ebiringânîne emikolo y’enfune zâbo, ebijiro byâbo bibashubirekwo.

⁵ Obûla barhashîbirira emikolo ya Nyakasane, barhanashîbirira obushanja bw’enfune zâge, Nyakasane arhang’ibashandabanya buzira kucibashubiza haguma.

⁶ Nyakasane ayâgirwe obu ayumvîrhîze izù ly’omusengero gwâni.

⁷ Nyakasane ye buzibu bwâni ye na mpenzi yâni! Yêne omurhima gwâni gwàli gucîkubagire ananyumva.

⁸ Nyakasane ye buzibu bw’olubaga lwâge, ye na lwâkiro lw’okuciza omushîge wâge.

⁹ Ocizagye olubaga lwâwe onagishe omwîmo gwâwe, bayâbulè onakaz’iyôrha obashokolera ensiku n’amango.