Roma 1 - Ma Jou ai Demo-demo o Totobelohoka

O Paulusu ai demo ihira-hira ai gogianongoruika

¹ Ahi gogianongoru o Yesusu Kristusoka abe o Roma ma kotaka nimanoa. Ngohi naa o Paulusu to Yesusu Kristusu ai huhuloko, de naa ahi tabea tohidingoto ngini mata-mataika. De abe ma titi to ngohi ahi tagongo, ngohi wohitingakoka Ma Jou de wohiahoko la todadi o hidingoto ma nyawa abe to Una ai Abari ma Rorahai ngohi tahingahu-ngahu o nyawaika.

² De abe ma titi o Abari ma Rorahai gea, ma dodihirainohi de Ma Jou wonahibehehongokau wato ahao ai Abari ma Rorahai wonahingahu ngoneino. De gea wonahingahu ma titi to Una ai uru ma dodofangino. Abe ona gea ihitulihuku ai behehongo ma hingahu gea ai Demo-demo ma debi-debinoka.

³ De o Abari ma Rorahai gea ma titi to Una ai Ngofaka o Yesusu Kristusu. De nako to Yesusu ai badanga gea womaboa nanga toforaino, abe nanga koano o Dautu ai totoforaukuino womaboa.

⁴ Masara Una ka o nyawa biahaua dika, de gea hohioriki angamoi ipahaino de Ma Jou o Womaha abe duru wotebi-tebini wihimomiki nanga Baluhu idodutu o Yesusu Kristusu ai honengoka de aino. De abe ma oraha womomiki, genangoka de o Yesusu duru iwihitaana abe Una gea Ma Jou o Ngofaka duru de ai kuahaka. Ho o Abari ma Rorahai abe ngohi tatobahingahu-ngahu o nyawaika, ma abari gea duru ihititi nanga Baluhu idodutu o Yesusu Kristusoka.

⁵ De gea to ngone nanga Baluhu idodutu o Yesusu Kristusu abe wohihitagongo ngohino de ahi tagongo duru ma owa naa, la ai Abari ma Rorahai gea tahingahu-ngahu o nyawa yowoe-woeika. Ho Una wohihitagongo hokogea de nagali abe wohihidoaka ai kuaha la tahingahu-ngahu abe ona ko o Yahudi ma nyawaikaua o dunia ma amokika ma titi o Yesusu Kristusu, la ona ahao ka idadi iwingaku de iwihingounu Unangika. De gea ma titi o kia hiadono Una wohihitagongino hokogea? Gea to Una ai hininga ma dumutu la o nyawa manga ngongakuino de naga manga hingounu Unangika ho hiadono Una ahao wamake o higiriiri onangino.

⁶ De abe to Una ai abari imahora-hora o dunia ma amokika, genangino ma titi hiadono nginioo o Roma ma kotaka niihenoka ai abari, de naa ngini nidadioka to Yesusu Kristusu ai nyawa.

⁷ Ho igoungu ngini naa Ma Jou duru winidora nginika, de Unangoo winiahoko Unangino, de hiadono nginioo nidadioka to Una ma hirete ai nyawa! Ho naa ahi hurata ma goronaka de ngohi ahi tabea tohidingoto ngini ahi gogianongoru mata-mataika o Roma ma kotaka. De ngini mata-mata tinigahoko Ma Jou nanga Baba de o Yesusu Kristusu nanga Baluhiye la ai owa de ai hininga ma miriidi winihidoaka nginika.

O Paulusu womahingahu ai hininga abe duru woigo woiki watutumu ona o Roma ma kotaika

⁸ De naa duru ihira toigo tinihingahu nginika abe ma oraha tomaniata de ngohi totarimakase Ma Jouika ma titi ngini mata-mata abe o Roma ma kotaka nimanoa. Angamoi o dunia ma amokika de o nyawa yomaketeade-ade ma titi ti ngini nia ngongaku Ma Jouika, ho genangino ma titi hiadono ngohi totarimakase Unangika. De ngone hohioriki abe gea mangale ma titi o Yesusu Kristusu ai datorino dika hiadono nanga niniata de nanga tarimakase ma demo ka idadi imahiadono Ma Jouiye. Ho duru igoungu abe ngohi totarimakase Unangiye ma titi ti ngini nia ngongaku Ma Jouika.

^9-10 De abe ma titi ngohi tinifetongo ahi niniata ma goronaka de gea Ma Jou Una ma hirete wohihioriki abe ngohi tagou-goungu tinigahoko de totarimakase Unangika ma titi ngini. Igoungu, Una gea abe ngohi tileleani duru de ahi hininga ma gahumu Unangika, de Una gea abe to ai Ngofaka ai Abari ma Rorahai ngohi ka ihikaika tohingahu-ngahu, duru Una gea wohihioriki abe ngohi ka ihikaika tinigahoko ma titi ngini. De ko ma titiua tinigahoko dika, masara naa ka idadi tinihingahu abe ahi hininga ka ihikaika itagi nginika, de duru tomagahoko la ahao marai Ma Jou wohihidoaka ahi ngekomo la ka idadi toboa de tinitutumu nginika, iti abe imakiniiki de to Una ai mau. Angamoi naa ma dekanoka toigo tinitutumu, masara yata-tatoko ma hidee ho ko idadiuahi toboa. De ngaro hokogea masara ka togila-gilahi tomagahoko ma ngekomo la ka idadi toboa tinitutumu.

¹¹ De gea ngohi duru toigo tinitutumu la tato ahao ka idadi ma hiowa Ma Jou o Womahoka de aino ahao ngohi tinihikodoku nginika. De ahi hininga ma dumutu la tato ahao ti ngini nia ngongaku utuohi iputurungu ma titi ma hiowaino gea abe nginika tinihikodoku.

¹² De tanu ka nginiua dika inihiputurungu ma oraha gea, angamoi duru tonganono abe ahao ka idadi ngini de ngohi homahiketehipoputurungu nanga ngongakuoka homoi-homoiino, la gea ngaro ti ngini nia ngongaku eko ngaro to ngohioo, masara nanga ngongaku mata-mataika ka idogo-dogo iputurungu.

¹³ De gea ahi hidee abe tinitutumu la tato o Roma ma kotakaoo de Ma Jou ai Demo-demo todoto-dotoko, la genangino de ka idadi tamake ma hofoko o nyawa manga wowangoino. Angamoi nako o tonaka eko o nyawa utuikali de tahingahu-ngahuoka to Una ai Demo-demoino, de naga tamake ma hofoko onangoka abe ma titi o nyawa manga ngoe iwingaku Unangika. Ho ngohi duru toigo la o Romakaoo de ma hofoko ka idadi tamake o nyawa manga wowangoka ma titi to Una ai Demo-demoino. De hokogea ahi hininga ma dumutu hiadono ngohi duru toigo toboa tinitutumu ngini genangoka. De ahi gogianongoru, duru toigo la ngini nihioriki ahi dodagi ma hidee abe ma dodihirainohi. Abe hoka kangano tinihingahuoka, ma ngoeoka ahi hidee naga la toboa tinitutumu, masara ahi hidee ma getongo gea de yata-tatoko ka hiadono ma oraha naa. Ho gea ngohi ka tomagahokohi ma ngekomo la ka idadi toboa tinitutumu ngini genangoka.

¹⁴ De ngohi naa tamao ahi hiningaka hoka naga ahi nagimi o nyawa mata-mataika ngaro onagona dika mata-mataika. De gea ko ma titiua abe tamao kiani o tiwi tahikokodoku o nyawaika, masara gea o Abari ma Rorahai abe tamao ahi hiningaka kiani o nyawaika tahikokodoku. De ngaro o kota ma nyawa eko abe o nyawa o fonganoka yomanoa, eko ngaro o nyawa abe yohohakolaka eko ngaro ona ko yohakolauahi, masara o nyawa mata-mataika tamao abe kiani o Abari ma Rorahai tahikokodoku ona mata-mataika.

¹⁵ De ena gea ma titi hiadono ngohi naa duru toigo la o Abari ma Rorahai tinihingahu-ngahu nginiokaoo abe o Roma ma kotaka.

O Abari ma Rorahai gea ena duru de ma kuahaka

¹⁶ De ngohi duru tangaku o Abari ma Rorahaiika de gea ko ihimalekua ngohino, angamoi duru tohioriki abe Ma Jou ai kuaha la watobaduhunu o nyawa, gea ai Abari ma Rorahaiino imanoa. Ho mangale ma titi ai Abari ma Rorahaiino de naga to Una ai kuaha, ho ka idadi o nyawa waduhunu genangino. Ho o nyawa onagona dika abe iwingaku Unangika de ai Abari ma Rorahaiino wapake la ona gea waduhunu. De igoungu ihira-hira itagi o Yahudi ma nyawaika la ka idadi yotoihene ai Abari ma Rorahaiika, de ipahaino de itagioli onangika abe ko o Yahudi ma nyawaua. Angamoi ma titi ai Abari ma Rorahaiino gea de Ma Jou ka idadi waduhunu o nyawa mata-mataika, abe ngaro ona o Yahudi ma nyawa eko abe ko o Yahudi ma nyawaua.

¹⁷ De gea ka idadi Ma Jou waduhunu o nyawa mata-mata ma titi ai Abari ma Rorahaiino angamoi ai Abari ma Rorahai ma goronaka de inahimatoko ngoneino abe hokokia Ma Jou wonahitotiai ngone ngaro onagona dika. De gea ka idadi Una wonahitotiai abe ma titi moi dika, de gea o ngongaku. Masara ufa ngone hafikiri abe ma ngekomo gea ka ma hungiohi, angamoi ma dodihiraino de ihitulihukuoka Ma Jou ai Demo-demoka itemo ato, “O nyawa abe Ma Jou waetongoka wato yototiai ai himangoka ma titi manga ngongakuino, ona gea abe yamakeoka o wowango ma ngango.” Hokogea itemo Ma Jou ai Demo-demoka, de ma demo gea duru imakiniiki de o Abari ma Rorahai abe ngohi totobahingahu-ngahu o nyawaika. Ho ngohi duru tangaku ma abarika angamoi duru de ma kuahaka la Ma Jou wahitotiai o nyawa enangino.

Abe ma titi Ma Jou ai ngamo to ngone o nyawa nanga howonika

¹⁸ De ngaro Ma Jou wonahidailakoka ma ngekomo la ka idadi wonahitotiai ma titi o Abari ma Rorahaiino, masara utu ko yangakua Ma Jou ai Abari ma Rorahaiika gea ho to Una ai totiai ko iwa onangoka. Ho ona gea nagahi de manga howonoka ho Ma Jou ai hohowono abe ai ngamoino kiani yadaene onanguku. Angamoi nako Ma Jou o Horogaka, Una wonahimatoko ngoneino abe duru wongamo manga howonika, ho Una duru wototiai abe ma oraha wahohowono onangika. De gea itiai wahohowono mangale ma titi o nyawa manga datoro ko itiaiua mata-mata abe ona gea ko iwingaku-ngakua Unangika. Ho ona gea duru Ma Jou wahohowono onangika. De ona gea ko ma titiua abe ona ko ihiorikua ma gou-goungu, de genangino ma titi hiadono kiani wahohowono. Hokogenangua, angamoi ona gea tanu ihiorikoka. Abe o nyawa gea ngaro ihiorikoka ma gou-goungu ma titi Ma Jou, masara gea ena hoka yatamunuku de manga datoro ma dorouino ho ko yaniikuali ma gou-goungika. De genangino ma titi hiadono duru itiai Ma Jou wahohowono onangika.

¹⁹ De hokonaa ma titi hiadono ngohi tato ona gea ka idadi ihioriki ma gou-goungu. De tanu nako hoka o nyawa yoigo iwihioriki abe ma titi Ma Jou Una hokokia ai hininga, gea ka idadi iwihioriki, angamoi Una womahimatokoka la ka idadi hihioriki de itararono.

²⁰ Abe ahi demo gea ma titi hokonaa. Abe ngaro ko idadiua ngone o nyawa himake de nanga lako Ma Jou, masara duru ma dodihirainohi de hiadono naa de ka ihikaika wonahimatoko ngoneino to Una ai hininga abe ma titi ai dulaadaino. Ho ma oraha ai dulaada wotulaada ibootino de hiadono naa de ka idadi ngone o nyawa hamake de nanga lako o dunia naa de ma kiahonanga abe Una wohidadioka. De genangino de ka idadi hataoko itararono ma titi to Una ai kuaha kohaamoko abe ko iwa ma bobaha, de abe hataokoo Una gea wagou-goungu Ma Jou idodutu, de abe naga utu duru ko iwa. Ho mangale ma titi gea mata-mata duru itararono ngoneino, ngone mata-mata ka idadi hohioriki abe Ma Jou Una gea hokokia. Ho duru ko moiua abe ka idadi yomahipongono ato, “Ngohi ko tihiorikua abe Ma Jou Una naga.” Duru ko idadiua o nyawa yomademo hokogea angamoi tanu ka idadi iwihioriki itararono abe ma titi Ma Jou.

²¹ Ho ona abe ko iwingaku-ngakua, gea Ma Jou wahohowono onangika angamoi barikua ona iwihioriki abe Una naga, masara ona ko iwihigiriiriua Unangika abe iwitemo ato, “Ngona nagoungu Ma Jou nokokurutiye.” De duru ko iwa abe yotarimakase Unangika ato, “Mia Jou, ngomi mitarimakase Ngonaika ma titi mata-mata nodiaioka la nomiduhunu ngomi naa.” De mangale ma titi ona ka yoluku iwihigiriiri de yotarimakase Unangika, enangoo ma titi moi hiadono duru itiai Ma Jou wahohowono onangika. Ho ona gea duru ko iwa manga horomati Unangika, masara yomahohiningaiye dika abe ma titi Ma Jou Una hokokia, de manga hininga ma dodagi gea duru irehene ma gurutika ho ka parahaja dika. Ho genangino ma titi hiadono manga hininga ma homoa de gea idadi ifufutuoka.

²² De ona gea yomahiromanga ato yososawaro masara ona gea tanu ka yobodo dika.

²³ De mangale ma titi manga hininga ma bodo gea hiadono ma bahauku de ona ka yoluku yomahuba Ma Jouika abe ka Una dika wagou-goungu Ma Jou. Abe ka Una dika wotobawango ka hiado-adonika, de duru ko iwa utu abe naga de manga medebini ma dararonoka abe hoka Unangoli. Masara barikua Una duru wokokurutiye hokogea masara ona yomangiriki la manga popangaoika dika yomahuba-huba. De manga popangao gea duru imakohowono de Ma Jou, angamoi ena gea duru ko iwangoua de ika-ika ahao iwedere. De manga popangao gea ko o jou ma gou-goungua masara o dulaada ma kiahonanga ma rupa dika. Abe utu yodiai hoka o nyawa nanga rupa de genangika ona yomahuba, de utuoli o totaleo ma rupa yodiai, de utuoli o aewani ma rupa, de utuoli abe imalia-liara ma rupa, de gea mata-mata to ena ma rupa yodiai la idadi manga popangao de yomahuba-huba enangika.

^24-25 De abeika to ona manga hininga ma dorou. Abe ona yaturuuru de ma gou-goungu ma titi Ma Jou la yangakuoli o ngelukika. De ona yomahingahu ato manga popangao gea igou-goungu o jou. Ho ona yomatobahuba-huba de yatobaleleani o kiahonangika abe gea ena Ma Jou wotulaadauku, masara ko yomahubaua Ma Jouika abe mata-mataika wotobatulaada. De tanu Una dika abe itiai wamake o higiriiri de o horomati naa de ka hiado-adonika. De duru hokogea igoungu. Amin. De mangale ma titi o nyawa manga hiningaka de ko iwihoromatiua Unangika, ho hiadono Ma Jou wahidoaka la ona yomahikangela dika ma titi manga hininga ma hafini ma dorouika. Abe ngaro hokokia ma himaleke abe yadaene manga hiningaika de ona ato yomahiketehidadidorou de manga badangino, masara gea Ma Jou wahigunoa la ena gea yanii-niiki. Abe Una wahidoaka wato, “Mangale ngini duru nioigo o howono niatobaniiki, ho naa tinihidoaka la nigila-gila dika nia howono ma goronaka, la nia datoro de nia hafini gea idadioka ti ngini nia hohowono.” De hokogea Ma Jou wahihohowono onangika de wapake to ona ma hirete manga howono.

²⁶ Ho Ma Jou wahigunoa dika la ona manga badanga ma hafini ma dorou yanii-niiki. De barikua ona o ngo-ngofeka masara ka yoluku yomaidu de o nau-nauru, ma ona ka yomahingo-ngofeka de yomakitigi. De gea duru ko yaniikua nanga badanga ma hiaturu abe itiai hanii-niiki masara ona yaturuuru de abe ko itiaiua.

²⁷ De hokogenangoo o nauru de o nauru yodiai. De o nauru gea ko yaniikokauali nanga badanga ma hiaturu abe itiai la yomaidu de o ngofeka, masara yorehene genangino de duru manga hafini ifae la yomahikokanauru dika yomakitigi. De mangale ma titi manga howono manga badangoka gea hiadono manga badangika de yadaene manga hohowono. De manga hohowono gea duru imakiniiki to ena ma dubuho de manga howonoo enangoo ma dubuho, angamoi ona gea yorehenoka o totiai ma ngekomoka de aino.

²⁸ De ona gea yomaputuhoka ato ko iwihiningakauali ma titi Ma Jou. Ho mangale ma titi manga hiningaka hokogea yomaputuhu, ho Ma Jouoli womaputuhu ma titi ona abe wahidoaka onangika la to ona manga hiningaka gea yotula-tulaka dika, abe manga datoro gea duru ko itiaiua.

²⁹ De ona gea ka ihikaika yomahidadidorou dika, ho manga wowangoka aomangoka de ma dorou abe ma rupa naga ma ngoe. De ma dorou abe naga manga hiningaka hokonaa. Abe hoka manga datoro ko itiaiua, de manga lako itobahoroodo o kiahonangika, de o peseke dika yanii-niiki, de yomaketetaleana, de naga manga hiningaka la ato o nyawa yatoma. De nagali manga hiningaka abe yomaketeribuutu, de abe yoelu-eluku, de yomahiketehikokangela, de abe yatobahiade-ade ma titi manga dodiawo.

³⁰ De nagali abe manga dodiawo manga roma-romanga yawea-weara, de abe duru iwidohata Ma Jouika. De ona gea duru yomagorakiye de yomasade ho hiadono duru yomahigiriiri ona ma hirete. De ona ka ihikaika yomalingiri la ato yomahohiningaiye o datoro ma dorou ma hungioli la ka idadi enangoo yodiai de genangino yahowono. De ona gea yoluku yahingounu manga dimonika.

³¹ De nagali abe hamake onangoka abe manga hininga itagi ko itiaiokaua ho yobodo, de ngaro yomahiketehibehehongoka masara manga behehongo gea yawohanga de ko ihingodumua. De ona manga dora duru ko itagiua o nyawa utuika, de nako o nyawa yahowono onangika gea manga howono duru ko yaofiua masara ka yataere dika onangika. De hokogea manga datoro ma dorou abe aomangoka to ona gea manga hiningaka.

³² De gea ma titi o kia hiadono manga datoro hokogea? Bote ma titi ona gea ko ihiorikua abe ahao Ma Jou wahohowono onangika? Koua, ona gea ihiorikoka abe nako Ma Jou ai Pareta, gea itemo ato onagona dika abe yatobaniiki o datoro ma dorou gea de kiani manga hohowono o honenge yadaene onanguku. De ngaro ma pareta ma demo ihiorikoka de itararono, masara ka oko dika yodiai ma dorou. De hongoli ona yosanangi dika nako o nyawa utuoli yotobadiai ma datoro ma dorou gea abe imaketero hoka onangoli ma hirete yotobadiai manga wowangoka. De hokogea o nyawa manga hininga abe ona yoluku yomahuba Unangika abe Una wonatulaadauku, de hiadono yolukoo iwihoromati Unangika. De genangino itararono abe Ma Jou ai hohowono onangika duru itiai de itaana ma titi manga hininga ma datorino.