Yesaya 40 - Ma Jou ai Demo-demo o Totobelohoka

40:1-31 ko atailakouahi Ma Jou o Yawe wolio o Yerusaleemino

¹ De hokonaa ti ngini nia Jou wotemo, “Ngini kiani nialaru to Ngohi ahi nyawaika!

² De kiani niabole-bole o Yerusaleeme ma nyawa manga hiningaika de niahingahu abe o nyawa ko yaparangiokaua angamoi ahi nyawa manga hohowono yawedonoka. Abe Ngohi tahohowonoka ma titi to ona manga howo-howono Ngohino ho gea manga howono ma hibalaha ko iwaka angamoi taofioka. Hokogea ma lalaru ma demo abe ngini nitemo ahi nyawaika.”

³ De ahao naga ma demo itemo hokonaa, “Abeika ngini nitotoihene! Angamoi ngohi toihene womatengo ai ilingi abe waamokiye wato, ‘Ngini kiani o ngekomo nihidiai o tonaka ma kakaahaka angamoi nia Jou o Yawe ahao woboa genangino. Ho o tonaka ma homoaino gea de kiani o ngekomo nidiai duru irahai la genangino to ngone nanga Jou ka idadi woboa!

⁴ Abe nako ma tonaka idolauku gea kiani nihitouniye hiadono itiaiika. De abe ipukuiye gea niokarajaanga hiadono ka itiaiika dika ma ngekomo. Nako ijiko-jiko gea nihirikotika, de nako ipoponyira kiani nidiai la hatoli inouhu.

⁵ De abe ma oraha niwihidiaioka ai ngekomo de ipahaino ahao Ma Jou o Yawe womahimatoko to Una ai medebini ma dararono la o nyawa mata-mata ka yomataimakeika. De gea ahao kiani idadi angamoi gea abe Ma Jou o Yawe wotemoka!’”

⁶ De ahao naga toihene ma ilingi moi itemo ato, “Ngona naamo-amokiye!” De gea ngohi topaluhu tato, “Ka o kia taamo-amokiye?” De ahao ma ilingi itemoli ato, “O nyawa mata-mata ka yomakadaene dika hoka o ruruubuoli, de manga behehongo ma demo mata-mata hoka o fuhuku ma huri o ruruubuoka.

⁷ Angamoi ma ruruubu gea ko yotedekanuahi de itoolengoka, de ma huri-huri genangoo itaiti yomaai abe ma oraha Ma Jou o Yawe wohidingoto to Una ai hidaloko genangika. De o nyawa mata-mata onangoo ko yatedekanuahi de yopahaka ho yomaketero dika hoka ma ruruubuoli.

⁸ Ho ma ruruubu imoraa, de ma huri-huri yomaai, masara nanga Jou ai Demo-demo gea itongohono de itobagou-goungu ka hiado-adonika.” Hokogea ma ilingi ihihuloko ngohino la taamo-amokiye o nyawaika.

⁹ De ahao naga ma demo toihene abe ihidumutu o Yerusaleeme ma nyawaika ato, “Ngini abe nigogere o Yerusaleemoka ka idadi nihiabari o abari ma rorahai! Ho kiani nidoaiye o loku ma gurutiye de nimahiadoniyeoka ma pukuoka de ngini nipoa-poaka ma abari o nyawaika! De gea ufa nihawana, masara ka idadi niamo-amokiye o Yehuda ma tonaka ma kapo-kapongika niato, ‘Naa ti ngini nia Jou woboaino!

¹⁰ De abeika, Ma Jou o Yawe duru Wokokurutiye naga woboaino de ai bobuturungu, abe Una ahao wonahipareta de ai kuaha. De abeika to Una ai lolaku ma hadia naga de de Una, abe Una wahihoheoka ai nyawa to ona manga kangelaino ho ona yomakiniiki Unangoka de yodadioka to Una ai hadia.

¹¹ De Una watobapaliara ai nyawaika gea imaketero hoka o domba ma gogoanoli watobagoana ai domba ma duduono. Abe ma domba ma ngofaka wagorakiye de watotiri ai aluino, de ma domba ma mayo Una wahihira-hira ma ngekomino.’”

Moioo de ko iwa abe yomaketero hoka Ma Jou o Yawe

¹² De naa abeika homafikirohi hokokia ma amoko Ma Jou o Yawe ai kuaha, de abe ka Unangohi duru wokokurutiye! Ho tinileha, done onagonali ka idadi yaso o gahi mata-mataika ai giama ma hoatoka? Koua, ka Una dika wakunu waso! De done onagonali de manga giama ka akunu yatuga ma dihanga ma ngoata? De sarakia, naga utu abe ka idadi ma dunia yakilo la ihioriki ma dubuho, eko ka idadi o kikilo yapake la ihioriki o loku-loku mata-mata ma dubuho? Koua, ka Una dika wakunu!

¹³ De sarakia naga moi abe ka idadi yataoko Ma Jou o Yawe ai hininga la hiadono ka yakunu iwidotoko Unangika?

¹⁴ Eko sarakia, ma moiokau Ma Jou o Yawe waleha utuika mangale ma titi ai tobahioriki ko ingodumua? Koua! Done onagona iwihingahu moi Unangika la ai sosawaro idogo? Duru ko iwa!

¹⁵ Abeika, ngaro o nyawa mata-mata o dunia ma amokika hohidotoomuino masara nako ona de Una de ona gea ko kia-kiaua. Abe ona manga kuaha de manga sosawaro imaketero hoka o akere o dubuku moi dika o guguitoka, eko o tonaka ma kuhuhunu ma mui moi dika imanoa o kikiloka, angamoi duru ko kia-kiaua adaene. Masara nako Una gea ko ai buturungu, abe Una ka idadi o nuu-nuuhu wagorakiye de duru ko wamaoua to ena ma dubuho.

¹⁶ De igoungu o Libanono ma fongana duru aomanga de o gota ma ago-agomo de o aewani ma ngoe. Masara ngaro o nyawa yakokitolanga ma gota mata-mataika de yatoma to ena ma aewani la ato yomahihuba Unangika, masara gea tanu ko adonikaua angamoi nanga Jou kiani o horomati duru kohaamoko hohidoaka Unangika.

¹⁷ De ngaro o dunia ma nyawa mata-mataika masara Una waetongo ona wato parahaja dika, abe ona ko kia-kiaua to Una ai himangoka.

¹⁸ Ho naa tonaleha, ka onagonaika ka idadi hahiketero de Ma Jou? Eko ma hapa o kia ka idadi hoduru la ma rupa hoka Unangoli ai rupa?

¹⁹ Bote Una womaketero hoka o pangao moi abe o nyawa yodiai o tabaagaino de ahao wohilape de o gurasi de wohibilere de o gule o haakaino?

²⁰ Masara nako ona yohu-huha gea yairiki o gota moi abe duru itongohono de ahao yahikarajaanga o nauru womatengo abe wotobadiai o popangao o gotaino la gea wodiai o pangao ma rahai abe ko igapangua iotaka to ena ma ngioka de auku. Ho sarakia, ka idadi hotemo hato Ma Jou womaketero dika hoka ma pangao gea? Koua! Duru imakohowono!

²¹ Ho done ngini ko niihenuahi de ko niataokuahi? Marai ti ngini nia ngauku ajumuoka la ufa niihene to Ma Jou ai Demo-demo ma dodihirainohi. Abe ngaro duru ma dodihiraka ma oraha wotobatulaada mata-mataika masara to Una ai demo nagau ma oraha gea!

²² De ai demoino de itararonoka gea Ma Jou abe wogogere ai kaderaka o dunia ma lokuiye la wohipareta mata-mataika. De ngone o nyawa naa o dunia ma lokuino Una wonalegauku de ngone homaketero o kabotara ma hohumuduru! De Una gea abe ka wakunu ma dihanga wataurika la idadi hoka to Una ai tau ma dadaduhu o ngoerino.

²³ De Una gea abe wahitipokouku o kokoano de o popareta ma nyawa hiadono to ona manga kuaha ko kia-kiaua.

²⁴ Abe nako hahiketero o nyawa manga hihira gea de o datomo, gea ahao yodatomoka de ngade-ngade ko iwahi ma ngutuku. Ahao iwangoiye de Ma Jou Una wataloko de ai hidaloko de yotoolengoka, de ahao ahaili ma hoanika ho ko iwaka. De hokogenangoo o kokoano de o popareta ma nyawa abe manga wowango ma karajaanga tanu ko kia-kiauahi de ona yahihangoka.

²⁵ De Una abe duru Wotebi-tebini winileha nginika wato, “Ngini nihilega Ngohino de done niato Ngohi tomakadaene hoka onagonali? Ka onagona yomateroino de Ngohi?” Hokogea ti ngini nia Jou winileha nginika.

²⁶ Abeika ngini niolega daku ma dihangiye. Kiani niolegaiye de nimaleha ka onagona yotulaada ma dihanga ma dola mata-mataika gea. Ka Una dika abe wohiaturu ma muru-murumu la o futu-futu de imakiniiki ihapongo, de wohiromanga amomoiika la ma murumu homoi-homoi naga de ma romangoka. De mangale ma titi to Una ai buturungu duru ingodu-ngodumu ho ma murumu gea ka ihikaika naga, ko moiua ihihanga. Hokonaa Ma Jou ai uru ma dodofanga o Yesaya ai higaro ma demo abe Ma Jou wihiakunu la wahingahu o Isiraele ma nyawaika ma oraha ona manga dekanoka o Babele ma tonakoka. Genangoka yogogere mangale ma dihira yogogerohi manga tonakoka de yomahijou o Kanani ma nyawa manga popangaoika ho kiani onangika Ma Jou wahohowono. De manga hohowono gea Ma Jou wahigunoa la o Babele ma nyawa yaparangi o Isiraele ma nyawaika hiadono yahikala de ko manga ngoe yao to ona manga tonaka o Babelika.

O Hitararono ma hidogo O Yesaya ai higaro ma demo o Isiraele ma nyawaika manga huha ma goronaka

²⁷ De ngaro hokogea ma hohailoa Ma Jou ai karajaanga masara ngini o Yakubu ai totoforauku, ngini o Isiraele ma nyawa niwihigurubungu niato, “Ma Jou o Yawe Una ko wohilegaikaua, de Una ko wopusingua ma titi to ngohi ahi kangela ho ko wohiduhunua!” Masara done sarakia ti ngini nia demo gea?

²⁸ Done ngini ko nihiorikuahi de ko niihenuahi abe Ma Jou o Yawe Una nanga Jou abe ko iwa ai baha ho ka hiado-adonika Una nagahi. Una gea abe wotulaada o dunia de ma dola mata-mataika! Ho Una duru ko idadiua iwibole-bole de ko iwikiookua. De ai sosawaro ko iwa ma batingi ho ngone o nyawa ko hadonikaua.

²⁹ De ona abe yaboleoka de manga buturungu iowaha, onangika Ma Jou wahidoaka o buturungu de wohidogo o magawe.

³⁰ De ngaro o nyawa ko yaperekiuahi masara ka idadi yalolamaana de manga pea ifefele. De hongoli ngaro o goduuru abe manga roehe itotoomu masara onangoo ka idadi yaboleoka hiadono yolebo-leboto de yopeleke o hakaruika.

³¹ Masara onagona dika yomahinganono Ma Jou o Yaweika ona ahao yamake manga buturungu ma hungi Unangoka. De ona ka dau de yomahiburahiye de yotagi-tagi de ko yaboleua. De hongoli ona ka idadi yomapopaata de manga badanga ko yolamaanua. De nako hahiketero ona de o koloba, gea ona ka idadi yohoho duru ikurutiye ma titi ma gafuufu ma bobuturungu. De hokogea Una wahiputurungu onangika abe yomahinganono ai duduhunika.