Yeremia 20 - Ma Jou ai Demo-demo o Totobelohoka

Ma Jou ai hidemo abe ai romanga o Pasuru kiani wihohowono

¹ De naga womatengo o Isiraele ma nyawa manga hidemo Ma Jouika, ai romanga o Pasuru, abe ai baba o Imere. De o Pasuru gea una abe wodadi manga haeke onangika abe yotobaleleani Ma Jou o Yawe ai Tauoka. De ma moiuku o Yeremia woboa de una wowohama Ma Jou ai Tau ma loaino de naga Ma Jou ai hingahu abe wadofanga onangika abe naga genangoka. De ma oraha gea o Pasuru unangoo naga de woihene Ma Jou ai hingahu o Yeremia ai uruino gea. Masara una duru ko wosanangiua o Yeremia ai dodofanga ma demoika gea abe Ma Jouino.

² Ho o Pasuru gea wohiaturu la kiani o Yeremia iwitaoko de iwipoha-poha de ahao o Yeremia ai lou ihidopilatuku de o gota Ma Jou ai Tau ma ngoranoka abe ma romanga o Benyamini ma Ngorana.

³ De ma dawangeino o Pasuru o Yeremia gea wihihupu ai bobilatuino de o Yeremia wihingahu unangika wato, “Pasuru, naa Ma Jou o Yawe ani romanga waturuuru abe wonihiromangoli, ‘Iwilufungoka de o hitomomono ma hawana.’

⁴ Abe hokonaa Ma Jou o Yawe ai demo ngonaika, ‘Ngona o Pasuru ani romanga hokogea Ngohi taturuuru angamoi ngona de ani dodiawo mata-mata duru nia huha ilamokoholi abe ma oraha nia kangela ma hohowono inidaene ngini mata-mataika. De ngona ma hirete ani domomono ma hawana inidaene ma titi ngona de ani lako hinooto namake ani dodiawo nia musu yakokitoma de o humaranga. De ma oraha gea o Isiraele ma nyawa mata-mata abe o Yehuda ma tonakoka yogogere Ngohi tahidoaka o Babele ma nyawa manga koano ai giamika. De ona manga ngoe yatoma de o humaranga de manga hou yakokiao o Babele ma tonakika.’”

⁵ “De o kangela utuohi naga, abe o Yerusaleeme ma kota ma kaya tahidoaka nia musuika, de nia hasili mata-mata enangoo tahidoaka onangika. De nia kokoano o Yehuda ma tonakoka manga kiahonanga ihali-hali, ngaro ma dihiraino ka hiadono ma oraha naa yatoomuino, masara enangoo nia musu yomagora. De ena mata-mata yao o Babele ma tonakika.

⁶ De ngona o Pasuru de ona mata-mata ani tauoka initaokoka de iniao o Babele ma tonakika de ngona ahao nohonenge de inilungunu genangoka, de ngaro ani dodiawo utu ma hokogea yadaene onangikaoo. De hokogea idadi angamoi ngona ma dihira naelu-eluku nahibehehongo to Ngohi ahi nyawaika nato bari ahi hohowono ma hingahu ko kia-kiaua abe itorou idadi masara nato de ahao idadi irahai dika. Hokogea nahingahu onangika de ngona nato ani ngeluku ma demo gea Ngohi Ma Jouoka de aino hiadono nadofanga onangika. Masara ko nagoungua angamoi ani lalaru ma demo gea duru to ngona ani hiningaino dika.” Hokogea o Yeremia wadofanga Ma Jou o Yawe ai hohowono ma demo o Pasurika.