Huhupu 5 - Ma Jou ai Demo-demo o Totobelohoka

O Musa de o Harunu iwihimanga o Firaunika

¹ O Musa de o Harunu manga hingahu o Isiraele ma nyawaika ibooto de ahao yoikoli o Firaunika la unangoli iwihimanga de iwihingahu. Ho yomahiadono o koanoika de iwihingahu ato, “Mia koano, ngomi naa miboa la minihingahu Ma Jou o Yawe ai demo ngonaika. Ma Jou o Yawe, Una to ngomi o Isiraele ma nyawa mia Jou, de hokonaa ai demo ngonaika wato, ‘Kiani nahigunoa ahi nyawa yohupu o Mesiirino la yoiki o tonaka ma kakaahaika de genangoka yomahuba de yorame-rame Ngohiye.’”

² Masara o Firaunu ka de hokogea woihene de wapaluhu onangika wato, “Onaguna Ma Jou o Yawe, hiadono gea niato kiani ngohi tihigihene! Ngohi duru ko tihiorikua Ma Jou o Yawe gea de ko tahigunoaua o Isiraele ma nyawa ahi tonaka yanoa!” Hokogea o Firaunu duru wahiree-reeika.

³ De manga horomati o Harunu de o Musa ihigalioli unangika ato, “Mia koano hokonaa, Ma Jou gea abe ngomi o Ibarani ma nyawa mimahuba-huba Unangika. De gea Una ma hirete abe woboa womihuloko ngomino. Ho naa mimagahoko ngonaika la ngaro o wange hangeino dika ma dodagi iti ngomi o tonaka ma kakaahaika mihihononga miloikoka angamoi hokogea Ma Jou o Yawe womihuloko la mimahuba Unangika genangoka. Abe nako ngomi ko wiwihingounua ai huhulokika gea done womihohowono de o panyake eko de o humaranga.” Hokogea de manga horomati yomagahoko o Firaunika.

⁴ Masara o Mesiiroka manga koano wataere onangika wato, “Done sarakia de ngini o Musa de o Harunu hiadono niato ahi nyawa natukoro manga karajaanga ma goronaka? Ho naa ibooto niaruwae! Nginioo ahi karajaanga ma nyawa! Ho naa nimataiti nilio nia karajaanga ma ngiika.

⁵ Abeika, duru ko manga ngoe yokarajaanga o Mesiiroka masara ngini niato ona gea niahitogumu manga karajaangino ho naa ibootohi!” Hokogea o Firaunu wataere de ai ngamo ma demo o Musa de o Harunika.

⁶ De duru o wange gea o Firaunu ai pareta kohadubuho moioli wohihupu ma dumutu ona abe yahiatu-aturika o Isiraele ma nyawa. De ona abe yatobahiatu-aturu manga hiribuutu ma karajaangika utu o Mesiiri ma nyawa de utu o Isiraele ma nyawa. De hokonaa ai pareta abe wahidoaka onangika,

⁷ wato, “Ngini abe niahiatu-aturu yokokarajaangika ko idadiokaua niahidoaka onangika o tela ma hisapuru o gandumu ma roehe o gugutukino abe yapake yodiai nanga kota ma tela. Nahuloko la ona ma hirete yomalingiri o redi-redika o gandumu ma roehe abe yoperelu.

⁸ Masara gea manga tela yodiai ufa ikuranga ngaro ka moi dika. Abe biaha o wange moi yodiai hokogea ma ngoe kiani ka hokogenangohi dika yodiai o wange-wangeiye. Marai ona gea manga karajaanga ko yawedonua! Gea ma titi hiadono yomahigogule ngoneino yomagahoko la hahigunoa yoiki manga huhuba yomahihuba manga jouika.

⁹ Ho ngini naa kiani utuohi o nau-nauru manga karajaanga niahidogo. Niaribuutu hiadono manga gahauku duru iuihi! Hokogea hadotoko onangika la ibootoka ona yotobaelu-elukika yaniiki!” Hokogea o Firaunu wahuloko onangika abe ihiatu-aturu ai karajaanga.

¹⁰ Ho o Mesiiri manga balu-baluhu de ona abe yahiatu-aturu manga hiribuutu ma karajaanga gea, yokokiloiki manga huhulokika de yahingahu o Isiraele ma nyawaika gea ato, “Ngomi ko idadiokaua minihidoaka nia tela ma hisapuru o gandumu ma roehino angamoi o Firaunu ko womihigunoakaua minihidoaka nginika.

¹¹ De angamoi ko iwa ngomioka abe ka idadi nimale, ho ngini kiani nimalingiri ma hirete o gandumu ma roehe la nia tela naga ma hisapuru gea. Masara nako nia tela nidiai ngaro moioo de ufa ikuranga. Ho abe o wange-wangeiye biaha nidiai hokogea ma ngoe la imaketero hoka ma dodihiraino nidiai o wange moi.”

¹² Hokogea yahuloko hiadono o Isiraele ma nyawa yomahikabarihoka o Mesiiri ma tonaka ma amokika o gandumu ma agere yomale angamoi o gandumu ma roehe ko iwaka. Angamoi ma dihiraino abe manga biaha yahidoaka o gugutukino ena gea ko yahidoakokaua.

¹³ De ona o Isiraele ma nyawa abe yahiatu-aturu manga gogianongoru manga karajaanga duru de manga dualono yaribuutu onangika hiadono yaboa-boaka manga gogianongoruika ato, “Kiani nimatai-taiti nikarajaanga la o wange moi nia tela ma ngoe ko ikurangua! Kiani imaketero hoka ma dodihirainoli ma ngoe abe ma oraha ona o gandumu ma roehe ka inahidoakohi!”

¹⁴ Masara ngaro hokogea yaribuutu ma, manga tela ko adonokaua ma ngoe abe hoka ma dihiraino. Ho gea o Mesiiroka manga balu-baluhu yangamo ona yahiatu-aturika hiadono duru yapoha-poha onangika. De yaleha onangika ato, “Adodoa ho hiadono o wange hinootoino naa de nia tela ko adonua ma ngoe abe hoka ma dihiraino?” Hokogea yangamo onangika.

¹⁵ Ho o Isiraele ma nyawa gea abe yahiatu-aturu manga gogianongoru manga karajaanga yoiki iwihimanga o Firaunika de iwileha unangika ato, “Mia koano, ngomi naa miboa ngonaino mimahilooa ma kiani mileha ngonaika, adodoa ho hokogea idadi ngomi ani gogilaongo nomihikangela hiadono mia karajaanga ma hasili hoka ma dihirakaua ma ngoe?

¹⁶ Gea angamoi ani nyawa ko imihidoakokaua o gandumu ma roehe ngomino la ani tela minidiai. Ka ihikaika imiribuutu ngomino la utuohi iwoe ani tela midiai hiadono imipoha-poha ngomino. De gea ma titi to ngona ani nyawa manga howono hiadono ani tela gea ko adonokaua hoka ma dihira ma ngoe.” Hokogea iwihingahu o Firaunika.

¹⁷ Masara o Firaunu watemo onangika wato, “Ngini o debeturu ma nyawa! De gea nia debeturu ma titi hiadono nimagaho-gahoko niato, ‘Mia koano nomihigunoa ngomi miloiki o tonaka ma kakaahaika la mimahihuba mia huhuba Ma Jou o Yaweika genangoka.’

¹⁸ Ho naa ko idadiua! Ngini nilio dika nia karajaanga ma ngiika! De ko moiua abe tahuloko la inihidoaka o gandumu ma roehe gea. Masara ma tela nidiai gea kiani imaketero hoka ma dihirali ma ngoe.” Hokogea o Firaunu ai ngamo itagi onangika.

¹⁹ Ka de yoihene abe manga tela gea kiani hoka ma dihirali ma ngoe de duru yohuha ho o Firaunu ai tauino yohupuoka o Isiraele ma nyawa gea abe yahiatu-aturu manga karajaangoka.

²⁰ De naga o Musa de o Harunu yadamaa o Firaunu ai tau ma himangoka la ka idadi yomakamake genangoka.

²¹ Ho ka de o Isiraele ma nyawa manga balu-baluhu gea yomakamake de o Musa de o Harunu de yahigurubungu onangika, ato, “Ngaro ngini inihinooto Ma Jou o Yawe winitailako de winihohowono angamoi ngini ma titi hiadono o kangela naa imiohana ngomi! Ngini nimihidadi hoka o mela dika o Firaunu de ai popareta ma nyawa manga himangoka! Ma titi ti ngini nia demo hiadono ngomi yoigo imitoma!” Hokogea manga gurubungu ma demo o Musaika de o Harunika.

²² De o Musa womaniata Ma Jou o Yaweiye wato, “Ahi Baluhu, adodoa ho to Ngona ani nyawa manga kangela ka nahidogo dika? Adodoa ho nohihidingoto ngohi la toboa nenangino?

²³ Ka de ngohi tomahiadono nenangoka de o Firaunu titutumu de ahi nyawa manga kangela gea o Firaunu wohidogo. Ngohi todadi to Ngona ani uru ma dodofanga unangika masara to Ngona ani nyawa ka hiadono ma oraha naa de ko naduhunuahi la nahihupu manga kangelaino.” Hokogea o Musa ai huha womahingahu Ma Jouika.