Maleaki 2 - Ma Jou ai Demo-demo o Totobelohoka

2:10-17 ko atailakouahi Ma Jou ai dodaere ma demo ai nyawaika

¹⁰ De naa Ma Jou ai uru ma dodofanga o Maleaki ai hitiari ma demo ai gogianongoru o Isiraele ma nyawaika. Abe una wotemo wato, “Sarakia, ngone mata-mata nanga Baba ka moi eko koua / homaleko? De abe inatulaada ngone, gea naga manga ngoeika eko ka womatengo dika Ma Jou? Koua, duru ka womatengo dika Ma Jou! Ho nako Una ka womatengo dika nanga Baba, done sarakia de ngone hahitorou nanga gogianongoruika abe nanga datorino gea de hahitipokouku nanga behehongo Ma Jouino abe hamake nanga totoforaino?

¹¹ De gea ngaro o Yudea ma tonakoka eko ngaro o Isiraele ma tonakoka eko ngaro o Yerusaleeme ma kotaka, masara nanga howono duru itotorou ngone hodiaioka. Abe o Yudeaka ma nyawa ko yatobagou-goungua de hiadono yahipeseke Ma Jou o Yawe ai Tau ma Debi-debinika angamoi yoilaka de ona abe yomahijou o jou ma homoaika!

¹² Ho koaho Ma Jou o Yawe watoaka de waumoika o nyawa onagona dika abe manga datoro hokogea hiadono ona watingakika o Isiraele ma nyawaka de aika. De ngaro ona gea yomahihuba de o huhuba moi Ma Jou o Yawe Wokokurutiye, masara ko idadiua, kiani ona gea watingakika dika!

¹³ De naa moioli ti ngini nia howono. Abe ngini duru niari-ari Ma Jou o Yawe ai huhuba ma ngioka hiadono nipoa-poaka de nia koongo itifa o huhuba ma ngiuku, de gea niari angamoi Una ko wolegaikakaua ti ngini nia huhubaika de ko wosanangiokaua enangika.

¹⁴ De ngini nipoaka niato, ‘Done ma titi o kia Una ko wonasanangiokaua?’ De gea ma titi abe ma dihiraino de Ma Jou o Yawe winilega-lega nginika ma oraha ngini ka o goohi de niilaka. Masara naa de ko niagou-goungua nia fekatika ngaro muna ka maniikohi o gogilaka ma pareta de modadi nia dodiawo ma gou-goungu.

¹⁵ De naa tinileha, ngini bote niato ko Ma Jouua abe winihidadi moi de nia fekata? Koua, duru Una gea abe winihidadi moi, abe nia badanginoo de nia womahinoo ma nidadi to Una. De gea to Una ai mau sarakia abe nginioka de aino? Gea woigo wamake o ngofa-ngofaka abe iwiniiki Unangika. Ho mangale ma titi gea hiadono ngini kiani nimagoana nia gogao nia fekatika abe ngini ka o goohi de niilaka munangika.

¹⁶ De to ngone o Isiraele nanga Jou o Yawe Una wotemo wato, ‘Ngohi todohata o ngolu-ngolukika. De onagona dika yaoluku manga fekatika, gea Ngohi tohiromanga tato imaketero hoka o datoro ma dualono yodiai, de manga datoro gea todohata enangika.’ Hokogea Ma Jou o Yawe duru Wokokurutiye ai demo nginika. Ho ngini kiani nimagoana la ka ihikaika niatobagou-goungu nia fekatika.

¹⁷ De ngini naa Ma Jou o Yawe winidebeturu ma titi nia demo-demoika. Ho ngini nimakeleha niato, ‘Done sarakia de wonadebeturu ma titi nanga demoino?’ De gea wodebeturu nia demoika angamoi nitobatemo niato, ‘Bote Ma Jou wasanangi dika onangika yotobadiai itorou angamoi Una ko wahohowonua onangika.’ De nagali niato, ‘Ma Jou abe wotobatotiai de wahohowono o dorou ma nyawaika, Una gea o kiaikaka woiki? Angamoi ko iwiwa naangoka!’ De hokogea ti ngini nia demo hiadono winidebeturu nginika.”