1 Timoteyo 2 - BIBLIYA NTAGATIFU OMU MASHI

Okusengerera abantu boshi

¹ Kulusha byoshi, mpûnyire nti bashenge, baharâmye, basengere, banavugire abantu boshi omunkwa:

² abâmi n’abarhegesi boshi, lyo rhubona akalamo k’omurhûla buzira kavulindi, omu bukombêdu n’omu bugula.

³ Okwo kuli kwinjà kunasîmîsa Omuciza wîrhu Nyamuzinda,

⁴ olonza abantu boshi bacunguke banahash’imanya eby’okuli.

⁵ Bulya Nyamuzinda abà muguma yêne; n’omwimangizi ekarhî ka Nyamuzinda n’abantu naye abà muguma, anali muntu, ye Kristu Yezu,

⁶ wacîhânaga yêne mpu abè mpongano oku bantu boshi. Obwo bwo buhamîrizi Nnâmahanga yêne ahânaga omu mango ali erhi atwîre,

⁷ bwo nanarholeragwa mpu mbè mujà-bugo na ntumwa yâbo, -ndesire okuli, ntanywêrha-, mpu nyigîrize abapagani obuyêmêre n’okuli.

⁸ Nêci, nnonzize abalume bakâshenga hoshi hoshi, bakâlambûlira amaboko gâbo gacîre e­nyanya, buzira karhinda na buzira nnongwè.

Oku abakazi bakwânîne okuyôrha

⁹ Abakazi nabo bayambale emyambalo ebakwânîne, babè n’obukenge n’o­lugero; baleke okukâhunga emviri zâbo n’okukâyambala amasholo nîsi erhi amagerha n’emishangi y’engulo ndârhi;

¹⁰ Ci bakaz’ishîbirira ebijiro binjà, nka kulya kunashingânîne abakazi bacîderha bakombêdu.

¹¹ Amango g’enyigîrizo, kukwânîne omukazi ahulike n’obukenge. ­

¹² Ntahiri omukazi obuyêmêre bw’okuyigîriza erhi okurhegeka omulume; ahulike.

¹³ K’arhali Adamu ye warhangag’ilemwa, na Eva akulikira?

¹⁴ Arhanali Adamu warhebagwa; ci omukazi erhi abà amarhebwa, ahirima omu câha.

¹⁵ Ci kwônene ayish’icunguka omu kubà muzîre, caziga ayôrhe ali mucêse omu buyêmêre n’omu buzigire n’omu butagatîfu.