Huhupu 7 - Ma Jou ai Demo-demo o Totobelohoka

Ma Jou womahingahu ai hidee o Musaika

¹ De Ma Jou o Yawe wotemoli wato, “Musa, naa ngona nototoihene ahi mau ngini inihinootoika. Ngohi ahao tonihikuaha ngonaika la tonihidadi abe ngona hoka Ma Jou o Firaunika de nako ani riaka o Harunu, una gea tihidadi hoka to ngona ani uru ma dodofanga.

² Ho ahi demo mata-mata tonihingahuoka ngonaika ahao ngonali nihingahu o Harunika. De ahao ahi demo gea o Harunoli wadofanga o Firaunika. Ho gea o Harunu abe ahao wogahoko o Firaunika la o Isiraele ma nyawa ka wahigunoa yohupu o Mesiirino.

³ Masara o Firaunu una ka woluku dika de gea Ngohi ai hininga tohitogowini hiadono duru ko winihigihenua. Hokogea Ngohi todiai de ahao duru ma ngoe o heheranga todiai la ahi kuaha ma dodunguu gea ahao yamake o Mesiiri ma nyawa mata-mataika.

⁴ De ngaro hokogea o heheranga ma ngoe masara o Firaunu ko wahigunoauahi ahi nyawa yohupu. Ho Ngohi ahi kuahaka de aino ma buturungu hiadono ahao o Mesiiri ma nyawa tahohowono hiadono to ona manga buturungu tohiwedere. Hokogea ahi nyawa tahikokihupu de manga regu amomoiino.

⁵ De hokogea tahimatoko o Mesiiri ma nyawaika ahi buturungu abe ka de o Isiraele ma nyawa tahihupu o Mesiiri ma nyawa manga tonakino de ona ahao yomangaku Ngohi tokokurutiye, Ngohi Ma Jou o Yawe.” Hokogea Ma Jou ai hidee wihingahu o Musaika.

⁶ Ho o Musa de o Harunu ihidodiai yaniiki mata-mata Ma Jou o Yawe ai demo onangika.

⁷ De ma oraha gea yotemo o Firaunika o Musa ai ngumuru adonoka ai taongo moritufange de ai riaka o Harunu ai ngumuru adonoka ai taongo moritufange de hange.

O heheranga yodiai o Firaunu ai himangoka

⁸ De Ma Jou o Yawe wahingahu o Musa de o Harunika wato,

⁹ “Marai o koano gea ahao winihuloko la o dodunguu nidiai la gea nimahitaana abe gea Ngohi tinihuloko ho hiadono niboa unangino. Ho ka de wogahoko o heheranga hokogea de ahao ngona Musa nihibehehongo o Harunika nato, ‘O tutukunu ani giamoka gea abe hapake o domba hogoa-goana gea ena naumo ai himanguku.’ Ka de gea o Harunu wodiai de ma tutukunu gea idadi o dodiha.”

¹⁰ Hokogea Ma Jou wahuloko o Musa de o Harunika ho yoiki o Firaunika. De o Harunu waso ma tutukunu ho ena gea una waumo o Firaunu de ai duduhunu manga himanguku de ai tutukunu gea idadi o dodiha.

¹¹ Ka de gea wamake de o Firaunu wahokino yotobamai-maihi, de onangoo abe iwiduhunu o tobahioriki. De onangoo yoboa abe ka idadi o heheranga yodiai de o fufutuino ma heheranga.

¹² De ahao onangoo yodiai imaketero hoka o Harunoli abe ka de manga tutukunu homoi-homoiika yakokiumo de enangoo ikokidadi o dodiha. Masara o dodiha abe imadadi to Harunu ai tutukunino ahao yalahiri o dodiha hinooto abe imadadi to ona manga tutukunino.

¹³ De ngaro o Firaunu wamake hokogea masara ai hininga watogowinohi imaketero hoka ma dihira Ma Jou o Yawe wahingahuokau o Harunu de o Musaika.

Ma Jou ai hohowono ihira o akere idadi o awunu

¹⁴ De ahao Ma Jou o Yawe wihingahuoli o Musaika wato, “O koano gea ai pea kohadogowinohi ho o Isiraele ma nyawa ko wahigunoauahi yoiki.

¹⁵ Ho ngini o ngoru-ngorumino niloiki o Nili ma akerika abe genangika o Firaunu ai biaha o ngoru-ngorumiye wotobauti o akeruku. Genangoka kiani niwitutumoli de o tutukunu gea abe ka imadadi o dodiha, ena gea kiani niao. De kiani ngini nihiraika nimahiadono ma ngiika gea la niwidamaa genangoka.

¹⁶ Ho ka de o Firaunu woboaka de niwibuhuku de o demo hokonaa niato, ‘Mia koano, Ma Jou o Yawe abe o Ibarani ma nyawa yomahuba-huba Unangiye, Una gea womihuloko la miboa minihingahu ai demo ngonaika abe Una wato, “Ngona o Firaunu kiani nahigunoa ahi nyawa yohupu o Mesiiri ma tonakino naa la yomahuba Ngohiye o tonaka ma kakaahaka.” Hokogea Ma Jou ai behehongo ngonaika masara ngona ko nihigihenua.’”

¹⁷ De ahao ngona o Musa kiani nihingahuohi to Ngohi ahi demo o Firaunika nato, “Ho naa Ma Jou o Yawe wodiai la ngona de ani nyawa ahao duru winihihohowono de nia akere abe to Una ai demo ngonaika hokonaa, wato, ‘Ahi koano, naa ena todiai la ngona duru nohihioriki abe Ngohi igoungu Ma Jou o Yawe! De hokonaa ahao idadi, abe ka de o Nili ma akere Ngohi tohipoha de o tutukunu ahi giamoka naa de ma akere gea idadi o awunu!

¹⁸ Ho o nawoko o akeroka naa ahao ikokihonenge hiadono o akere naa duru imela. De o Mesiiri ma nyawa ko idadiokaua yokere ma akerino naa.’” Hokogea Ma Jou widotoko o Musaika ai demo abe kiani wadofanga o Firaunika.

¹⁹ De ahao Ma Jou o Yawe wihingahu o Musaika wato, “De nihingahu o Harunika la ma tutukunu gea wohitumutu o Mesiiri ma nyawa manga akere mata-mataika. Ngaro o akere ma jaga-jagaika eko o totaagaika gea mata-mataika wohikokitumutu la ikokidadi o awunu. De wohitumutoli manga akere ma ngi-ngioka ngaro ena o akere ma ngi yodiai o gotaino eko o hakaruino eko o tonakino ma iti o Mesiiri ma nyawa mata-mataika manga akere aturuuru de o awunu.” Hokogea Ma Jou wahibehehongo o Musa de o Harunika.

²⁰ Ho ona yodiai duru imaketero hoka Ma Jou o Yawe wahibehehongoka. De ma oraha o Harunu ma tutukunu wagoraka de wapoha o Nili ma akeruku gea. De gea wodiai duru o Firaunu de ai duduhunu manga himangoka. De ka de to Musa ai tutukunu ma dekara adaene o akeruku de itodokanino o Nili ma akere ma amokika gea idadioka o awunu!

²¹ Ho ma nawoko gea mata-mata ikokihonenge de ma nawoko yodogorofu hiadono o akere mata-mataika imela ho duru ko idadiokaua yaokere o Mesiiri ma nyawa. De o akere idadi o awunu hokogea o Mesiiri ma tonaka ma amokika.

²² Masara ma moioli o Firaunu ai nyawa abe yososawaro yotobamai-maihi ona ahao yapake o heheranga o fufutu ma kuahaino la hiadono onangoo yodiai o awunu ma heheranga imaketero hoka o Musa de o Harunoli yodiai. De o Firaunu ai hininga utuohi idogo itogowini de duru woluku o Musa de o Harunu wahigihene. Ho idadiokali imaketero hoka Ma Jou o Yawe wahingahuokau.

²³ Ho o Firaunu ka wolio dika ai tauika de ai nyawa manga kangela gea ko walegaikaua.

²⁴ De o Mesiiri ma nyawa ahao o humu ma ngoe yomabaiti o Nili ma akere ma datekuku la ka idadi o akere ma doo-dodono yomamake. Hokogea yomahidailako manga akere abe ka idadi yaokere.

²⁵ De o Nili ma akere Ma Jou o Yawe wapohaka o wange tumidino ibooto de ahao adonokali Ma Jou wohiboa manga hohowono moioli.