Ennanga 2 - BIBLIYA NTAGATIFU OMU MASHI

Masiha ye Mwâmi w’e Siyoni n’ow’igulu lyoshi

¹ Kwo kurhi oku amashanja gakunire, ganadwîrhe gahiga emihigo y’obusha?

² Abâmi b’igulu bamâhuluza engoma, nabo abaluzi bamâja ihano mpu bagomere Nnâmahanga n’omwîshogwa wâge.

³ «Mpu: emigozi yâbo rhuyitwe, rhunakabulire omuzigo gwâbo kuli nîrhu!»

⁴ Omu bwâmi bwâge Nnâmahanga adwîrhe asinz’emalunga, Nyakasane adwîrhe abashekera.

⁵ Amâkunira amâbashuza, omu bukunizi bwâge amâbayobohya.

⁶ Erhi: «Niene nayimikaga Omwâmi wâni oku Siyoni», «Oku ntondo yâni ntagatîfu».

⁷ Lekagi nâni mmubwîre akanwa ka Nnâmahanga; àmbwîzire, erhi: «Oli mugala wâni, nie nkubusire ene».

⁸ Ompûne eci wankalonza, nâni nâkuhà ebihugo byoshi bibè hyâwe.

⁹ «Wabamalîra n’engôrho yâwe», «onabavungunyule nka mubumbi wabera enyungu.»

¹⁰ Lêro, mw’oyo bâmi, muyumve, ninyu batwî b’emmanja b’igulu mumanye!

¹¹ Mukolere Nyamuzinda munamurhînye,

¹² mucîkwêbe aha magulu gâge n’obwôba; buly’erhi ankakunira mwanahungumuka: oburhè bwâge kwo buyâka caligumiza nka ngulumira. Iragi lyâbo abamuyegemera!