Huhupu 31 - Ma Jou ai Demo-demo o Totobelohoka

O Besalee de o Holiaba to ona manga karajaanga

¹ De Ma Jou o Yawe ka wihingahuohi o Musaika daku o lokuoka ma hiaturu abe onagona ahao yokarajaanga yodiai to Una ai Tau o Ngoerino wato,

² “Abeika, Ngohi tiirikoka womatengo la una gea watagongo ahi Tau o Ngoerino ma karajaanga. Una o Besalee, o Uri ai ngofaka, ho o Huuru ai danongo, de to Yehuda ai toforauku.

³ Ngohi tihilufungu de Ma Jou o Womaha de tihiakunu de o tobahioriki de o sosawaro la wodiai o kiahonanga irupa-rupa de ma bungaka abe Ngohi tinihibehehongoka la nidiai.

⁴ Abe o Besalee gea duru wohioriki wotutuku itiai o gurasi, de o haaka, de o tabaaga abe ihisapuroka de o hori. De o kia dika abe wotutuku ibooto ena gea duru una wososawaro wodimo-dimo de worogi-rogi.

⁵ De wohiorikoo wapelaka o hakaru ma leto-letongo de ahao o kia naga wapake wohiehe la duru inouhu ma hakaru gea de wodilongo la idadi duru irahai. De ngaro o gotaoo ma enangoo duru wohioriki wodiai ma hapa irupa-rupa. Abe o Besalee gea ngaro ma kiahonanga ma hohailoa mata-mata ka unangohi wososawaro wodiai de ma bunga-bunga de ma dimo-dimo. Ho gea una abe tiirikoka la wahiaturu ahi Tau o Ngoerino ma karajaanga.”

⁶ “De womatengoli o Holiaba unangoo tiiriki la wodadi o Besalee ai duduhunu. O Holiaba gea una abe o Ahisama ai ngofaka, de o Daana ai toforauku. De naga o nyawa manga ngoe abe onangoo Ngohi tahiakunu hiadono duru yososawaro yodiai o kiahonanga ma hohailoa de duru irahai. Ona gea ka idadi yodiai mata-mata ahi tau ma kiahonanga abe Ngohi tinihibehehongoka nginika.

⁷ Abe ona ahao yodiai ahi Tau o Ngoerino, de ahi Behehongo ma Peti, de to ena ma dadamunu abe o Hikadame ma Ngi, de ma kiahonanga mata-mata abe kiani naga ahi Tau o Ngoerino ma goronaka.

⁸ Ho naga ma meja de to ena ma kiahonanga, de o hilo ma ngi o gurasi ma dutuino de to ena ma kiahonanga, de o manyanyi ma huhuba ma ngi.

⁹ De ona yodiaioo ma kiahonanga o tabaagaino abe ahao niakelenga Ma Jou ai Tau ma loaka abe o huhuba ma haharongo ma ngi abe o aewani yahihuba genangoka. De yodiaioo ma kiahonanga mata-mata abe yapake hoka ihitaulu ma uku de yaharongo ma huhuba. De manga gigihoro ma akere ma ngi de to ena ma gogogere abe enangoo yodiai o tabaagaino abe ihisapuroka de o hori.

¹⁰ De onangoo yotagongo o Harunu de ai ngofa-ngofaka manga pakeanga duru ma rorahai abe enangoo ihidingaka Ngohino. Ho ngaro manga pakeanga manga badangika idateke eko manga pakeanga doka ma poretino idateke masara mata-mataika abe yapake ma oraha ngini inihidemo Ngohiye, kiani o Besalee de o Holiaba de manga nyawa yodiai mata-mata.

¹¹ De onangoo yatagongo yodiai o debi-debini ma minya abe niapake o nyawaika de o kiahonangika abe niatingaka Ngohino. De gea ona abe yodiaioo o manyanyi ma bounu duru irahai gea abe niapake o Debi-debini ma Tau ma goronaka. Abe ona kiani yaniiki duru ihidodiai ahi hiaturu onangika abe Ngohi naa tonihingahuokau.” Hokogea Ma Jou wihingahu o Musaika.

O Hiaini ma wange ma hiaturu

¹² O Musa nagahi daku o lokuoka gea de Ma Jou o Yawe wihingahuohi o Musaika ma titi o Hiaini ma wange ma hiaturu wato,

¹³ “De Musa kiani ngona nahingahu o Isiraele ma nyawa mata-mataika abe o Hiaini ma wange Ngohi tomadingakoka ho nginioo kiani nimadingaka la, ka ma wange genangohi nia horomati ilamoko enangika. De ngaro o kia dika nihititi la niapake o Hiaini ma wange masara ko idadiua. Mangale o Hiaini ma wange idadi to ngone nanga behehongo ma dodunguu ka hiadono nia totoforauku. Abe ka de ma wange gea adono de ngini nianiiki ma hiaturu la gea nginioo nimahihohiningaoo ma titi gea Ngohi dika Ma Jou o Yawe abe ka idadi tinihitebini nia howonino.”

¹⁴ “Ho gea ma titi ngini nianiiki o Hiaini ma wange angamoi idadioka o debi-debini ma wange nginika. De onagona dika abe o wange gea yaniiki ihowono hiadono yokarajaanga biaha dika de ahao kiani ona niahohowono hiadono yohonenge.

¹⁵ Angamoi naga o wange butaanga abe ngini ka idadi nikarajaanga masara ka de ma wange tumidoka de adonoka o Hiaini ma wange abe Ngohi Ma Jou o Yawe tomadingakoka la nia hininga ma dumutu duru Ngohino dika. Ho onagona abe yokarajaanga o Hiaini ma wangeoka kiani ona niahohonenge.

¹⁶ Hokonaa ngini o Isiraele ma nyawa de Ngohi Ma Jou homahiketehibehehongo abe ngini nianiiki o Hiaini ma wange ma behehongo naa de kiani ka ihikaika nianiiki ka hiadono nia totoforauku.

¹⁷ Abe o wange gea idadioka o dodunguu Ngohino de nginikaoo abe ngini naa tomadingakoka Ngohino de o Hiaini ma wange ihitunguu abe ngini nidadioka to Ngohi ahi nyawa. Ho o Hiaini ma wange ma behehongo naa kiani ngini o Isiraele ai totoforauku nianiiki ka hiado-adonika.” “De angamoi Ngohi Ma Jou o Yawe totulaada o dunia de o dihanga mata-mataika de o wange butaanga dika de tabootoka. Ho de o wange tumidoka de gea Ngohi Ma Jou o Yawe ko tokarajaangokaua ho tomahiaini.” Hokogea Ma Jou ai hingahu ma demo ma baha o Musaika.

¹⁸ Ho ka de Ma Jou o Yawe wabooto wihingahu o Musaika o Sinai ma lokuoka de ahao wihidoaka unangika manga behehongo ma titi ma hakaru. Gea o hakaru hinooto ma baka-baka abe genangika de to una ai hagaraara Ma Jou wohitulihi ai pareta ngimoi.