Ennanga 138 - BIBLIYA NTAGATIFU OMU MASHI

Olwimbo lw’okuvuga omunkwa

1 Lwa Daudi.

¹ Lwa Daudi. Nakugashâniza Nyamwagirwa, n’omurhima gwâni gwoshi, bulya wayumvirhîze ebinwa byâni, nkolaga nakuzihira embere za bamalahika bâwe,

² nkola nakuyimbira enyimbo z’obukuze, erhi nnankumbire bûbi omu ka-Nyamuzinda kâwe. Nakuza izîno lyâwe, erhi buzigire bwâwe n’okurhahemuka kwâwe kurhuma, bulya eciragâne câwe càbîre ca mwâmi w’izîno.

³ Olusiku nakufukamiraga wanyumvîrhiza, wanyûshûlira emisî y’omurhima.

⁴ Nyamwagirwa, abâmi b’omw’igulu boshi bakuvuga omunkwa, bulya bàyumvîrhe ebirhangâzo by’ekanwa kâwe.

⁵ Nêci bayimba enjira za Nnâmahanga, bulya irenge lya Nnâmahanga liri likulu lwoshi.

⁶ Omu bukulu bwâge kurharhuma arhashîbirira abanyinyi, n’okukengula abacîbona binjà.

⁷ Nkabâ omu maganya, onanzibuhye, onalambûle okuboko kwâwe wagombyamwo abanshomba, onancize.

⁸ Nêci, obuzigire bwâwe buli bw’ensiku n’amango, omanye wankacilîkirira emikolo y’okuboko kwâwe.