Yudasa 1 - Ma Jou ai Demo-demo o Totobelohoka

O Yudasa ai demo ihira-hira ai gogianongoruika

¹ Ahi gogianongoru abe ngini Ma Jou winiahokoka nia ngongakuino la winihidadi to Una ai nyawa. Ngohi naa o Yudasa, o Yesusu Kristusu ai huhuloko de o Yakobusu ai dodoto. De naa ahi hurata tohidingoto ngini mata-mataika abe ngini nimanoa Ma Jou o Baba ai dora ma goronaka de abe o Yesusu Kristusu ka ihikaika winigoana nginika.

² De naa ngohi tonganono abe ngini ka ihikaika niamake Ma Jou ai owa de ai hininga ma miriidi de ai hininga ma dora, la hiadono gea ka idogo-dogo nia kokihiningaka.

O Yudasa wahitiari onangika ma titi ona utu abe o rerehene ma dodotoko yotobadotoko

³ Ahi gogianongoru abe ngini duru tinidora. Naa tomahingahu ahi hininga ma titi ahi hurata naa ma dolaka abe tohidingoto nginika. Angamoi ma dodihiraka de naga ahi hidee la tinihurata nginika ma titi hokokia to ngone mata-mata nanga wowango ma hungi abe Una wonahikokidoakoka ngoneino. Masara ma bahauku de ma titi ena gea ko idadiuali abe tinihurata nginika, angamoi ngohi duru tamao ahi hiningaka hoka ihitila la ufa ma titi gea ena tinihurata nginika masara naa ma titi moioli. Ho naa tinihurata de duru tinihigaro nginika la nanga ngongaku ma dodotoko nioodemo de ufa nihigunoa la o nyawa yaturuuru. Angamoi gea hohiorikoka nanga ngongaku ma dodotoko gea wonahidoaka ngone ai nyawaino ko ma titiua la haturuuru, masara gea wonahidoaka la ka gea dika inahihira-hira ka hiado-adonika. Ho naa ngohi duru tinihigaro nginika la nanga ngongaku ma dodotoko gea nioodemo.

⁴ De hokogea tinihigaro nginika angamoi igoungu naga o nyawa utu nia hidogoronaka abe ona ko yagou-goungua iwiniiki Ma Jouika. De ona gea ka yomadokangelukino dika la ka idadi yomahisapuru ti ngini nia doomu ma goronaika. De ona manga hiningaka ato mangale ma titi Ma Jou duru wonahiowa ngoneino hiadono Una ko wonahohowonua ma titi ai owa duru ilamokoholi. Ho gea ona ato ngone ka idadi haniiki nanga badanga ma hafini o kia dika abe nanga hininga adaene de gea ko wonahohowonua ngoneino, angamoi ona ato bari ka Ma Jou ai owahi duru ilamoko. De hokogea ona ihikawalimi Ma Jou ai hininga ma owa ngoneino de gea hiadono ona iwioluku to ngone nanga haeke de nanga Baluhu idodutu abe womatengo dika o Yesusu Kristusu. De ona abe duru ma dodihirakahi de manga hohowono ihitulihukuokau Ma Jou ai Bukuoka. Ho gea ma titi hiadono ngohi tinihitiari nginika ma titi ona gea.

⁵ De naa marai ma titi muruono naga tato tinihihohininga nginika, de gea igoungu abe ngini ma dihirainohi de nihiorikoka, masara naa tato tinihihohiningali la utuohi niongano-nganono genangika. Abe hoka ma dodihiraka ma oraha Ma Jou nanga Baluhu idodutu waduhunu to Una ai nyawa abe wahihupu o Mesiiri ma tonakoka de aino. De ngaro Una waduhunoka ai nyawa, masara ipahaika de naga utu ai nyawaino abe ko iwingakua Unangika, de ma bahauku de ona gea wahibinaahaka. De ma titi gea ena ufa ngone hawohanga.

⁶ De naa moioli tinihihohininga abe ma titi Ma Jou ai momalaekata. Angamoi ma dodihiraka de ai malaekata utu gea manga kuaha de manga gogere gea yanoaka de iwiporetoka Ma Jouika. De ma malaekata gea Ma Jou wakokipakitoka de wakokibuika abe o fufutu ma bui ma goronaka ka hiado-adonika, de genangokahi wahidogunoaika hiadono ahao ai hohowono ma wange adono. De ma oraha gea ahao ai malaekatoo Una wahohowono.

⁷ De naga ma ade-ade moioli tinihihohininga, de gea ma titi ma dodihiraino o Sodomo de o Gomora de naga ma kota utu abe ihigilolitino ma kota hinooto gea. Abe ma nyawa ma dodihiraino yogoo-gogere ma kota-kotaka gea to onangoo manga datoro hatoli imaketero abe hoka o malaekata ma dorouoli ma datoro, angamoi onangoo yomakitigi ko itiaiua de nagali yohafini utuika abe ko imakiniikua de Ma Jou ai hininga de ai hiaturu ai dulaadaino. De gea ma kota ma nyawa onangoo ma bahauku de Ma Jou wahibinaaha de o uku ka hiado-adonika. De igoungu ona gea ka ma dodihirainohi de hidutu ka ma oraha naa de ka wahihohowonohi de o uku. Ho ona gea yodadioka o dodotoko de o hitiari ngone mata-mataino abe ma titi hokokia ma mogiria Ma Jou ai hohowono onangika abe ko iwinii-niikua.

⁸ De masara abe ona yomahisapurika nginioka, ona gea manga wowangoka de duru yomaketero dika abe hoka ona ma dodihiraka manga wowango abe ahao naa tinihihohininga ipahaino ma titi abe ona gea manga ade-ade. Angamoi ona naa yotobabuluhara de genangino ihititi la yato bote Ma Jou wahigunoa la manga wowango ma datoro gea yodiai. Abe hoka ona ka ihipeseke manga badanga, de ona yoluku yahigihene manga balu-baluhika. De nagali abe ona gea duru yamoroini la yongelo o malaekatika abe naga de ma kuahaka.

⁹ Masara ngaro to Ma Jou ai malaekata ma ko yamoroinua la yongelo o malaekata utuikali. Abe hoka o Mikaele abe una gea Ma Jou ai malaekata manga haeke womatengo. Ngaro una masara ma dodihiraino de ko iwimoroinua wongelo abe o Ibilihika. Abe ma dodihiraka de o Mikaele de o Ibilihi ma haeke, de gea igoungu yokadatoro ma titi to Musa ai honenge. Masara ngaro hokogea yokadatoro ma una ko wongeloua o Ibilihika ma gea wato, “Ahao ahi Baluhu idodutu Una dika wonitaere ngonaika.” Hokogea to Mikaele ai demo enangika.

¹⁰ De masara ona abe naga nginioka, ona gea o nyawa biaha dika, masara ona yongelo-ngelo o kiaika dika abe ma titi ko yomangaratiiua. De gea manga hininga ka imaketero dika abe hoka o aewani o fuhukoli ma hininga, angamoi manga badanga ma hafini o kia dika naga ma gea ka yaniiki. Gea ena dika ona ihioriki, masara duru manga hafini gea abe ahao yahibinaaha onangika.

¹¹ De ona ahao duru yokangela ma oraha manga baha yamakeoka, angamoi ona manga hininga ma datoroka yomaaduru hoka o nyawa ma dodihiraka manga hininga abe Ma Jou ona gea wahohowonoka. Abe hoka moi ona manga wowango imakiniiki de o Kaini ai wowango ma datoro ma dorou ma dodihiraka. De ona gea abe naga nginioka, naga moioli abe ona duru yoigo yodiai abe imakiniiki de to Bileama ai datoro ma dodihiraino. De gea ona duru yoigo yahirehene o nyawa Ma Jouoka de aino la ato ka idadi yomatiwi-tiwi genangino, de genangoka manga hininga duru yomaketero hoka o Bileamoli ai hininga ma dihiraino. De nagali abe ona gea nginioka duru yomakiniiki de abe hoka to Kora ai datoro ma dodihiraino. De gea ona duru yalawana manga balu-baluhika de gea manga tobalawana ka imakadaene dika hoka ma dihiraino o Kora watobalawana o Musa de ai balu-baluhika. Ho onangoo ahao Ma Jou wahohonenge abe imaketero hoka ma dihiraino o Korali ho wihohonengoka.

¹² Ho naa abe ma oraha ngini o doomu moi nimatoomuino la nimakokutuono niolomo de ona naga ininiiki, ona gea hoka yodadi o bebeleke ma hakaru moi nginika la ahao ngini niruba de nia ngongaku irehenoka. De gea ngaro ona manga wowango ko itiaiua, ma ona ka yamoroini dika yomahisapuru ti ngini nia ngolomo ma goronaka gea, angamoi ona yolegaika ka to ona ma hirete dika manga pereluika, de utuika ko yopusingua. De ona gea ka idadi tahiketero abe ona hoka o lobi ma hengo-hengo iboaino la ato inahidoaka o awana, masara o hidaloko dika yao-ao yaika yaino ho hidutu o awana ko inahidoakuali. Eko ona ka idadi tahiketero hoka o gota abe tanu ma oraha adonoka la ihofoko, masara ma gota gea ena duru ko ihofo-hofokua. De ma gota gea ma ngutuku yarafukoka, ho ena gea duru ihonengoka.

¹³ De o nyawa gea yomaketero abe hoka o lulu ma ago-agomo ma oraha o rato, ho ma oraha ihohe ma dudungiha de ma peseke ihibuaeliye de ihikabarihi arihonongaika. De hokogea tahiketero onangika angamoi manga datoro gea o himaleke dika ho hiadono ma peseke naga onangoka. De ona gea hoka o muru-murumu utu o dihangoka abe irehene ma dodagioka de aino ho hiadono to ena ma dodagi ko itiaiokaua yaniiki. De ona gea ahao ma hohowono amake o fufutu ma ngioka ka hiado-adonika, de ma ngi gea Ma Jou wahidiaiokau abe duru kohamofufutuholi genangoka. De hokogea to ona gea manga hohowono ahao amake abe ma nyawa gea yomahikasapuru nginika.

¹⁴ De nagali o Henoko ai hitiari ma demo ma dodihiraka abe duru yahitaana de ma nyawa gea abe yomahisapuru nginika. De nako o Henoko, una gea o Adama ai totoforauku womatengo abe ma lape ma tumiduku de genangoka o Henoko wowango. De una ma dodihiraka de Ma Jou wihingahu moi unangika de ahao una wadofanga ma hingahu ma demo gea ai gogianongoru utuikali. De gea wadofanga wato, “Abeika, nanga Baluhu idodutu woboaino de naga Unangoka ai malaekata ma debi-debini duru yosana.

¹⁵ De gea woboa la wato o dunia ma nyawa mata-mataika manga wowango watailako de gea waputuhu manga balaha homoi-homoiika hokokia ahao yamake Unangino. De ma oraha gea Una wahohowono ona mata-mataika ko iwingaku-ngakua ma titi manga datoro ma dorou yodiaioka Unangika angamoi ona iwitobalawana. De abe ma dodihiraino ona iwingelo-ngelo Ma Jouika la ato iwihitipokouku, de enangoo gea ma titi hidutu wahohowono ona yatobahowonika.” De hokogea Ma Jou ai hingahu ma demo abe ma dodihiraino o Henoko wadofanga ai gogianongoruika.

¹⁶ De ma demo gea duru yahitaana de ona gea abe yomahisapuru nginika, angamoi ona ka ihikaika yokurubungu de yabobeto o nyawaika, de abe manga wowangoka yatobaniiki to ona ma hirete manga badanga ma hafini. De nako manga uruoka ona duru yomagorakiye ona ma hirete, de nagali abe ona yahigiriiri o nyawa utuika de manga demo ma ilingi ma mutiti la ato ma utumu yomamake onangino gea. Ho gea to Henoko ai demo ma dodihiraino duru yahitaana onangika abe ma titi to ona manga hohowono hokokia ahao yamake Ma Jouoka de aino.

O Yudasa wahitiari de wahibehehongo ai gogianongoruika

¹⁷ Masara nako ngini ahi gogianongoru, kiani ngini nimahihohininga abe ma titi nanga Baluhu idodutu o Yesusu Kristusu ai hidingoto ma nyawa manga demo-demo abe ma dihiraino ona inahitiarioka.

¹⁸ Abe ona manga hitiari ma demo ato, “Ahao ma oraha nanga Baluhu ai gahe ma wange hatoli itigioka de ahao naga utu o nyawa yotobamia-mia nanga ngongakuika de nanga Baluhu idodutuika. De ona yotobamia-mia gea manga wowangoka yatobaniiki to ona ma hirete manga badanga ma hafini abe ena gea duru imakalawana de to Ma Jou ai mau ngoneino.” Hokogea ona inahitiari ma dihiraino.

¹⁹ De gea igoungu manga demo itaanoka, angamoi ona yotobamia-mia, gea ka ona dika abe ma oraha naa nagau yomahisapurika nginioka de abe iniregu ngini nia doomu ma goronaka. De ona gea Ma Jou o Womaha ko iwiwa onangoka, ho ona manga wowangoka yatobaniiki dika ngone o nyawa nanga hininga ma dihiraino.

²⁰ Masara nako ngini ahi gogianongoru abe ngohi duru tinidora nginika, ufa ngini nimaaduru abe hoka onangoli gea. Masara ngini kiani nimahiketehiputurungu Ma Jouika abe ma titi nanga ngongaku ma dodotokoka de aino. De nanga ngongaku ma dodotoko gea ngaro o dodotoko utu mata-mataika ma ka nenangohi duru itebi-tebini. De ngini kiani ka ihikaika nimaniata de gea nimahinganono Ma Jou o Womaha ai kuahaika la gea Una winihihira-hira nia niniata ma goronaka.

²¹ De kiani ngini ka ihikaika nimahihohininga ma titi Ma Jou ai dora ngone ai nyawaino. Abe ngini ka idadi niongano-nganono hokokia ma amoko nanga Baluhu idodutu o Yesusu Kristusu ai hininga ma dora nginika ka hiadono ahao dokengika de ngini niwango de de Una ka hiado-adonika. De ma oraha gea de ahao to Una ai dora nginika duru ingodu-ngodumoka angamoi ai wowango ma ngango enangoo ahao duru ingodumu nginioka. Ho koaho ai hininga ma dora gea inihihira-hira nia wowangoka ka hiadono ma oraha genangoka abe ahao nia wowango ingodumu niamakeoka Unangoka de aino.

²² De nako o nyawa abe manga hininga ka hinootohi ma titi o dodotoko o kiaika yomahinganono, onangika gea kiani niaduhunu de nia hininga de ma doraka.

²³ De nako o nyawa utu abe manga hohowono o ukuika ngade-ngade yadaenoka, ona gea kiani ngini nimataiti niaduhunu la ufa yogila-gila o ukuika. De abe nagahi o nyawa utuoli abe manga wowango ma datoro duru itorouholi, de gea onangoo ma ka idadi niaduhunu de nia hininga de ma doraka, ma kiani nginioo nimahitiari done o nyawa inihiata-atara de nginioo niruba o howonuku. Angamoi to ona manga howono gea kiani ngini niodohata enangika done imahora nginikali.

O Yudasa ai hurata wohibobaha de o higiriiri ma demo Ma Jouika

²⁴ Ho naa ngone ngaro ka hihigiriirioka abe Ma Jou nanga Duduhuniye! Angamoi Una gea ka wakunu wonatiki la ufa hopeleke de horuba o howonuku. De mangale ma titi Una wonaduhunu hiadono ko horubaua, ho ahao ka idadi wonaao ai himangino de to ngone nanga howono duru ko iwaka ngoneoka, angamoi nanga wowango o duniakahi de o wange-wangeiye wonaduhunu la ufa hahowono. Ho ahao ma oraha homarihimangino de Una abe naga de ai medebini ma dararonoka, de gea o howono ngoneoka duru ko iwaka ma titi to Una ai duduhunu ngoneino, ho gea ngone duru hogogaragoholi to Una ai himangoka.

²⁵ Ho gea duru itiai abe ngone hihigiriiri Ma Jouika. Angamoi ka Una dika Ma Jou nanga Duduhunu, de utuikali ko iwa. Ho gea duru itiai abe nanga Baluhu idodutu o Yesusu Kristusino de hihigiriiri Ma Jouika, angamoi ngaro ka hiado-adonino eko ngaro ma oraha naa naga, eko ngaro ka hiado-adonika, masara Ma Jou dika abe duru de ai medebini ma dararonoka, de ngaro mata-mataika ma gea ka to Unangohi ai gogere duru ikurutiyeholi. De ka Unangoka dika imanoa ma kuaha duru kohaamoko la Una mata-mataika wohipareta de wohikoano naa de ka hiado-adonika. De gea ma titi hiadono kiani ngone hihigiriiri Unangika. Amin.