Yesaya 56 - Ma Jou ai Demo-demo o Totobelohoka

Pasala 56 ko atailakouahi Ma Jou ai hiowa wahidoaka o nyawa mata-mataika

¹ Ma Jou o Yawe winihingahu wato, “Ngini kiani nia wowangoino de niao ma totiai de nitobadiai o datoro ma rorahai dika, angamoi ko itedekanokaua de Ngohi toboa la tiniduhunu nia kangelaino, de ma oraha gea de ahi totiai tahimatoko o nyawa-nyawaika.

² Ho ona abe ihidodiai yaniiki ahi demo naa, ona ahao manga hiningaka yososanangi. Abe ona ka ihikaika yatobahingounu ahi demoino ho o Hiaini ma wangeoka de ko yatilakurua ho yoluku yokarajaanga ma wangeoka gea. De ona yomatumungu la ufa o datoro ma dorou yodiai. Ho ona gea abe manga hininga isosanangi.”

³ “De to Ngohi ahi hiowa ka idadi o nyawa onagona dika yamake iti ihitobanii-niiki Ngohino. Ho ngaro o homoa ma nyawa masara ufa yomatemo ato, ‘Ou, ngohi naa Ma Jou duru ko idadiua wohidafongo.’ De ngaro o nyawa abe utu yaetongo onangika ato duru ko kia-kiaua adaene angamoi manga ngofaka ko idadiua yomamake, masara onangoo ka idadi yamake o hiowa Ngohioka de aino.

⁴ Angamoi hokonaa Ngohi o Yawe ahi demo ma titi o nyawa gea, tato, Ngaro ona abe yamao ko kia-kiaua yadaene angamoi manga ngofaka ko iwa, masara nako ona gea yanii-niiki ahi behehongo ma demoika de gea manga utumu ahao tahidoaka onangika. Abe iti ona naga manga hingounu ahi paretaika ma titi o Hiaini ma wange ma hiaturu, de abe manga datorino yodiai abe ihihisanangi Ngohino, de yatobaniiki ahi behehongo ma demoika, de onangoo ahao yamake manga utumu!

⁵ Abe gea to Ngohi ahi tauoka de tagorakiye to ona manga roma-romanga la idadi o horomati ma amoko onangika. De ngaro hoka ma dihiraino de ona tanu ka idadi yomamake manga ngofaka, masara ka nenangohi manga horomati duru ilamokiye abe tahidoaka onangika. Abe manga romanga ma gurutiye gea tahidoaka la duru ko ihihangua ka hiado-adonika.”

⁶ “De abe ona ko o Yahudi ma nyawaua masara ihitobaniiki Ngohino de ihileleani, de yodora Ngohi o Yawe ahi romanga, onangika gea ka idadi tahiowa. Abe ona ko yatilakurua o Hiaini ma wange ma hiaturu masara yodafongoka to Ngohi ahi behehongo ma demoika.

⁷ De onangoo gea ka idadi yoboaino ahi loku ma debi-debinino o Yerusaleeme ma kotaka la yomahuba-huba Ngohino de gea tasanangi dika onangika. Abe ona ahao tadiai la manga hininga aomanga de o garago ma oraha yoboa ahi Tauino abe genangoka o nyawa yomaniata Ngohino. De ngaro manga huhuba de manga hidoaka abe o huhuba ma ngioka ihidoa-doaka masara enangoo ka idadi todafongo, angamoi to Ngohi ahi Tau gea ihiromanga o tau abe o dunia ma nyawa mata-mataika ka idadi yomaniata genangoka.

⁸ De Ngohi ka idadi tadafongo o homoa ma nyawa angamoi naga ahi behehongo ma demo moi tomahibehehongoka tato, ‘Nagahi o nyawa utu ahao tatoomuino de tahidogo onangika abe tatoomuinoka.’ Angamoi ihira-hira kiani tatoomuinoli o Isiraele ma nyawa abe yakokabarihika o tonaka utuika, de gea ipahaino de nagahi o nyawa utu tato tatoomuino Ngohino. De hokogea Ngohi naa o Yawe duru Tokokurutiye tomahingahu ahi hininga ma hidee.”

Ma Jou ai hitiari ma demo o Isiraele manga hohidimonika

⁹ “De naa Ngohi o Yawe tiniahoko ngini o homoa ma nyawa manga kokoano de tinihiketero ngini hoka o aewani o fuhuku ma fonganoka. De gea tiniahoko tato, ‘Niaino ngini o fuhuku ma aewani abe nimanoa o fonganoka! Niaino la ahi nyawa naa niangino de niaolomo!’

¹⁰ Angamoi Ngohi o Yawe ahi nyawa manga hohidimono abe yodadioka to ona manga gogoana, ma hohidimono gea yorafi-rafioka ho ko yamaokaua o bodito iboaino. Ona gea yomaketero hoka o kaho imou-mouoka ho duru ko iroa-roangua. Ona yosanangi yomaidu-idu dika hiadono yakiookoka de yotobabuluhara.

¹¹ De to ona manga horoodo duru ilamoko abe hoka o kaholi ma horoodo, de manga hafini ko itoa-toakua. De onangoo tahiketero hoka o domba ma gogoana abe manga sosawaro duru ko iwa hiadono ona homoi-homoi manga mau yahitihira, ho yomalingiri manga boriutumu homoi-homoiika.

¹² De ona gea yomahikagaro ato, ‘Niaino la o rame-rame moi hodiai! Abeika o angguru ma teongo ma gohaka tonalingiri, de o daluku ka idadi homaijaino, la gea hokere hiadono inadalukoka. De hiadono itebinoli ka idadi nanga rame-rame igila-gila dika, de marai nanga sosanangi mata-mata ingodumu ngoneoka!’ Hokogea ahi nyawa manga hohidimono manga hininga, ho gea ena ma titi hiadono taahoko o homoa ma nyawa manga koano la yoboaino de yabaataika ahi nyawaika.”