Ibarani 8 - Ma Jou ai Demo-demo o Totobelohoka

To ngone nanga Hidemo Ma Jouika ka Unangohi duru wokurutiye nako de o hidemo utu mata-mataika angamoi ka Una dika wileleani o Horogaka

¹ De naa tinihingahu nginika ma titi moi abe ka enangohi duru ikurutiye. De gea tinihingahu tato to ngone nanga Hidemo wokokurutiye Ma Jouika o Yesusu, ka Unangohi duru wokurutiye nako de o hidemo utu, de abe ka Una dika wonahingodumu nanga perelu mata-mataika. De nanga Hidemo wokokurutiye Una gea wogogerukuoka to Ma Jou wohohailoa ai kadera ma hohailoa ma nirakoka abe naga o Horogaka.

² De genangoka Una wonahidemo Ma Jouika abe Ma Jou ai Tau ma gou-goungu ma goronaka. Abe ai Tau dakena gea ko o nyawainoua ihigoko masara nanga Baluhu idodutu Una ma hirete wohidadi ai Tau gea.

³ De gea igoungu abe o hidemo wokokurutiye homoi-homoiika naga manga tagongo Ma Jouika. De manga tagongo gea la o nyawa manga hidoaka de manga huhuba iwihitobahidoaka Ma Jouika. De hokogenangoo o Yesusu kiani naga de ai huhubaka, angamoi Unangoo o Hidemo Ma Jouika. Ho ngaro to ngoneoli naa nanga Hidemo wokokurutiye, masara to Unangoli kiani naga ai huhuba la gea wihidoaka Ma Jouika.

⁴ De masara nako to Yesusu ai huhuba, gea ko Ma Jou ai Tauokaua abe Una wohihuba gea Ma Jouika. De tanu abeika nako hoka o Yesusu nagahi o dunia ma lokuoka naa, gea de ahao ko iwihigunoaua o huhuba womahihuba Ma Jouiye, de hongoli ko iwihiromangua o hidemo angamoi Una ko o Lewi ai totoforainoua womaboa. Angamoi o duniaka naa nagau o hidemo yamuruono naga o Lewi ai totoforaino abe ona iwihitobahidoaka Ma Jouika manga hidoaka abe imakiniiki de o Musa ai Pareta ma dodihiraino.

⁵ De hokogea to ona manga tagongo abe iwileleani itiai Ma Jouika ai Tau ma goronaka, masara manga tagongo gea tanu hoka o gurumini dika de ko ma gou-goungua angamoi o duniaka dika ona iwileleani. Masara nako to Yesusu ai tagongo, gea ka enangohi ikurutiye angamoi Una wileleani o Horogaka de ko o duniakaua. De gea duru imaketero abe hoka ma dodihiraino Ma Jou wihibehehongo o Musaika ma titi to Una ai Hijai-jai ma Tau o ngoerino wodiai. Angamoi ma tau gea, enangoo tanu hoka o gurumini dika, abe nako Ma Jou ai Tau ma gou-goungu, gea naga o Horogaka. De gea ma dodihiraino abe itigioka o Musa wohigoko ma Hijai-jai ma tau o ngoerino de Ma Jou wihibehehongo o Musaika wato, “Ho ngona Musa, kiani nahiaturu la ngini nianiiki nihidodiai ahi hidumutu ngonaika abe tonihingahuokau o lokuoka naa.” Hokogea Ma Jou wihibehehongo o Musaika. Ho ona ihigoko ibooto ma tau abe imakiniiki de ma tau ma gou-goungu o Horogaka ma rupa, de genangoka nanga hidemo yohira-hiraika iwileleani Ma Jouika.

⁶ Masara nako to ngoneoli nanga Hidemo Ma Jouika o Yesusu, Una gea wileleani Ma Jou ai Tau ma gou-goungu ma goronaka abe naga o Horogaka. De to Una ai tagongo abe wileleani Ma Jouika, ka enangohi duru ihohailoa nako de o hidemo utu manga tagongo abe ona ka yaniikohi ma hiaturu ihira-hiraika. De gea ka to Yesusohi ai tagongo duru ihohailoa angamoi nako de nanga behehongo ma hungi Ma Jouino de ma behehongo ihira-hiraika, ma ka ma hungiohi abe duru ihohailoa. De gea o Yesusu abe wotobahiaturu nanga behehongo ma hungioka naa, ho duru itararono abe ka to Unangohi ai tagongo duru ihohailoa. De abe ma titi to ngone nanga behehongo ma hungi ka enangohi ihohailoa, gea mangale ma titi to ena ma nganganono duru ihohailoa nako de o behehongo ihira-hiraika ma nganganono.

Una wotuli-tulihi wohidotelega abe ma behehongo ihira-hiraika de abe ma behehongo ma hungioli

⁷ Ho abeika hatailakohi ma behehongo hinooto gea. Angamoi nako hoka ma behehongo ihira-hiraika la to ena ko iwa ma kuranga, gea de ahao ngaro ufa dika de Ma Jou waturuuru de o behehongo moioli.

⁸ Masara ma dodihiraino de Ma Jou wamakeoka abe ma behehongo ma hiaturu ihira-hiraika gea naga de ma kurangoka angamoi to Una ai nyawa yorehenoka ma behehongoka de aino, ho tanu ma kuranga naga to Una ai nyawaka gea. De gea wataere de wahibehehongo onangika ma dodihiraino wato, “Abeika, Ngohi nia Baluhu idodutu tinihingahu nginika abe ahao nako ma oraha adonoka de o behehongo ma hungioli tinihidoaka nginika abe ngaro o Isiraele ma tonakoka nimanoa eko ngaro o Yehuda ma tonakoka nimanoa, masara ngini mata-mataika ahao tinihidoaka de o behehongo ma hungioli ma oraha gea.

⁹ De ahi behehongo ma hungi gea ahao ko imakadaenua de abe ahi behehongo ihira-hira tahibehehongoka ti ngini nia totoforaika ma oraha Ngohi ma hirete o Mesiiri ma tonakoka de aino tahihira-hira. De ahi behehongo ma hungi gea ahao kiani imakohowono de abe ihira-hiraika angamoi ma dodihiraino gea de ahi nyawa ko yanii-niikua ahi behehongika ho hiadono Ngohi ko talegaikakauali onangika.” Hokogea nanga Baluhu idodutu ai demo.

¹⁰ De ahao ka wogila-gilahi wotemo wato, “Ho ngona naa Ngohi ani Baluhu idodutu tonihingahu ngonaika abe ahao ma oraha dokengika de o behehongo ma hungioli tahidoaka o Isiraele ma nyawa mata-mataika. De hokonaa abe ahi behehongo ma hungi ma demo ahao tahidoaka onangika. Ahao to Ngohi ahi pareta tohingohama to ona manga hininga homoi-homoi ma goronaika la enangika gea duru yongano-nganono, de gea ngade-ngade imaketero hoka ahi pareta gea tohitulihika to ona manga hiningaika. De ma oraha gea ona ahao duru yagou-goungu yomahuba-huba Ngohi manga Jouino, de gea Ngohi duru tafetongo onangika tato to Ngohi ahi nyawa tatobapaliara.

¹¹ De ma oraha gea ngaro ufa dika de ahi nyawa gea yomakodotoko manga dodiawoika eko manga gogianongoruika ma titi Ngohi, angamoi ona mata-mata ihihiorikoka Ngohino. Abe ngaro ona manga gogere ma dodipokouku eko ngaro hiadono abe duru manga gogere ikokurutiye, masara ona mata-mataika ahao ihihiorikoka Ngohi manga Jou, ho ngaro ufa dika de yomahikudumutu ato, ‘Irahai nako ngona nihioriki Ma Jouika.’

¹² De ma oraha gea de ahao taapongo manga datoro ma dorou, de to ona manga howo-howono abe ahao ma oraha genangoka de imahikaika ko tohohiningakauali.” Hokogea ma dodihiraino Ma Jou ai demo abe ihitulihukuoka.

¹³ Ho abeika Ma Jou ai demo gea ma goronaka de wofetongo wato naga ai behehongo ma hungi. De gea nako wofetongoka abe ai behehongo ma hungi naga, gea ma titi abe ma behehongo ihira-hiraika o Musa ai Paretaino gea ko ilakuokaua. Angamoi ma behehongo ma hira ena gea duru atimonoka de idadioka hoka ma babiti, ho ko itedekanokaua de ena gea ko iwaka.