Maleaki 4 - Ma Jou ai Demo-demo o Totobelohoka

4:1-6 ko atailakouahi Abe ma titi Ma Jou ai hohowono ma wange

¹ De ahao Ma Jou o Yawe Wokokurutiye wogila-gila wotemo wato, “Abeika ngini nitotoihene ahi demoino! Angamoi Ngohi tinihitiarioka ma titi duru igoungu abe o hohowono ma wange ahao idadi! De ma hohowono gea ka idadi hohiketero hoka o uku kohaamoko abe o kia dika iwohama to ena ma doka-dokarika de duru atinoka hiadono ko iwaka ma hou. Ho ma wange gea adonoka de ahao ona yomasade-sade de abe ma dorou yotobadiai, ona mata-mata yahibinaaha de o uku imaketero hoka o ruruubu dika yaumo doka o uku ma goronaika de ko iwaka. De nako ona gea hahiketero de o gota, gea ahao ngaro to ena ma jaga eko ma ngutuku masara duru ko iwaka mata-mata.”

² “Masara ngini onagona dika abe naga nia horomati de nia hingounu Ngohino, gea duru nimakohowono de ona abe tahohowono ma oraha gea. Abe ngini ahao nia wowango ma datoro ma totiai imahilaku nginioka hiadono duru nigogarago. De mangale ma titi nia datoro ma totiai ahao ka idadi inihitogumu nia kangelaino. Ho ma oraha gea de ngini ko niakunua niatumungu nia gogarago ho hiadono ka inihirarama nia garago gea. Abe ngini niamao nimaketero hoka o totaleo abe ihihupu ma kurungaka de aika ma homoaika la ihoho aika aino.

³ De ma wange gea ngini ka idadi duru niahikala o dorou ma nyawaika hiadono ngini niadoko-doko onanguku hoka ona o tonaka ma kuhuhunu dika.” Hokogea Ma Jou o Yawe Wokokurutiye ai higaro ma demo onangika.

⁴ De nagahi ai demo onangika abe Una wato, “Ngini kiani niohohininga ahi huhuloko o Musa ai Pareta la nia hingounu naga enangika. Angamoi ma dodihiraino de Ngohi tohidoaka ahi pareta de ahi hiaturu mata-mata gea unangika o Sinai ma lokuoka. De gea tohidoaka la ngini o Isiraele ma nyawa mata-mata niatobaniiki enangika.”

⁵ “De abeika nitotoihene, naa tinihingahu abe to Ngohi Ma Jou o Yawe ahi hohowono ma wange ko adonuahi de ihira tihidingoto ahi uru ma dodofanga o Elia nginika.

⁶ De una woboa nginika de ma titi ai higaro ma demoino de una winihidadi la ngini o balu-baluhu ka ma moi de nia ngofa-ngofaka nimangali de nilio Ngohino. Masara nako nioluku Ngohino nilio, gea ahao ma oraha toboa de kiani o hohowono inidaene ngini de nia tonakuku ka ma moi.”