Roma 12 - Ma Jou ai Demo-demo o Totobelohoka

Ma Jou ai hiakunu abe wonahidoaka ngone ai nyawaino

¹ Ahi gogianongoru, mangale ma titi Ma Jou ai hininga ma dora gea abe kohaamoko ngoneuku, ho naa ngohi duru tinihigaro nginika la nia badanga homoi-homoi nimahidoaka Ma Jouika la niwango ka Unangika dika. Abe ngini nia badanga nimahidadi hoka o huhuba moi Unangika, de gea ufa hoka o huhuba abe ihonengoka masara abe ka iwangohi la nia wowangoino de ka idadi niwihisanangi Unangika. Ho nia wowangoino gea de kiani niwango nitebini to Una ai himangoka la nia huhuba abe nia wowangoino, gea ka idadi duru iwihisanangi Unangika. De abe nia wowango nimahidoaka Unangika, gea duru niataana abe hokokia itiai ngone ai nyawa hileleani de homahuba-huba Unangika.

² De ngini ufa nimaaduru abe hoka o dunia ma nyawali manga datoro yotobadiai, masara koaho nimahigunoa la nia wowango Ma Jou waturuuruoka. Abe Una ka idadi waturuuru nia hininga homoi-homoi de o hininga ma hungioli la hiadono ngini niakunu niataana Ma Jou ai mauika. De gea to Una ai mau la ngini nihioriki ma datoro o kia abe ma rorahai, de abe o kia iwihisanangi Ma Jouika, de gea ahao ti ngini nia wowango duru itiai to Una ai himangoka.

³ De mangale ma titi Ma Jou wohihidoaka ngohino ahi tagongo ma owa naa abe o Abari ma Rorahai tatobahingahu-ngahu o nyawaika, ho naga ahi kuaha Unangoka de aino la tinihitiari moi nginika. Abe ngini homoi-homoi kiani nihidodiai nimafikiri ma titi nia borihiakunu abe niamakeoka Unangoka de aino. De gea nia hiakunu winihikokodoku ma titi niwingakuoka Unangika, ho gea duru ko ihititiua ti ngini ma hirete nia wowangoka. Ho mangale ma titi nia hiakunu gea Unangoka de aino iboa, ho iti ufa ka nimagorakiyeholi masara koaho nimatailako de nimaetongo abe hokokia itaana de ma gou-goungu.

⁴ Angamoi imaketero hoka ngone o nyawa nanga badanga ka moi dika masara to ena ma kiahonanga duru kohangoe de gea ma karajaanga imaketemomomoi,

⁵ hokogenangoo de ngone abe o Kristusu ai badangoka homanoa. Abe ngone homoi-homoi hodadi hoka to Kristusu ai badanga ma kiahonanga moi abe nanga karajaanga imaketemomomoi Unangoka, masara nagaoo nanga borigogao abe nanga gogianongoru utuikali mata-mataika ho kiani homakao irahai. Ho ngone tanu ko idadiua homagorakiye ngone ma hirete.

⁶ De ngone homoi-homoi naga nanga hiakunu Ma Jouoka de aino de gea ma hiakunu imaketemomomoi abe wonahikokodoku ngoneino. Ho ma hiakunu o kia dika abe wonahidoaka ngoneino, nanga hiakunino gea de kiani hileleani irahai Unangika. Ho naa tinihingahu ma titi ma hiakunu muruono abe Ma Jou wonahidoaka ngoneino. Abe ma hiakunu moi, gea nako wonahiakunu la ka idadi hoihene ai demo abe Una ma hirete wonatemo nanga hiningaino. De ahao kiani hadofanga o nyawaika Ma Jou ai hingahu ma demo gea, iti hongaku abe ma demo gea igoungu Ma Jouoka de aino iboa.

⁷ Eko nako naga nia hiakunu moioli Ma Jouino la niaduhunu nia gogianongoruika, gea iti niaduhunu de nia hininga ma rorahaioka de aino. Eko nako naga nia hiakunu abe o nyawaika niatobadotoko, gea niadotoko irahai onangika.

⁸ Eko nako Ma Jou winihiakunu la niahigaro o nyawaika, gea niahigaro de nia hininga ma gahumu ma totiaiika. De nako winihidoaka nginika nia hininga la nia tiwi de nia kiahonanga niahikodoku utuika, gea niahidoaka o nyawa utuikali de nia hininga ma rorahaioka de aino. De nako winihiakunu la ka idadi nia gogianongoru utuika niahihira, gea kiani niatobagou-goungu nia tagongo niao itiai. De nako naga nia hiakunu abe niaduhunu o huha ma nyawaika, gea niaduhunu de nia hininga de ma garagoka. De hokogea tinihitiari ma titi nia borihiakunu la genangino de niwileleani itiai Ma Jouika.

Abe hokokia kiani howango nanga wowango ma dodagioka

⁹ De naa utuohi tinihigaro ma titi nia wowango Ma Jouoka. Abe ngohi tato ngini kiani nimakodora de nia hininga ma hohailoa ho ufa nia uru ma kaioka dika abe nimakodora. De kiani niodohata o dorouika, masara abe ma rorahai gea nimahigagaoika enangika la ka ihikaika gea dika nianii-niiki.

¹⁰ De kiani nimakodora de nia hininga ma gahumu abe hoka itiai o ria-dodoto o tau moioka yomakodora. De kiani ngini duru nimaketehoromati la hiadono ko ti nginiua ma hirete nia perelu nihitihira masara nia gogianongoru manga perelu enangohi niolegaika.

¹¹ De ufa niodebeturu nia tagongika masara ngini kiani duru niodomagawe enangika la gea niwileleani nanga Baluhika de nia hininga ma gahumu, abe nia magawe gea inihidafae nia hiningaka abe imaketero hoka o uku ma dokaroli ihiru-hiruiye.

¹² De ngini nigogarago ma titi to ngone nanga nganganono, angamoi gea ngone duru hohioriki abe Ma Jou ahao wonahidoaka nanga utumu ngoneino. De abe nako o kangela niaohana, gea ngini nimatongohono nia ngongakuoka. De ngini ka ihikaika nimaniata Ma Jouiye.

¹³ De nako naga nia gogianongoru o Yesusoka abe yohu-huha, ona gea ngini niaduhunu la manga perelu niahidailako onangika. De nako yoperelu la yomahidodogumu nia tauoka, ona gea niadafongo nia tauino.

¹⁴ De nako naga o nyawa abe inihikangela nginika, gea niagahoko Ma Jouiye ma titi ona la Una wahidoaka ma owa onangika. De gea ko idadiua niagahoko Ma Jouika la ahao yamake ma dorou onangika, masara bowahu ma owa dika niagahoko ma titi ona gea abe inihikangela.

¹⁵ De nako naga o nyawa abe yogogarago, nginioo ka idadi nigogarago de de ona. Masara nako naga o nyawa abe manga hiningaka yohuha, gea nginioo ka idadi niamao to ona manga huha.

¹⁶ De ufa nimaketeribuutu masara koaho nimakao irahai la nimaketehiningamoi. De ufa nimasade masara nimaketedodiawo de o nyawa ngaro ona manga wowango ma gogere ma dodipokouku dika. De ufa nimaetongo niato ka nginiohi de nia sosawaroka.

¹⁷ De abe nako naga o nyawa yodiai itorou nginika, gea ngini ufa nimahibalaha de o dorou onangikali, masara nihidodiai la nia datoro irorahai dika onangika. Abe nako naga ma datoro abe o nyawa mata-mata manga himangoka de yaetongo ato ma datoro gea duru itaana de irorahai, gea ena ma datoro ngini nianiiki.

¹⁸ De ngini kiani nihitaili de nia hininga ma gahumu la nimakao irahai de o nyawa mata-mataika. Ho ufa hiadono ma titi nginioka hiadono o ribuutu idadi.

¹⁹ De ahi gogianongoru abe duru tinidora nginika, ngaro o nyawa inihikangela nginika masara ufa nimahibalaha onangika, ma koaho niwihidoaka Ma Jouika la Una dika ai hohowono o ngamoino itagi onangika. Angamoi ma dodihiraino de naga ihitulihukuoka Ma Jou ai demo abe Una wotemo wato, “Nako o hibalaha, gea to Ngohi naa ahi kuahaka. De Ngohi naa ahao tahibalaha o nyawaika ma titi to ona manga datoro ma dorou.” Hokogea to ngone nanga Baluhu idodutu wotemo.

²⁰ Ho ngini ufa nimahibalaha masara nianiiki dika naa moioli abe ma dodihiraino de ihitulihukuoka Ma Jou ai Demo-demoka. Abe itemo ato, “De nako ti ngini nia musu yahafini, gea ngini kiani niahiolomo onangika. De nako manga ngomaha yodudungu, gea ngini niahiokere. Angamoi nako hokogea nidiai onangika, gea nia musu ahao duru yamaleke ma titi to ona manga datoro ma dorou yodiaioka nginika.” Hokogea ihitulihukuoka ma dodihiraino.

²¹ Ho gea ngohi tato ufa o nyawa manga datoro ma dorou abe yodiaioka nginika de inihikala genangino hiadono nginioo nioigo nimahibalaha de ma dorou onangikali. Ko idadiua hokogea ngini nidiai, masara koaho niahikala to ona manga datoro ma dorouika ma titi ti ngini nia datoro ma rorahaiino abe nidiai onangika.