Huhupu 36 - Ma Jou ai Demo-demo o Totobelohoka

O Isiraele ma nyawa manga garagoka de aino manga hidoaka Ma Jou ai Tau o Ngoerino yomulaenge yodiai

¹ Abe o Musa wato, “Ho o Besalee de ai duduhunu o Holiaba de ona mata-mata abe yososawaro abe manga hiakunu Ma Jou o Yaweino, gea ona abe ahao yodiai Ma Jou ai Tau o Ngoerino de to ena ma kiahonanga mata-mataika. De ona gea Ma Jou wahiakunu ho to Una ai tau de ma kiahonanga kiani yodiai duru yaniiki imaketero abe hoka Ma Jou wohibehehongoka.” Hokogea o Musa wahingahu o Isiraele ma nyawaika la duru ihioriki itararono Ma Jou ai karajaanga ma hiaturu.

² De ahao o Musa wahoko la yomatoomuino o Besalee de o Holiaba de ona mata-mata abe onangoo yososawaro de manga hiakunu Ma Jou o Yaweino. Iti ona dika abe duru yoigo yokarajaanga yodiai Ma Jou ai Tau gea ona watoomuino.

³ De ahao o Musa wahidoaka onangika o Isiraele ma nyawa manga hidoaka mata-mata abe yahidoaka la Ma Jou ai Tau yodiai. Masara ahao o Isiraele ma nyawa o ngoru-ngorumiye manga hidoaka, abe manga igoka dika de aino, ahao utuohi ilamoko yototaka o Musaino.

⁴ Ho hiadono ona yotobakarajaanga gea manga karajaanga yanoaika jai-jai de yoiki yomahingahu o Musaika ato,

⁵ “Musa, manga hidoakino ifoloioka ho kiani ngona nahingahu nanga gogianongoruika manga hidoaka yawedonoka ka hiadono ngomi miabooto Ma Jou ai Tau ma karajaanga abe womihibehehongoka. Hokogea Musa, kiani nahingahu onangika.”

⁶ Ho ahao o Musa wahidingoto ai huhuloko la yahingahu o nyawa mata-mataika abe ai hingahu wato, “Ngini ngaro o nau-nauru eko o ngo-ngofeka ma, kiani nihioriki abe nia hidoaka gea yawedonoka la Ma Jou ai Tau hodiai ho ngaro ibootohi nitotakohi ngohino nia hidoaka gea.” Hokogea o nyawa yahitogumu manga hidoaka Ma Jouika.

⁷ De hokogea o Musa wahuloko angamoi abe yoperelu la ka hiadono manga karajaanga yabooto gea yatilakuroka ma ngoe ma kiahonanga.