Ruutu 3 - Ma Jou ai Demo-demo o Totobelohoka

O ngo Ruutu monganono o Boasa ai doraka de aino womibangu la womihihupu ami kangelaino

¹ De ipahaino abe o wange moiukuoli o ngo Naomi momitemo o ngo Ruutika mato, “Ahi ngofaka, sarakia tonihidailako la to ngonaoo ani tau naga? Ngohi duru toigo la naga ani dodiawo, abe una ahao wonihidailako ani perelu mata-mata, de ngini nigogere nisosanangi.

² Abeika, o Boasa gea abe naa ma duruino nanii-niiki to una ai duduhunu o ngo-ngofeka. Ngona nohioriki e? Abe ma titi una nanga dutu adaene gea tonihingahuoka e? Ho una ka idadi wonaduhunu la hiadono ani perelu gea ngona namake. De abeika, ngohi tihioriki abe o futu naa o Boasa ai gandumu wataloko ai gandumu ma rorero ma ngioka.

³ Ho ngohi tato ngona hokonaa kiani nodiai, noiki nomaohiki de ahao napake o minya abe ma bounu ma rorahai de ani pakeanga abe ka enangohi irahai gea ena nomahinoauku. Hokogea nomahidiai ibooto de ahao ngade-ngade ifufutu de noiki ai gandumu ma rorero ma ngiika. Naika de ufa o nyawa inihioriki masara nomagoo-gogere ma fufutuoka la ufa o nyawa inimake. De nodamaa hiadono nimake o Boasa gea wolomo de wokere ibooto de womahidiai womaidu.

⁴ De duru nigoana la nihioriki o kiaka womaidu. De nako womaiduoka de o nyawa utu ko moi-moiokaua de ahao ngona noiki unangika. De hokonaa nohitunguu de ani horomati o Boasika abe noigo nomahitatoko unangika. Ka de naika de ngona ahao ai ngoere napaa ai louoka de genangiha nomaiduoka. Una ahao ko wataokua abe ngona nodiai ihowono unangika abe ahao ka de wonihioriki de una wonihingahu ngonaika abe hokokia ahao kiani ngona nodiai.” Hokogea o ngo Naomi ami duduhunu ma demo ma owa ngomi hunungu o ngo Ruutika.

⁵ De o ngo Ruutu mosanangi maniiki ami demo gea mato, “Ngohi ahao duru taniiki de todiai abe hoka nohihibehehongoka.”

⁶ Hokogea ami hininga ho ka de momahidiai ibooto de moiki o Boasa ai gandumu ma rorero ma ngiika de modiai duru imaketero hoka ngomi hunungu momidotokoka.

⁷ De muna o Boasa migoana ka hiadono mimake wolomo de wokere ibooto de ai hininga isanangioka. De ahao woiki o gandumika abe atalokoka de genangoka abe ai gandumu atouniye ma datekoka womaiduoka. Hokogea mimake o Boasa womaiduoka de ahao o ngo Ruutu maika de momabole-bole unangika ka hiadono ngaro ami karaaha ma ko woihenua. De ahao mapaa ai ngoere ai louoka de genangiha ai louino momatukurino momaiduoka.

⁸ De o futu goronaika de o Boasa womatodokana ma oraha womaleloro de womimao. Ho womomiki de womimake naga o ngofeka momaidu ai louoka.

⁹ De womihidodokana wato, “Ngona naa o ngo kia?” De muna mipaluhu unangika mato, “Ngohi naa ani gilaongo o ngo Ruutu. De ngohi toboa ngonaino naa la tomahitatoko ngonaika. Ngohi ani dutu ngoi fao ho toigo la ngona nohibangu ahi kangelaino.” Hokogea o ngo Ruutu momahingahu.

¹⁰ Ka de ami demo gea woihene de o Boasa duru de ai garago wato, “Ngaro Ma Jou o Yawe wonihiowa ngonaika ahi gianongoru! Ma dihira de tonihioriki abe ani hininga ma igo nomahidutu ngomino masara naa ka utuohi ngona nodiai itiai la nomahitunguu ani dora ngomino abe noigo nomahidutu ngomino! Ngona ka idadi nomamake ani rokata ka o goohi de ngaro una o kaya ma nyawa eko ko wokayaua ma iti ngona niiriki. Masara abeika ngohi ko o gooua de noboa ngohino de ani horomati ma amoko.

¹¹ Ho naa, gianongoru, ngaro ufa nohawana. De o kia dika ngona nogahoko todiai, gea mata-mataika ahao ngohi todiai. Ko moiua o Beteleheeme ma dimo-dimonino abe ahao inihiade-ade ato ngona nahowono noboa hokonaa angamoi ona mata-mata inihioriki abe ngona o ngofeka abe ani wowango ma datoro irahai.” Hokogea o Boasa ai horomati ma demo o ngo Ruutika.

¹² De ahao una wogila-gila womihibehehongo ai duduhunu munangika, wato, “De ngona nagoungu ngohi naa ani dutu adaene abe ahi tagongo naga ngonaika la toniduhunu masara naga womatengoli abe nako una de ngohi ka unangohi de ani rokata itigika ai gianongoru adaene.

¹³ Masara ngaro ufa nolio o futu naa, ka idadi ngona nenangoka dika nomaidu hiadono ngade-ngade itebini de ahao nolio. De nako una ahi gianongoru gea, ahao o ngorumino de ahao titutumu unangika la hohioriki nako una woigo wodadi ai dutuika o bobangu la woniduhunu. Abe nako una wato ai tagongo ngona ai dutuika gea wale, gea ahao una wodadi ani bobangu. Masara nako una woluku wodadi ai dutuika o bobangu de ahao gea ngohi tonihibehehongo ngonaika tonibangu abe tonihidadi to ngohi ngohi fekata. Ma Jou o Yawe wowango-wango ho Una wohihioriki abe ngohi tagou-goungu tonihibehehongo ngonaika naa.” Hokogea o Boasa womihibehehongo o ngo Ruutika.

¹⁴ Ho o ngo Ruutu momaidu o Boasa ai louiha hiadono ngade-ngade itebini de ahao momomiki la ufa o nyawa utu imihioriki muna o ngo kia. Abe o Boasa ai hitiari ma demo o ngo Ruutika, wato, “Iti ufa duru itebinoka de ahao nolio done o nyawa ihioriki naga o ngofeka moboa o futuoka ahi gandumu ma rorero ma ngiino naa.”

¹⁵ Ho ngade-ngade itebini de ko mosobouahi de o Boasa womihulokoli o ngo Ruutika wato, “Gianongoru, ani ngoere naoino de narefeika.” Ho muna ami ngoere marefe de o Boasa wogopoa o gandumu ma bunu-bunuhu ngade-ngade o kilo monaoko ami ngoeruku de ahao wohiluluino de womihitai o ngo Ruutu ami poretiha.

¹⁶ Ho o ngo Ruutu molio ngomi hunungika de ahao o ngo Naomi gea momileha munangika, mato, “Ho, ahi ngofaka, sarakia idadi o futuika?” De o ngo Ruutu momiade-ade mata-mata abe idadioka de hokokia o Boasa womihibehehongo munangika.

¹⁷ De mato, “Abeika o gandumu ma amoko naa abe wonahidoaka ngoneino de gea de ai sanangioka wotemo ngohino wato, ‘Ngohi toigo la nako nolio ngoni hunungika de ufa nomahomoa.’”

¹⁸ Ka de moihene gea de o ngo Naomi motemo mato, “Ahi ngofaka, hodamaa horiidi dika hiadono hohioriki abe hokokia ai behehongo ma hasili. Angamoi o Boasa gea marai duru ko wanoaikaua abe naa idadioka. Ho o wange naa ko woriidua ka hiadono ai tagongo wohiaturu mata-mata ibooto.” Hokogea o ngo Naomi ami demo ma owa ngomi hunungika.