Yosua 9 - Ma Jou ai Demo-demo o Totobelohoka

O Pasala 9 ko atailakouahi O Gibeono ma nyawa yabudi o Isiraele ma nyawaika

¹ De ma oraha gea naga o kokoano yamuruono naga abe yahipareta manga nyawa homoi-homoiika o Yorodani ma akere ma honongaka abe o wange ma hiwariha idateke. De ona abe yomahikoano onangika naga o Hete ma nyawa de o Amori ma nyawa de o Kanani ma nyawa de o Ferisi ma nyawa de o Hewi ma nyawa de o Yebusi ma nyawa. De manga tonaka gea naga utu yomanoa o loku-lokuoka, de utu yogogere o loku-loku ma timiuku, de utuoli yogogere o Gogoronaka ma gahi ma ngigorino abe ka hiadono dau o Libanono ma loku-lokuku. De ma kokoano mata-mata gea yoihene ma abari abe ma titi o Isiraele ma nyawa duru yahikalaka o Yeriko de o Ai ma nyawa gea.

² Ho ma kokoano gea yomatoomuino de yomakoketemo de ipaha yomahiketehibehehongo la ona de manga tentara yomakokuduhunu yaparangi o Yosua de ai tentara o Isiraele ma nyawaika.

³ Masara nako o Hewi ma nyawa abe yogogere o Gibeono ma kotaka, ona manga hidee imakohowono. Abe ona ma oraha yoihene ma titi o Yosua de ai nyawa yahikalaka o Yeriko de o Ai ma nyawaika

⁴ de yato koaho yabudi o Isiraele ma nyawaika la ka idadi yomaduhunu. Ho yahidingoto manga nyawa yamuruono naga o Yosuaika, masara manga hidiai hokonaa la ka idadi yabudi o Isiraele ma nyawaika. Abe yatoomuinohi manga kiahonanga ma ngede-ngedere de yomahinoauku de manga babiti. Ho manga keledai ma pore-poretuku ihinoa de manga beta-beta ma dorou, de nagali manga popoje abe naga de ma dadapa angamoi ma dihiraino ikokikakihoka.

⁵ De yomahinoaiye de manga sandaala abe duru ibabitoka de manga baju ka ma dodorou dika. De nako manga bilaono gea o roti abe duru itogowinoka de utuoli hiadono yogalula. Ho yomahidiaioka hokogea de yosobo abe manga dumutu o Yosuaika.

⁶ De ipahaino yomahiadono o Isiraele ma nyawa manga dodogumu ma ngiika abe o Gigaloka. De ahao yomahingahu o Yosua de o Isiraele ma nyawa mata-mataika ato, “Ngomi naa miboa mia tonaka duru ma gurutoka de miaino, de duru mimagahoko la ka idadi homahiketehibehehongo de ngini naa la ufa homaketeparangi. Angamoi miato irahai la ngone mata-mata hogogere de o dame dika.”

⁷ De yoihene manga demo gea de yopaluhu yaleha o Hewi ma nyawaika ato, “Masara done sarakia homahiketehibehehongo de ngini, angamoi marai nia ngi tanu ko ikurutikaua. Abe nako nia tonaka ma digi-digino dika, ngomi ko idadiua o homahiketehibehehongo de ngini.”

⁸ De o Hewi ma nyawa gea yopaluhu ato, “Ngomi naa ka idadi mimahibaluhu dika nginika.” De ahao o Yosua watemo de ai demo ma buturungu onangika wato, “Masara ngini naa tanu o kia ma nyawa, de o kiaka de niaino niboa?”

⁹ De iwipaluhu ato, “Ngomi naa mia tonaka duru kohagurutika, de miboaino angamoi miihenoka ma titi ti ngini nia Jou o Yawe. Abe miihene ma ade-ade ma titi to Una ai datoro mata-mata wodiaioka o Mesiiri ma tonakoka.

¹⁰ De nagali ma ade-ade abe hokokia wodiai o Amori ma nyawa manga koano yahinootoika gea doka o Yorodani ma akere ma honongaka. Abe ma koano gea naga womatengo ai romanga o Sihono abe wahikoano ai nyawa o Hesebono ma kotaka. De womatengoli ai romanga o Ogo abe wahikoano o Basana ma tonakoka de ai kota o Asitaroto.

¹¹ Ho ngomi miihene nia Jou ai datoro onangika gea, de mia hihira de mia gogianongoru mata-mata mia tonakoka imihuloko ato, ‘Nimahidiaioka de nia bilaono de nisobo nitagi-tagi onangika gea la ka idadi niatutumu. De ma oraha nimahiadono onangika de kiani niahingahu abe ngone mata-mata homahidiaioka la homahibaluhu de haleleani onangika. De kiani ngini duru nimagahoko la o dame ma behehongo yodiai de de ngone.’ Hokogea mia gogianongoru de mia hihira imihibehehongo.

¹² De abeika, ma oraha ngomi mia tonakoka ko misobouahi de mia roti naa ka ihaukohi, masara naa duru itogowinoka de utuoli hiadono yogalula.

¹³ De mia popoje naa ma dihiraino de ka ma hungiohi mata-mata ma oraha mioguhe, masara abeika ikakihoka mata-mata. De nagali mia baju de mia sandaala ka idadi niamake abe duru itotorouoka mangale ma titi mia dodagi duru kohagurutino miboa.” Hokogea manga budi ma demo.

¹⁴ De o Isiraele ma nyawa yoihene manga demo ipahaino de ahao yatailako manga bilaono gea. De yatailako ibooto de yahidutugaika dika ato bote yagou-goungu manga hingahu ma demoino. Masara gea ko iwilehaua Ma Jou o Yaweika ma titi o homoa ma nyawa manga gogahoko gea.

¹⁵ Ho o Yosua de o Hewi ma nyawa gea yomahiketehibehehongo la ufa yomaketeparangi masara yomakao irahai de o dame dika. De o Isiraele ma nyawa manga hihira utu onangoo yomahikoboto la ufa yawohanga manga behehongo gea onangika.

¹⁶ De yomahiketehibehehongo ibooto de o wange hange ipahaikahi de ahao o Isiraele ma nyawa yoihene abe o homoa ma nyawa gea manga ngi ko ikurutikaua masara tanu ka ma digi-digino dika!

¹⁷ Ho manga nyawa utu yosobo yotagi-tagi la ka idadi yatotailako o nyawa gea manga ngi o kiaka. De manga dodagi manga futu hange dika de yomahiadonoka manga kota-kotaika. Abe ona gea manga gogere o Gibeono ma kotaka de nagali o Kefira de o Beroto de o Kiriata-Jeari ma kota-kotaka.

¹⁸ De masara ko idadiua yabaatika onangika angamoi o Isiraele ma nyawa manga hohihira yomahiketehibehehongoka de o koboto ma demo, de gea yafetongo Ma Jou o Yawe ai romanga manga koboto ma demo-demoka, ho duru ko idadiua yawohangika manga behehongo gea. Ho o Isirale ma kokawaaha mata-mataika duru yahigutiuku / yahigurubungu manga hihiraika ma titi gea.

¹⁹ Masara manga hihira gea yomademo onangika ato, “Mimahilooa masara ngomi naa mimahiketehibehehongo de ona de mifetongo to ngone o Isiraele ma nyawa mia Jou o Yawe ai romanga. Ho ngone duru ko idadiuali hahikangela onangika!

²⁰ Abe nako hoka haparangi onangika de ahao nanga koboto duru inadaene ngoneuku, angamoi homahiketehibehehongo ibooto de ma nyawa gea.”

²¹ De ahao ma hihira gea ka yotemohi ato, “Ho abeika kiani hahigunoa la yowango dika.” De gea o Isiraele ma nyawa manga balu-baluhu yomatoomuino de yomakoketemo ma titi ona gea, ho ipahaino de manga putuhu naga la o Hewi ma nyawa gea yahikarajaanga. Ho ona gea yodadi o Isiraele ma nyawa mata-mata manga duduhunu, abe ma titi yatobaono-onoko manga akere de yatobaoto-oto manga hidaulu ma gota.

²² Ho o Yosua wabehehongo o Gibeono ma nyawa gea la yomarihimanga de una. De ona yoboaino de una wato, “Done ma titi o kia hiadono ngini nimieluku? Abe ngini nimahingahu niato nigogere o tonaka duru ma gurutika, masara tanu ti ngini nia ngi ko ikurutikaua!

²³ Ho naa to ngohi ahi Jou winilolae / winihikoboto nginika! Abe ma titi ma oraha naa de nidadioka mia duduhunu ma nyawa dika, de nia karajaanga la nitobaono-onoko mia akere de niatobaoto-oto mia hidaulu ma gota abe ahi Jou ai Tauoka ka ihikaika yapake.”

²⁴ De ona iwipaluhu ato, “Marai ngomi duru mihawana hiadono mia demo hokogea nginika. Angamoi naga o nyawa imihingahu de duru imihitararono abe ma dihiraino de nia Jou o Yawe wihuloko ai duduhunu o Musaika ma titi ma tonaka naa. Abe Una wato kiani o Musa winihidoaka ma tonaka naa mata-mata nginika, de abe ma tonaka naa ma nyawa bari kiani niahibinaaha mata-mataika la ko moiokaua. Ho gea hiadono to ngomi mia budi ma demo itagi nginika, angamoi duru mia hawana ilamokoholi done ka nimihibinaaha dika.

²⁵ Ho naa ngomi mimahidoaka ti ngini nia giamika la ngaro nia hininga hokokia dika niato imakataana de mia datoro masara gea ka miodafongo dika.”

²⁶ De o Yosua woihene manga demo ipahaino de ko wahigunoaua la o Isiraele ma nyawa yatoma onangika.

²⁷ Masara o wange gea dika de wahidadi o Gibeono ma nyawa o Isiraele ma nyawa manga duduhunu. Abe manga karajaanga kiani yatobaono-onoko manga akere de yatobaoto-oto manga hidaulu ma gota abe ka ihikaika yapake Ma Jou o Yawe ai huhuba ma ngioka. Ho o kiaka dika ma ngi abe ahao Ma Jou womangiiriki la ai huhuba ma ngi imanoa genangoka, hokogea manga karajaanga. De gea igoungu abe to ona manga karajaanga ka ihikaika hokogea dika ka hiadono ma oraha naa naga abe tohitulihuku ma ade-ade.