Ennanga 20 - BIBLIYA NTAGATIFU OMU MASHI

Nyamuzinda aciza mwâmi

¹ Gwârhi omukulu w’abimbiza. Lulanga. Lwa Daudi.

² Mâshi Nyakasane akuyumvirhize omu lusiku lw’amalibuko, izîno lya Nyamuzinda wa Yakôbo likulange!

³ Akurhumire oburhabâle kurhenga ebwâmi bwâge butagatîfu anakulange kurhenga e Siyoni.

⁴ Ayibuke entûlo zâwe zoshi, anasîme enterekêro yâwe.

⁵ Akushobòze eci omurhima gwâwe gucìfinja, anakurhabâle obone ehi olonza hyoshi.

⁶ Mâshi rhucîshingire okuhimana kwâwe, rhunashûrhire izîno lya Nnâhamwîrhu Nyamuzinda engoma. Nyakasane ayumvîrhîze ensengero zâwe zoshi!

⁷ Lêro nkola mmanyire oku Nyakasane aciza omushîgwa-mavurha wâge; kurhenga ebwâmi bwâge butagatîfu bw’omu malunga amuyumvîrhiza, omu kurhwalihya okuboko kwâge mpu kuhimane.

⁸ Baguma ngâlè zâbo bacîkubagira, abandi endogomi zâbo; rhwêhe izîno lya Nyakasane Nnâhamwîrhu Nyamuzinda lyo rhucîkubagira!

⁹ Bôhe bahimirwe banahirima, nîrhu rhuli bwimanga rhunazibuhire!

¹⁰ Nyakasane, fungira mwâmi; orhuyumvîrhize olusiku rhwakubirikira.