Ennanga 137 - BIBLIYA NTAGATIFU OMU MASHI

Owayibagira ah’omunyunyu gwâge gubà erhi arhamubà

¹ Erhi rhwabâga rhudahîre oku bikunguzo by’enyîshi z’e Babiloni, yône mirenge rhwakàgidubula erhi kufà Siyoni mungo kurhuma.

² Kwarhuma ciru n’ennanga zîrhu rhukazimanika, oku mirhi ya mw’eryo ihanga.

³ Abarhuhekaga mw’eryo ihanga erhi barhurhenza omu cihugo c’amasîma, balinda bakala enshonyi z’okurhuhûna enyimbo, mpu: «Rhuyimbiri enyimbo z’omwîshingo gw’e Siyoni.»

⁴ Kurhigi rhwakayimba enyimbo z’okukuza Nyakasane omw’ihanga lya bene?

⁵ Yeruzalemu wêhe aha nakakuyibagira, nankashingâna okulyo kwâni kwahozire.

⁶ Nêci olulimi lwâni, waliha Yeruzalemu, luyûmire ebiraka, aha nankakuyîbagira nîsi erhi aha nankabula kuderha oku we murhanzi omu bansimîsa.

⁷ Kengêra Nyamwagirwa, kurhi bene Edomu bàjizîre Yeruzalemu mpu ehyajirwe kuhika okw’ibuye lizinda.

⁸ Kashâba we, mwâli wa Babeli, ali w’iragi linene owabona amabî warhujirîre.

⁹ Nêci ali w’iragi owagwârha ebirhaba byâwe n’okubivunyungulira oku mabuye.