Yosua 1 - Ma Jou ai Demo-demo o Totobelohoka

Ma Jou o Yawe ai behehongo o Yosuaika

¹ Ma Jou o Yawe ai duduhunu, o Musa, wohonengoka de ahao to Musa ai duduhunu o Yosua, unangoli wituruuru. De o Yosua gea ai baba o Nuunu. De ka de una wodadi o Musa ai duruuru de Ma Jou o Yawe wihibehehongo unangika wato,

² “Yosua, abe naa ahi duduhunu o Musa wohonengoka ho ngonali nituruuru abe ngonali natagongo to una ai karajaanga. Ho ngona kiani ahi nyawa nahihira-hira nahingohama ma tonakika abe Ngohi tahidoaka o Isiraele ma nyawaika. Ho o Yorodani ma akere doka ma honongaika ngini nimahihora la nikokiwohama ma tonakika gea.

³ Abe ma dihira Ngohi tihibehehongo o Musaika tato ahao todiai, de naa ma oraha adonoka abe todiai la ngini niwohama. De naa ngonaikali tonihibehehongo abe ma tonaka gea mata-mataika tinihidoaka ngini o Isiraele ma nyawaika. Ho ka de o Kanani ma tonakika ngini niwohamoka de ahao ngaro o kiaika dika niboa ma tonakoka gea, ma, ena gea nginika tinihidoakoka.

⁴ De hokonaa tinihibatingi nia tonaka: daku o Negebe o tonaka ma kakaahaka de imahikauku ka hiadono dau o Libanono ma datekuku. De iloliti dinaiyeoli o wange ma hiwarino ka hiadono o Efaraata ma akere ma amoko abe enangoo ihidotadaene nia tonaka ma batingi. De ilolitoli imahikaoko hiadono dai o gahioko hiadono o Hete ma nyawa manga tonaka mata-mataika enangoo idadi ti ngini nia tonakoli.

⁵ Ho, Yosua, imulaenge ma oraha naa de ka hiadono ngona nohonenge de ngaro onagona dika abe inilawana masara ona de ahao ko yolakua. Abe imaketero hoka ma dihiraino Ngohi ka ihikaika tiniiki o Musa, hokogenangoo ma oraha naa de ngonali toniniiki. Ho ngona ngaro ufa nohawana abe Ngohi ahao toninoaika angamoi ko iwa moi ma oraha Ngohi ko ihiwa ngonaka de ko iwa ma oraha abe ko toniduhunua.” Hokogea Ma Jou ai behehongo o Yosuaika.

⁶ De ahao Ma Jou o Yawe wihigaro o Yosuaika wato, “Yosua, kiani nomaputuhu abe ngona de ani buturungoka de ani domoroinoka! De angamoi gea ngona abe ahao ahi nyawa nahihira-hira ka hiadono yomahitoonangoka ma tonaka gea abe ma dihira tahibehehongokau manga totoforaika tato tahidoaka onangika.

⁷ Ngona kiani nomaputuhu duru nagou-goungu abe ngona ka ihikaika de ani buturungoka hiadono duru de ani domoroinokaoo! Ho ngona kiani nohidodiai nohingounu ahi pareta de ahi behehongo mata-mataika abe tihidoakoka ahi duduhunu o Musaika de una wonihibehehongokali ngonaika. De ufa norehene arihonongaika la gea ngaro o kiaika dika noiki ma, ani karajaanga ka ihikaika de ma hasiloka.

⁸ De naga ngonaka ahi demo mata-mata abe ihitulihukuoka de tinihidoaka ngini o Isiraele ma nyawaika abe hohiromanga Ma Jou ai Pareta ma Buku. De kiani to ngonaoo ani demo o nyawaika ka ihikaika napake to Ngohi ahi demo-demo gea. Ho kiani ngona nomabasa de nomahihohininga o futu de o wange la ka ihikaika nohidemo to Ngohi ahi demo-demoino. Hokogea ma ngekomo nodiai la nohihingounu Ngohi Ma Jou o Yaweino hiadono mata-mata ngona nodiai imakiniiki de ahi demo-demoino. Nako hokogea ani wowangoka de ngona namake ma owa ma ngoe de mata-mata nodiai de ma hasiloka.”

⁹ “Ho naa ahi demo ngonaika tohigalioli tonihuloko, tato ‘Ngona, Yosua kiani nomaputuhu abe ngona de ani buturungoka de ani domoroinoka!’ Ho ngaro o kiaika dika nohimanga ma, ufa de o hawana inihifafara de ufa ani hininga ihuha angamoi Ngohi, Ma Jou o Yawe, to ngona ani Jou, naga toniniiki ka ihikaika ho ngaro o kiaika dika ngona ahao noiki ma Ngohi toniduhunu.” Hokogea Ma Jou o Yawe ai behehongo ma demo la wihiputurungu o Yosuaika.

O Yosua ai huhuloko ma hiaturu ai kokawaahaika

¹⁰ Ho gea o Yosua ai karajaanga womulaengoka wagoraka abe watoomuino o Isiraele ma nyawa manga dimo-dimono la wahingahu hokokia yomahidiai la yosobo.

¹¹ Ho wahuloko onangika wato, “Ngini o dimo-dimono kiani niatutumu ti ngini nia kokawaaha mata-mataika nia doomu homoi-homoiika. De niahingahu onangika hokonaa, niato, ‘Itigioka hosobo ho mata-mata abe ngini niperelu nimahidiai. Ho ngini kiani ma oraha naa nimahidiaioka hiadono nia bilaonoo ibooto angamoi hangeoka dika de ngone hosobo o Yorodani ma akerika la ahao ka idadi homahihora hotobongo doka ma honongaika! Naa adonoka ma oraha abe ngini ka idadi nimahitingini ma tonaka gea abe Ma Jou o Yawe, ti ngini nia Jou, winihidoakoka nginika.’ Hokogea ngini o dimo-dimono niahingahu nia nyawaika la ma oraha hosobo de ona mata-mataika kiani yomahidiaioka.” Hokogea o Yosua ai behehongo o Isiraele ma nyawaika abe kiani ona manga dimo-dimonoli yadofangoli manga doomu homoi-homoiika.

¹² Masara o Yosua ai hingahu o Isiraele manga dutu ma doomu hangeika abe o Rubene ma doomu, de o Gaada ma doomu, de o Yusupu ai totoforauku ma doomu abe yomahidutu o Manaseika, to ona manga hiaturu imakohowono de o Isiraele ma nyawa utu. Abe o doomu hangeika gea wahingahu wato,

¹³ “Marai ngini ka niohiningahi abe Ma Jou o Yawe ai duduhunu o Musa winihibehehongoka nginika, wato, ‘Ngini o Rubene ma nyawa, de o Gaada ma nyawa, de o Manase ma nyawa niamake ti ngini nia tonaka abe idateke o Yorodani ma akere ma honongaka naa. Ho duru nenangoka dika ngini nimagoo-gogere angamoi ti ngini nia tonaka niamakeoka duru nenangoka ho nia dodagino nimahiainoka angamoi Ma Jou o Yawe, ti ngini nia Jou, winihigunoa la ka idadi ma tonaka naa nimahitingini.’

¹⁴ Hokogea o Musa ai demo abe winihingahuoka ho ti ngini nia feka-fekata de nia ngofa-ngofaka de nia aewani ma duduono ka idadi mata-mata yomagoo-gogere nenangoka dika o Yorodani o wange ma hiwaroka ma honongaka. Masara ti ngini nia nau-nauru abe yoparangi yososawaro ona kiani iminiiki ngomi utu abe ma oraha mimahihora o Yorodani ma akere ma honongaika. O Kanani ma nyawa doka ona gea ahao inalawana ho ngini o Rubene, de o Gaada, de o Manase ma nyawa kiani niahigunoa nia nau-nauru abe yososawaro yoparangi la iminiiki. Ho ma oraha naa kiani yomahidiai la iti homoi-homoiika manga parangi ma dae yao ingodumu. De hokogea ti ngini nia nau-nauru yomahidiai angamoi ona imihihira-hira mia dodagioka ma oraha migila-gila doka o behehongo ma tonakika o Yorodani ma honongaka. Hokogea ngini ka idadi nia gogianongoru niaduhunu.

¹⁵ De ka ihikaika kiani niaduhunu nia gogianongoruika ka hiadono Ma Jou o Yawe wahidoaka o tonaka onangikali imaketero hoka nginioli winihidoakoka o hiaini ma tonaka nginika. De hokogea itiai angamoi ti ngini nia tonaka niamakeoka naangoka ho ka idadi niriidoka de nimatau nenangoka. De ma oraha adonoka o nyawa o Kanani ma tonakoka hahikalaka mata-mataika de ka idadi nia gogianongoruoo yomahitoonangoka manga tonaka abe Ma Jou o Yawe wahidoaka onangikaoo. Hokogea idadioka de ahao ti ngini nia nau-nauru abe yotobaduhu-duhunu o parangioka ka idadi yokokilio de yogogere o behehongo ma tonakoka nenanga abe o Yorodani ma akere ma honongaka naa abe idateke o wange ma hiwariha.” Hokogea o Yosua wahitararono manga dimo-dimonika ma titi manga tonaka ma hidoku ma hiaturu.

¹⁶ De o Isiraele ma nyawa manga dimo-dimono gea iwihigihene o Yosua ai demo mata-mata gea de yopaluhu unangika, ato, “Mia baluhu, ngaro ani behehongo ngomino gea idadi duru imaketero hoka ngona notemoka. Ngomi naa ahao midiai o kia dika ngona nomihuloko la midiai, de miloiki o kiaika dika nomihidingoto!

¹⁷ De abe imaketero hoka ma dihiraino ngomi wiwihingounu o Musaika de hokogenangoo ma oraha naa ngonaikali minihingounu. Ho ka ngonaika dika to ngomi mia nganganono, iti ngona nomahijou ka Ma Jou o Yaweika dika. De ngomi mininiata la Una woniniiki ngona abe imaketero hoka ma dihira nanga hihira o Musa winiiki.

¹⁸ De mia baluhu, hokonaa minihibehehongo ngonaika, abe ngaro onagona dika inilawana ngonaika ma titi o kia dika nahuloko, ngomi abe miahihira onangika ko miahigunoaua la ona inilawana ngonaika. Ho onagona dika abe ani demo ko inihigihenua ngaro o kia dika nahuloko yodiai ma ko yodiaiua, de ona gea ahao ngomi miahohowono ka hiadono yohonenge. Iti ngona o Yosua, de ani buturungoka de ani domoroinoka!” Hokogea o Isiraele ma nyawa manga dimo-dimono manga behehongo o Yosuaika.