Baruki 5 - BIBLIYA NTAGATIFU OMU MASHI

¹ Yeruzalemu, ohogole omushangi gw’emishîbo n’oburhè, oyambale obukuze bw’irenge lya Nyamuzinda ensiku n’amango.

² Ocîhundikire ecishûli c’obushinganyanya bwarhenga emwa Nyamuzinda, ohire n’ishungwè ly’irenge lya Nyamubâho w’ensiku n’amango oku irhwe lyâwe.

³ Bulya Nyamuzinda ayêrekana obwinjà bwâwe omu igulu lyoshi linabà idako ly’amalunga,

⁴ anakuhè izîno oku nsiku zoshi, eryo izîno ly’eri: «Murhûla-gwa-Bushinganyanya», na «Irenge-lya-Bukuze».

⁵ Yimuka, Yeruzalemu, oyimange ahalengerîre, olabe ebushoshôkero bw’izûba, lolà oku abâna bâwe bashûbûzibwe n’akanwa k’Omwîmâna kurhenga ebuzikiro bw’izûba kuhika emunda lishoshôka, erhi banashangalusire oku Nyamuzinda anakengîre.

⁶ Bàrhenzire omu mihango yâwe bàgenda n’amagulu, erhi baminisirwe n’abashombanyi, ci Nyamuzinda àkugalulîrebo, badwîrhwe omw’irenge nka kula bahêka entebe y’omwâmi.

⁷ Bulya Nyamuzinda ànarhegesire okuyofihya ngasi ntondo elihûsire, lyo igulu lyoshi liyumânana, ntyo Israheli anahash’igenda kwinjà omu irenge lya Nyamuzinda.

⁸ Ciru n’emizirhu na ngasi murhi gwa bukù buhumula bwinjà, nayo yàrheganyîze Israheli ecihoho câyo, oku bulonza bwa Nyamuzinda.

⁹ Bulya Nyamuzinda âhêka Israheli n’obusîme, omu bulangashane bw’irenge lyâge, omu lukogo n’obushinganyanya bwârhenga emwâge.