Ennanga 149 - BIBLIYA NTAGATIFU OMU MASHI

Olwimbo lw’obuhimanyi

¹ Aleluya! Yimbiri Nnâmahanga olwimbo luhyâhya, irenge lyâge liyumvîkane omu ndêko y’abarhonyi bâge.

² Israheli ashagalukire Nnâmahanga Mulemi wâge, abâna b’e Siyoni bacîtakîrire omwâmi wâbo.

³ Bakuze banasâmire izîno lyâge, bamuzihire ennanga banamurhimbire engoma.

⁴ Bulya Nyamuzinda ashagaluka n’olubaga lwâge, Ye ciza abanyinyi anabakuze.

⁵ Abarhonyi bâge banagandâze omw’irenge, banashagaluke n’omw’îrò.

⁶ Obukuze bwa Nnâmahanga burhabarhenga omu kanwa, omu nfune zâbo murharhenga engôrho ya môji abirhi.

⁷ Y’okucîhôla amashanja, n’okuhana emirhwe

⁸ Okuhanika abâmi bâbo n’enkoba, n’abaluzi bâbo omu caburhinda.

⁹ Lyo olushika lwatûbagwa kuli bo luyunjula, lyo irenge lyàbikîrwe abarhonyi bâge boshi