Yosua 5 - Ma Jou ai Demo-demo o Totobelohoka

O nyawa abe yogogere o Kanani ma tonakoka duru yakokimodongo o Isiraele ma nyawaika

¹ Ho ka de o Amori ma nyawa manga koano mata-mataika yoihene o akere ka idadi idudungu ma ade-ade abe hokokia Ma Jou o Yawe wohidudungu o Yorodani ma akere de duru yohawana. Yoihene hokogea Ma Jou wodiai la waduhunu o Isiraele ma nyawa ma oraha yomahihora to ona manga honongaino ho duru manga modongo ilamoko o Isiraele ma nyawaika hiadono yofafara. De hokogenangoo o nyawa manga kokoano mata-mataika abe yogogere o Kanani ma tonakoka yamodongo ka hiadono onangoo abe yogogere dai o gahi ma ngigorino. Ho ona mata-mataika ko iwa manga domoroini la ka idadi yahimanga o Isiraele ma nyawaika la yalawana.

Ma Jou wahuloko la o Isiraele ma nyawa yomahunali

² De ma oraha yowohama o Kanani ma tonakika gea de Ma Jou o Yawe wihibehehongo o Yosuaika wato, “Naa, Yosua adonoka ma oraha o Isiraele ma nau-nauru mata-mataika kiani yomakokihunakahi. Ho ngona nohiaturu la ngini nimahidiai o gakana o waja ma hakaruino la ena gea niapake niahihuna ona mata-mataika.”

³ Ho ka de hokogea Ma Jou o Yawe wihuloko de o Yosua wohiaturu la hiadono o huhuna ma gakana yawedono de yahuna manga nau-nauru. De ma ngi gea ihiromanga o Huhuna ma Kai ma Doomu abe nako to ona manga demo, o Gibea-Haaloto.

^4-6 De hokonaa ma titi hiadono o Yosua manga huhuna kiani wohiaturu. Abe ma oraha o Isiraele ma nyawa o Mesiiri ma tonaka ko yohupuahi de manga nau-nauru yomakokihunaka masara manga ngofa-ngofaka o nauru abe yomaboa manga dodagioka o tonaka ma kakaahaino ona ko yahunauahi. De o Isiraele ma nyawa manga dodagi manga taongo moruatino ma dekana hiadono manga nau-nauru mata-mataika abe ka idadi yososawaro o parangioka ma oraha yohupu, ona gea yokokihonengokau mangale ma titi ko iwihingounua Ma Jou o Yaweika. De hokogea kiani yohonenge de ahao manga gogianongoru ka idadi yowohama o Kanani ma tonakika abe duru ma dodihiraka wahibehehongo manga totoforaika wato o tonaka gea idadi to ona manga totoforauku manga tonaka abe genangoka ma joro duru ikutufuru ho kohangoe manga inomo genangoka. Masara to ona manga totofora abe yoluku yowohama o hibehehongo ma tonakika gea Ma Jou wato wahohowono onangika angamoi ko iwingakua Unangika ho ko yamakeuali manga hibehehongo ma tonaka gea.

⁷ Ho abe ona yohone-honengoka o tonaka ma kakaahaka to ona manga ngofa-ngofaka Ma Jou o Yawe wapaliara la ona yaturuuru manga dimo-dimono ho naa ona o Yosua wahuna. Abe ma oraha manga dodagiokahi de ona ko yomahunauahi, ho ma tonakino yowohama ipaha de ahao ona yakokihuna.

⁸ De gea yakokihuna ibooto de yoriidi yomahiaini genangoka ka hiadono manga huhuna ma nabo yaikokahi.

⁹ De ahao Ma Jou o Yawe wihingahu o Yosuaika, wato, “O wange naa de ti ngini nia maleke Ngohi tagorakoka abe initaulika ma titi o Mesiiri ma nyawa ko inihigunoaua nimahuna hoka Ngohi tinihibehehongoka. De ma titi o Mesiiri ma nyawa hiadono naa duru ma dekanino ngini ko nimahunakaua. Masara ma oraha naa ngini nianiikoli o huhuna hoka tinihibehehongoka la nimahitunguu nidadioka to Ngohi ahi nyawa. De nia maleke tagorakoka ho naa nimahuna ibooto de ko iwaka nginioka nia maleke.” De gea ma titi hiadono o Isiraele ma nyawa ihiromanga ma ngi gea Agorakoka, abe nako to ona manga demo gea o Gigala. De ka hiadono ma oraha naa abe ma ade-ade ihitulihuku de ma ngi gea ma romanga ko aturuuruahi, ho ka o Gigala dika.

¹⁰ De manga wange iata ipahaino o Gigala ma ngioka gea de adonoka o Totilakuru ma rame-rame ma tanggala abe manga taongo ma hungi de ma mede duru ihira de ma wange ngimoi de iatuku de adaene o Totilakuru ma tanggala. Ho gea o Isiraele ma nyawa manga Totilakuru ma rame-rame ihirame-rame o Gigaloka gea o Yeriko ma dolaka. Ma Jou waturuuru o Isiraele manga taongo ma hiaturu abe ma oraha o Mesiirino yohupu. Abe ona wahihupu de gea manga mede ma romanga o Abibi yadaene. De ma dihiraino o mede o Abibi gea o Isiraele ma nyawa yaetongo manga taongo ma mede iatuku nako o Abibi gea. Masara Ma Jou wato ka de ona wahihupu manga kangelaino de gea kiani idadi manga taongo ma hungioli waturuuruoli. Ho ngaro ma dihira o Abibi o mede iata masara idadioli o mede moi abe ka de o Mesiirino yohupu angamoi Ma Jou waetongo manga taongo ma hungioli. Ho kiani o Abibi ma mede gea ona naa yaetongo la ena o taongo ma mede duru ihira. Ho naa yowohama o Kanani ma tonakika de duru adaene manga taongo ma hungi abe o Abibi ma medeuku. De o Totilakuru ma dodihiraka o Mesiirokahi yogogere gea adaene o Abibi ma mede de ma wange ngimoi de iatuku. Ho naa Ma Jou duru wohiaturu itiai la hiadono ma oraha yowohama to Una ai Behehongo ma Tonakika de enangoo yadaene o Totilakuru ma tanggala abe o Abibi ma medeoka. Ho gea manga dekanino duru manga taongo moruatino ibooto abe o Mesiirino yohupuoka ka hiadono o Kanani ma tonakika yowohama.

O Hitararono ma hidogo

¹¹ O Totilakuru ma wange ipaha de ma dawangeino adonoka de duru o wange gea yaolomo o Kanani ma tonakino ma joro. Gea o gandumino abe yodiai o roti ko iwa ma ragi de ona utu yomaharongo ma hofoko ma gahumu.

¹² De duru o wange gea de o mana ko ipurarahokaua onanguku de genangoka de aino o Isiraele ma nyawa ko yaolomokaua o manaino. Ho de o taongo ma hungi gea de to ona manga inomo o Kanani ma tonakino ma hasili ho ka ihikaika enangoli dika yaolomo.

O Yosua yomakamake de o malaekata abe una gea Ma Jou o Yawe ai tentara manga hidimono

¹³ De o Yosua woiki womahitigi o Kanani ma nyawa manga kota o Yerikoika. De gea womalega ai himangika de wimake o nauru womatengo womaokoino ai himangoka de una gea wasoino ai humaranga ma doto arihononga. De ahao o Yosua womahitigi-tigika o naurika gea de wileha wato, “Ngona naa to ngomi mia dodiawo eko mia musu?”

¹⁴ De ma nauru gea wipaluhu o Yosuaika wato, “Ngohi naa ko ani dodiawoua de ko ani musua. Masara ngohi naa Ma Jou o Yawe ai tentara manga hidimono abe Una wohihidingoto nenangino.” Hokogea womahingahu o malaekata gea. Ka de o Yosua woihene o malaekata ai demo gea de womaponuku de ai horomati o malaekata ma himangoka ka hiadono ai pea itiki ma tonakuku. Hokogea o Yosua womahitipokouku. De ahao o Yosua wotemo o malaekatika wato, “Ahi baluhu, ngohi naa ahi hininga la ka ihikaika tileleani Ma Jou o Yawe ho ngona nohihingahu dika ngohino o kia dika noigo todiai de gea ngohi ahao tosanangi todiai.”

¹⁵ De o malaekata gea abe wahidimono Ma Jou o Yawe ai tentara wipaluhu o Yosuaika, wato, “Ngona kiani ani sandaala nahuputoka angamoi ma tonaka naa abe homakamake nenangoka o debi-debini ma tonaka.” Ka de gea woihene de o Yosua ai sandaala wahuputoka.