Daniyeli 3_1 - BIBLIYA NTAGATIFU OMU MASHI

Olwimbo lw’Azariasi omu ndugurhira y’omuliro

²⁴ Bajà balambagira omwôla ngulumira y’omuliro, bajà bakuza Nyamuzinda­da banaharâmya Nyakasane.

²⁵ Azariasi ayimanga aderha ogu musengero; erhi abumbûla akanwa anali muli eyôla ngulumira y’omuliro aderha erhi:

²⁶ Oyagirwe Nyakasane Nyamuzinda wa Bashakulûza; izîno lyâwe likuzibwe linaje irenge ensiku zoshi.

²⁷ Bulya oli mushinganyanya muli ebi warhujirîre byoshi, n’emikolo yâwe eri y’okuli n’enjira zâwe zishingânîne, n’obucîranuzi bwâwe buli bw’okuli.

²⁸ Bulya wahanyire obucîranuzi bw’okunali muli oku wanarhujirîre kwoshi kuguma n’okuwajiriraga olugo lutagatîfu lwa larha, Yeruzalemu; wajira okwôla kunali kunashingânîne koshi erhi byâha bîrhu birhuma.

²⁹ Bulya rhwajizire ecâha rhwanahemuka embere zâwe rhwanayunjula amabî goshi.

³⁰ Rhurhashimbaga amarhegeko gâwe goshi, rhurhagabîkiriraga rhurhanagakulikiraga nk’oku wanali orhegesire lyo rhubona iragi.

³¹ Empîmbo warhuhimbwîre zoshi na ngasi kundi warhujirîre, okwôla kwoshi wakujizire n’obushinganyanya.

³² Wàrhuhanyire emwa abashombanyi bagalugalu, abapagani babî bwenêne, emwa omwâmi orhîshi bushinganyanya, alushire abà hano igulu lyoshi bubî.

³³ Na bunôla rhurhacicîshomya nti rhwabumbûla akanwa; enshonyi n’ebihamba byayisire bambali bâwe, kuguma na ngasi bandi banakuharâmya.

³⁴ Yâgirwa orharhulekereraga omu maboko g’abashombanyi bîrhu erhi izîno lyâwe lirhuma, orhanavunaga endagâno yâwe.

³⁵ Yâgirwa orharhurhenzagya kwo obwonjo bwâwe oku makwânane gw’o­mwîra wâwe Abrahamu, n’aga mwambali wâwe Izaki n’omutagatîfu wâwe Israheli.

³⁶ Abà walaganyagya mpu waluza iburha lyâbo nka enyenyêzi z’oku nkuba, na nka mushenyi g’omu nyanja.

³⁷ Bulya, yâgirwa Nyakasane rhwe rhukola banyi kulusha omu gandi mashanja goshi, rhunalibusire buno omu igulu lyoshi erhi byâha bîrhu birhuma.

³⁸ Bunôla ntà mwâmi, ntà murhambo, ntà mulêbi rhucijira; ntà nterekêro rhucijira ôli ez’okukuza, ôli ez’enkalangè, ciru n’okutumbûsa enshangi, rhurhacijira ciru aha rhwakakurhûlira eby’omu mburho zîrhu lyo rhurhona emu­nda oli.

³⁹ Ci, Yâgirwa nîrhu rhuyankirirwe n’omurhima gw’obucîyunjuze gunayunjwîre bwîrhôhye.

⁴⁰ Rhubè nk’abadwîrhe enterekêro z’ensirîra z’engandabuzi n’ez’empanzi, nîsi erhi nk’abadwîrhe ez’ebihumbi by’ebibuzi bishushagîre; ntyôla kwo ebâge ene eyi nterekêro rhukurhûzire bunôla, enabè nyimâna embere zâwe, bulya ntâko bankabulabula abakulangâlira.

⁴¹ Yâgirwa we rhukulikîre bunôla n’okukurhînya n’omurhima gwîrhu goshi, rhwayisha rhwalongereza obusù bwâwe.

⁴² Orharhubonêse nshonyi. Ci, Yâgirwa orhujirire nk’oku obutûdu bwâwe bunali na nk’oku obwonjo bwâwe bunji bunali.

⁴³ Orhulîkûze n’ebirhangâzo byâwe n’izîno lyâwe lij’irenge, yâgirwa Nyakasane.

⁴⁴ Barhungwe n’obwôba ngasi balibuza olubaga lwâwe, enshonyi zibabu­mbè omu kuhoza obuhashe n’irenge bagwêrhe n’emisî ebahwêre.

⁴⁵ Banamanye oku wêne we Nyakasane, wêne we Nyamuzinda oyunjuzize igulu irenge!

⁴⁶ Ci kwônene balya barhumisi ba mwâmi bakwêbaga balya bantu basharhu omu ndugurhira y’omuliro barhahusagya okuyidukumbya omu kuhiramwo ebitoro, ebikundukundu by’ecimoge, amagoba g’eyindi mirhi gayâka nka mavurha n’amashami g’emizâbîbu.

⁴⁷ Engulumira yakazihika omu nkuba-karhî, ya makano makumi anni na mwenda oku nyanya ly’endugurhira y’omuliro.

⁴⁸ Lêro omuliro gwalandira gwanayôca Abanya-Kaldeya boshi bali eburhambi bw’endugurhira y’omuliro.

⁴⁹ Ci malahika wa Nyakasane ali amâbungulukira omu itanuru, abêra boshi na Azariasi n’abâbo, akazirhenza omwôla ndugurhira ezôla ngulumira ndârhi z’omuliro.

⁵⁰ Omwôla ndugurhira ahiramwo empûsi y’ehibohôlolo, empûsi y’ecishuhaha, ntyo omuliro gurhabahikagakwo ciru n’eriguma, gurhabababazagya gurhanabajiraga akantu.

Olwimbo lwa misole isharhu

⁵¹ Okubundi abôla bantu basharhu nka muntu muguma, banacijà omu ka­nwa baharâmya, bacîshinga banakuza Nyamuzinda omwôla ndugurhira y’omuliro baderha, mpu:

⁵² «Osûhirwe Nyakasane Nyamuzinda wa bashakulûza, okuzibwe onaj’irenge emyâka n’emyâka. Lisûhirwe izîno ly’irenge lyâwe litagatîfu, Okuzibwe onajè irenge emyâka n’emyâka.

⁵³ Osûhirwe omu nyumpa ntagatîfu y’irenge lyâwe. Okuzwe onaj’irenge emyâka n’emyâka.

⁵⁴ Osûhirwe oku ntebe y’obwâmi bwâwe, Okuzibwe onaj’irenge emyâka n’emyâka.

⁵⁵ Osûhirwe we fukûla emisima, we na bwârhîre kuli bakerûbini oganze onagandâze emyâka n’emyâka yoshi.

⁵⁶ Osûhirwe omu cirêre c’oku nkuba, oganze onagandâze emyâka n’emyâka yoshi.

⁵⁷ Mwe biremwa bya Nyakasane mukuze Nyakasane, kuzagyi ye munamuhè irenge emyâka n’emyâka.

⁵⁸ Mwe bamalahika ba Nyakasane, mukuze Nyakasane, kuli ye obukuze n’irenge emyâka, n’emyâka.

⁵⁹ Mwe malunga ga Nyakasane, mukuze Nyakasane, kuli ye obukuze n’irenge emyâka n’emyâka.

⁶⁰ Mwe mîshi g’oku nkuba, mukuze Nyakasane, kuli ye obukuze n’irenge emyâka n’emyâka.

⁶¹ Mwe mahashe goshi, mukuze Nyakasane, kuli ye obukuze n’irenge emyâka n’emyâka.

⁶² Ninyu mwe izûba n’omwêzi, mukuze Nyakasane, kuli ye obukuze n’irenge emyâka n’emyâka.

⁶³ Mwe nyenyêzi z’emalunga, mukuze Nyakasane, kuli ye obukuze n’irenge emyâka n’emyâka.

⁶⁴ Mwe nkuba, ninyu mwe lumè, mukuze Nyakasane, kuli ye obukuze n’irenge emyâka n’emyâka.

⁶⁵ Mwe mpûsi mweshi, mukuze Nyakasane, kuli ye obukuze n’irenge emyâka n’emyâka.

⁶⁶ Mwe muliro n’idûrhu, mukuze Nyakasane, kuli ye obukuze n’irenge emyâka n’emyâka.

⁶⁷ Mwe mpondo n’ecanda, mukuze Nyakasane, kuli ye obukuze n’irenge emyâka n’emyâka.

⁶⁸ Mwe lumè n’amahuhira, mukuze Nyakasane, kui ye obukuze n’irenge emyâka n’emyâka.

⁶⁹ Mwe mboho n’emisirûla, mukuze Nyakasane, kuli ye obukuze n’irenge emyâka n’emyâka.

⁷⁰ Mwe bibuye n’olubula lw’oku nkuba, mukuze Nyakasane, kuli ye obukuze n’irenge emyâka n’emyâka.

⁷¹ Ninyu mwe budufu n’omûshi, mukuze Nyakasane, kuli ye obukuze n’irenge emyâka n’emyâka.

⁷² Mwe bumoleke n’omwizimya, mukuze Nyakasane, kuli ye obukuze n’irenge emyâka n’emyâka.

⁷³ Mwe milazô n’ebitù, mukuze Nyakasane, kuli ye obukuze n’irenge emyâka n’emyâka.

⁷⁴ lgulu likuze Nyakasane, limukuze linamuhe irenge emyâka n’emyâka.

⁷⁵ Mwe ntondo n’orhurhondo, mukuze Nyakasane, kuli ye obukuze n’irenge emyâka n’emyâka.

⁷⁶ Mwe mburho z’omw’idaho mweshi, mukuze Nyakasane, kuli ye obukuze n’irenge emyâka n’emyâka.

⁷⁷ Mwe maliba mweshi, mukuze Nyakasane, kuli ye obukuze n’irenge emyâka n’emyâka.

⁷⁸ Mwe nyanja n’enyîshi, mukuze Nyakasane, kuli ye obukuze n’irenge emyâka n’emyâka.

⁷⁹ Mwe mpirahira na ngasi hindi binyagasi by’omu mîshi, mukuze Nyakasane, kuli ye obukuze n’irenge emyâka n’emyâka.

⁸⁰ Mwe nyunyi z’emalunga, mukuze mweshi Nyakasane, kuli ye obukuze n’irenge emyâka n’emyâka.

⁸¹ Mwe nsimba z’erubala, ninyu bishwêkwa by’eka, mukuze Nyakasane, kuli ye obukuze n’irenge emyâka n’emyâka.

⁸² Mwe bene abantu, mukuze Nyakasane, kuli ye obukuze n’irenge emyâka n’emyâka.

⁸³ Wâni Israheli, kuza Nyakasane, kuli ye obukuze n’irenge emyâka n’emyâka.

⁸⁴ Mwe badâhwa ba Nyakasane, mukuze Nyakasane, kuli ye obuhashe n’irenge emyâka n’emyâka.

⁸⁵ Mwe bambali ba Nyakasane, mukuze Nyakasane, kuli ye obukuze n’irenge emyâka n’emyâka.

⁸⁶ Mwe mirhima n’amaroho g’abashinganyanya, mukuze Nyakasane, kuli ye obukuze n’irenge emyâka n’emyâka.

⁸⁷ Mwe batagatîfu n’abîrhôhye b’omurhima, mukuze Nyakasane, kuli ye obukuze n’irenge emyâka n’emyâka.

⁸⁸ Ananiasi, Azariasi na Misaheli, mukuze Nyakasane, kuli ye obukuze n’irenge emyâka n’emyâka. Bulya arhufumize ecihenama, anarhuyâsa olufù; amârhufumya oku ngulumira y’omu ndugurhira y’omuliro, amârhukûla omu karhî k’omu­ liro n’engulumira zâgwo.

⁸⁹ Vugagi Nyakasane omunkwa bulya ali mwinjà; bulya obuzigire bwâge buli bw’ensiku n’amango.

⁹⁰ Mweshi mwe mumuharâmya, mukuze Nyakasane Nyamuzinda wa ba­ nyamuzinda, mumukuze munamuvuge omunkwa, bulya obuzigire bwâge buli bw’e­ nsiku n’amango.»