Ennanga 24 - BIBLIYA NTAGATIFU OMU MASHI

Obugashânize bw’okujà omu cirhînyiro

1 Lulanga. Lwa Daudi.

¹ Lulanga. Lwa Daudi. Igulu n’ebibâmwo byoshi bibà bya Nyakasane, Ye Nnâmahanga goshi n’ebiremwa byâgo byoshi.

² Ye walijeberezagya oku ndêko y’enyanja, àliyûbaka analizibuhya oku maliba g’enyîshi.

³ Ndi wankarheremera oku ntondo ya Nyamuzinda, erhi ndi wankabêra omu bwâmi bwâge butagatîfu?

⁴ Omuntu w’amaboko mêru-kwêru n’ow’omurhima gucîre, olya orhahîra omurhima gwâge oku by’obunywesi, orhanalahira binyoma.

⁵ Oyo ye wâgishwe na Nnâmahanga, anacîranulirwe bwinjà na Nyakasane Muyôkozi wâge.

⁶ Eryo lyo iburha ly’abamulonza, iburha ly’abalonza okubona obusù bwa Nyamuzinda wa Yakôbo.

⁷ Mwe nyumvi, yimuki, yimuki, mwe nyumvi z’ensiku n’amango: hundusi Mwâmi w’irenge.

⁸ «Ye ndi oyo Mwâmi w’irenge?» «Ye Nnâmahanga ciri-misî, ntwâli, ye Nyakasane ohima entambala.»

⁹ Mwe nyumvi, yimuki, yimuki, mwe nyumvi z’ensiku n’amango, hundusi mwâmi w’irenge.

¹⁰ «Ye ndi oyo mwâmi w’irenge?» «Nyamuzinda w’Emirhwe: yêne ye mwâmi w’irenge.»