Maleaki 3 - Ma Jou ai Demo-demo o Totobelohoka

3:1-5 ko atailakouahi

¹ De Ma Jou o Yawe abe duru Wokokurutiye Una winipaluhu nginika hokonaa wato, “Abeika nitotoihene! Ngohi naa etohidingoto ahi nyawa abe wotobahingahu-ngahu ahi demo, de una gea ahao wohidiaiohi ahi ngekomo la Ngohi toboa nginika. De gea ipaha de ahao ka itodokanino de ti ngini nia Baluhu idodutu abe naa ma dekanino niwidodamaa de niwilingiri, Una ahao woboa to Una ai Tauika. De Una gea woboa de winihingahu-ngahu ma titi ahi behehongo ma demo nginika. Ho duru igoungu Una ahao woboa nginika.

² Masara naa moi tomaleha ahi hiningaka tato, ‘Ahao ma wange gea woboa nginika de done sarakia naga o nyawa abe ka idadi yapoa?’ Angamoi gea woboa la winihohowono ngini o nyawaika. Abe duru ko iwa abe ka idadi yomademo ma titi manga wowango ma datoro. De gea woboaino de Una womaketero hoka o uku duru kohahauku abe hapake ma oraha hodiai o haaka la hohikatingakika ma ioko la ma haaka duru ireeika dika. De ka idadi hotemo hato Una womaketero hoka o sabongo duru iputurungu / idoto la nanga baju idadi duru iarehe.

³ Ho Una woboa nginika de ai karajaanga hatoli hoka o nyawa abe yahikatingaka ma ioko o haakaino, ho gea ai karajaangino de Una wahitebini o Lewi ai totoforauku hiadono ona yotebinoli imaketero hoka o gurasi de o haaka abe duru iree-reeika dika. De wahitebini ibooto de ahao ona ka idadi yomahihuba o huhuba Ngohi o Yaweino abe ihihisanangi.

⁴ De gea ahao o Yerusaleeme de o Yudea ma nyawa manga hidoaka Ngohino ka idadi tolegaika de todafongo abe imaketero hoka ma dodihirainoli tosanangi enangika.”

⁵ De Ma Jou o Yawe duru Wokokurutiye wogila-gila wotemo nginika wato, “De ma oraha gea toboa la tinihohowono nginika. Abe Ngohi ko totaka-takaua toade-ade o nyawa manga howo-howono, masara gea ka tomoroini dika totemoiye. Abe onagona dika o dodiai yotobadiai, de abe yahowono ma titi yomaidu de abe ko manga fekatua eko manga rokatua, de ona abe yomahikoboto ato bari yotemo ma gou-goungu dika masara ka yoeluku o nyawa manga himangoka, onangika mata-mata tohidaere manga howo-howono. De onangoli tohidaere manga howono abe yahikarajaanga o nyawa masara yarusi ma titi manga hewa ma tiwino, de o nyawa onagona dika abe yarusi o ngo bao-baoika eko o gohihi ma ngofaka. De onagona dika abe ka yoluku yaduhunu o homoa ma nyawa abe yadioniki nginioka, onangoli tohidaere manga howono. Angamoi o nyawa homoi-homoi abe manga datoro ma dorou hokogea, ona ko iwa manga horomati de manga modongo Ngohino.” De hokogea Ma Jou o Yawe Wokokurutiye ai hitararono ma demo ma titi ai hohowono nginika.

Ma Jou ai nyawa iwirusi de Una wato kiani yotoba

⁶ De Ma Jou Una wohigila-gila ai demo onangika wato, “De igoungu ngini o Yakubu ai totoforauku, ti ngini nia howono kohangoe masara ko tinibinaahauahi. De gea ma titi moi dika, abe Ngohi Ma Jou o Yawe ho ahi behehongo duru ko tawohangikaua. Angamoi nako hoka ahi behehongo ka idadi tawohangika, gea ma dihiraino de ngini naa tinibinaahaka ma titi nia howo-howono Ngohino.

⁷ Abe ma dodihiraino ma oraha nia totofora ka nagahi de ona ko yolegaikaua ahi pareta ma demo. De ka hiadono ma oraha naa de nginioli nimaaduru dika hoka onangoli ho ko iwa nia hingounu ahi pareta ma demoika.” “De ngaro hokogea nia hininga masara Ngohi tinihuloko tato kiani ngini nilio Ngohino la gea ka idadi Ngohioo tolio de toboali nginika.” Hokogea Ngohi Ma Jou o Yawe Tokokurutiye tahuloko nginika, masara ngini nipaluhu niato, “Done sarakia de ngone holio Ma Jouika? Angamoi ngone ka nagahi de de Una, ngone duru ko homatingakua Unangoka de haika ma homoaika!”

⁸ De gea Ma Jou wotemoli hokonaa wato, “Naa tinileha, sarakia, nako o nyawa iwidohiki Ma Jou ai kiahonanga, gea irahai? De hokogea tinitemo angamoi ngini niagoungu nihidohiki ahi kiahonanga! De ahi demo gea niihene de nihileha, ‘Done ani demo ma titi sarakia? Ko ma iwa abe minidohiki ani kiahonanga!’ De gea tinipaluhu tato abe ma titi nia hidoaka de nia huhuba abe niato nihihidoaka Ngohino, genangino de nihirusi angamoi utu nimadumungu de ko niahidoakua.

⁹ Ho mangale ma titi nihidohiki hokogea ho ngini o Isiraele ma nyawa o dutu moi ngini mata-mata ahao niamake nia hohowono ma titi nia howono gea!”

¹⁰ De ahao Ma Jou o Yawe Wokokurutiye ka wotemohi onangika wato, “Masara ngaro ngini niahowonoka Ngohino hokogea, masara nagahi ma ngekomo la ufa nia hohowono inidaene nginiuku. Abe ngini ma oraha nia kiahonanga niaregu la idadi o doomu ngimoi, kiani ma regu moi abe biaha nihihidoaka Ngohino gea ma regu moi ma gahumu kiani niaoino ahi tau ma kiahonanga ma ngiino. La gea ma inomo idadi iwedono ahi tauoka. De gea tinihuloko nidiai la genangino ka idadi nihitaili ahi balaha sarakia. Abe nako nia hidoaka gea ma gahumu niaoino, ahao Ngohi tinihiowa de o hiowa duru kohaamoko. De ma hiowa gea tinigopoa nginiuku ka hiadono nia perelu akokiwedonoka de nagahi ma boloi duru ilamoko de nia ngi-ngi ko apoaua angamoi akokiomangiyeoka.

¹¹ De ma oraha ma gugutuku adono de ti ngini nia hasili duru ilamoko niautukino angamoi Ngohi togoana la ufa ma aewani aolomo de ufa o panyake adaene. De ti ngini nia angguru ma hofoko ko ikororomua ma goselaka masara duru ilomuku irahai mata-mata.

¹² De nako hiadono idadi hokogea nginioka, ahao o homoa ma nyawa o dutu amomoi inihiromanga ato ngini duru niamakeoka o hiowa ma amoko ma titi ngini nimanoa o tonakoka abe duru irorahai mata-mataika.” Hokogea Ma Jou o Yawe Wokokurutiye wahibehehongo ai nyawa o Isiraele ma nyawaika.

3:13-18 ko atailakouahi Ma Jou wahikohowono o nyawa ma titi manga hininga sarakia Unangika

¹³ De Ma Jou o Yawe ai dodaere ma demo nagahi onangika abe una wato, “De ngini naa duru nihingelo Ngohino de nia demo ma doto. De barikua nihingelo hokogea masara ipaha nihileha niato, ‘Ngomi naa duru ko miningeloua! Ho done sarakia nomitaere ngomino?’

¹⁴ Masara gea tinipaluhu abe ngini nimaketemoka niato, ‘Parahaja dika ngone hileleani Unangika! Nanga utumu o kiaka hamake ma titi nanga hingounu ai paretaika? De nako hoboa ai himangino de nanga hiningaka hato hotoduba ma titi nanga howo-howono, genangino de ma owa o kia hamake? Ko iwa!

¹⁵ Ho naa koaho haetongo ona yomagora-gorakiye hato ona gea duru youtumoka. Angamoi ona abe ma dorou yotobadiai, duru ona gea abe de manga tiwioka. De abeika o nyawa abe yomahingahu Ma Jouika ato, “Ngomi naa to ngomi dika mia mau mitobaniiki, ho to Ngona ani mau ko miolegaikaua.” Ona gea ngaro yomahingahu de iwitaili Ma Jouika masara gea de ko kia-kiaua idadi onangika, ko iwa manga hohowono adaene onanguku.’ De hokogea ti ngini nia demo abe nimakoketemo ma titi Ngohi!” Hokogea Ma Jou o Yawe wataere onangika ma titi manga bobeto ma demo Unangika.

¹⁶ De ahao ona abe iwihoromati Ma Jou o Yaweika de manga hawana ma horomati, ona yomakoketemo ma titi ai demo gea de manga hininga ma dodipokouku. De manga demo gea iwihisanangi Ma Jouika hiadono wadafongo onangika. Ho Una wohiaturu la o lu-lulu ma buku moi yodiai to Una ai himangoka. De ma buku gea ma dolaka yatulihuku manga roma-romanga abe iwihoromati Ma Jou o Yaweika de ko iwingeloua la ma buku gea idadi o hohininga moi.

¹⁷ Yatulihi ipaha de ahao Ma Jou o Yawe Wokokurutiye wotemo wato, “Ahao naga ma oraha abe Ngohi toboa de tahohowono o nyawaika. Masara ma wange gea adonoka de ahi nyawa naa abe naga manga romanga atulihuku, ona yodadioka to Ngohi ahi nyawa, ho ahao Ngohi ko tahohowonokauali. Abe ona gea yomaketero hoka o baba womatengo ai ngofaka abe duru wihingounu ai babaika, ho ngaro ufa dika de wihohowono ai ngofakika.

¹⁸ De ma wange gea de ma moioli idadi itararono nginika abe hokokia tahikohowono o totiai ma nyawa de o dorou ma nyawa, de abe duru yomakohowono ona ihitobaleleani Ngohino de ona abe ko yolegaikaua ahi mauika.” Hokogea Ma Jou o Yawe ai demo onangika.