Yeremia 25 - Ma Jou ai Demo-demo o Totobelohoka

Ma Jou wato wahohowono o Isiraele ma nyawa o taongo moritumidi ma dekana de ahao o Babele ma nyawaoo wahohowono

¹¹ Ma Jou o Yawe naga ai hingahu o Isiraele ma nyawaika abe yogogere o Yerusaleeme ma kotaka de o Yehuda ma tonaka ma amokika. De o Yeremia Ma Jou ai hingahu gea wadofanga onangika, wato, “O Isiraele ma tonaka nenanga ahao idadi imaketero abe hoka o tonaka ma kakaaha abe o nyawa ikuranga yogogere nenangoka. De o Isiraele ma nyawa de o nyawa mata-mata abe manga tonaka imakadateke de o Isiraele ma tonaka naa, ona mata-mata manga taongo moritumidino ma dekana iwikokileleani o koano abe o Babele ma tonakoka wogogere.

¹² Abe ka de o Babele ma nyawa yataokoka o Isiraele ma nyawa de Ngohi tomulaenge manga taongo taetongo ka hiadono ma oraha yahikangela ma baha de gea adonoka manga taongo moritumidi ma dekana. De ma oraha gea de ahao Ngohi, Ma Jou o Yawe, tahohowono o Babele ma nyawaikali ka ma moi de manga koano. De o Babele ma nyawa onangoo gea kiani tahohowono mangale ma titi to ona manga howono duru kohangoe o nyawa utuika. De to ona manga tonakoli ahao imadadi o tonaka ma kakaaha ka hiado-adonika.

¹³ Abe o hohowono ma kangela mata-mata Ngohi tohibehehongoka ahao tohidagi o Babele ma nyawa manga tonakika ka hiadono ingodumu ahi hohowono onangika. Abe ahi hohowono ma demo gea o Yeremia wadofangoka o tonaka mata-mataika de wohitulihukuoka o bukuoka naa. De o kangela abe o nyawa utu yamake o Babele ma nyawaino, de ahao ma kokangela mata-mata gea Ngohi, Ma Jou, tohigilio o Babele ma nyawaikali.

¹⁴ Abe Ngohi tohiaturu la naga ma oraha o kokoano o tonaka ma ngoeino ahao yahikangela o Babele ma nyawaika. De abe yahikangela gea ma titi yahidadi to onangoli manga huhuloko abe yahikarajaanga de o karajaanga ma dubuho duru imaketero hoka to Ngohi ahi nyawa yahidadi manga huhuloko. Hokogea o Babele ma nyawa tahohowono de o kokangela ma dubuho la duru imakadaene de o kokangela ma dubuho abe ona yohira ihiboa to Ngohi ahi nyawaika.” Hokogea Ma Jou ai demo abe wihingahu ai uru ma dodofanga o Yeremiaika.