Huhupu 28 - Ma Jou ai Demo-demo o Totobelohoka

O Harunu de ai ngofa-ngofaka yahidadi manga hohidemo la o Isiraele ma nyawa yahidemo Ma Jouika, ho kiani yodiai manga pakeanga abe yahitunguu manga leleani

¹ De ahao Ma Jou wihingahuohi o Musaika wato, “De naga nginioka abe ahao tahidadi ti ngini nia hohidemo abe to ona manga tagongo inihidemo Ngohino. De ona gea Ngohi tairikokau abe to ngona ani riaka o Harunu de ai ngofaka yaiata o Nadaba, o Abihu, o Eleasara de o Itamara. Ho ona abe kiani ngona nahokino la ngini ahao niadingakino Ngohino la yodadi o hohidemo abe Ngohiye. Ho ona gea ahao ihileleani Ngohi abe inihidemo ngini o Isiraele ma nyawa Ngohiye.

² Ho naa kiani ngini niahidiai ani riaka de to una ai ngofa-ngofaka manga pakeanga duru ma rorahai abe yahitunguu manga leleani ma debi-debini la o nyawa mata-mataika duru de manga horomatioka onangika.

³ Ho nia nyawa abe ka onangohi Ngohi tahiakunu onangika abe manga sosawaro yaguriti o pakeanga abe duru ma rorahai, kiani gea ona nahikarajaanga. De ahao ngona nahingahu onangika ma hiaturu abe hokokia yodiai ani riaka de ai ngofa-ngofaka manga pakeanga abe yahitunguu manga leleani Ngohino. De nako ani riaka o Harunu naga to una ai pakeanga utu abe ka una dika wapake.

⁴ Abe nako to una dika ai pakeanga niwiguriti kiani naga ai alu ma dadatoko, de to una ai baju ipelaka arigumuruku abe enangoo iwihitunguu iwidingakoka Ngohino, de ai baju ma guru-gurutuku abe de ma panga de ihiduguriti ma barenoka ai dodunguu utuohi. De naga moioli o Harunu ai pea ma nyore-nyoreoko ma dodunguu. De manga pakeanga abe una de ai ngofa-ngofakoo yomahinoauku, gea manga pakeanga abe manga badangika idateke, de manga baju ma poretoka idateke, de to ena ma bulu iwoata o ngoerino. De manga peaka ona kiani yomatuaaoko.

⁵ De ona yososawaro o pakeanga yoguriti kiani manga pakeanga mata-mata gea yodiai de o lawe ma alu-aluhu, de ma bunga-bunga yoguriti de o lawe abe yodiai o gurasino, de o lawe o domba ma gogoino abe yatonokau o solouku abe ma bihi-bihi ma dutu, de utu ma solo ma wuu-wuuku, de utu ma solo ma doka-dokaruku.” Hokogea Ma Jou ai hiaturu ma titi o Harunu de ai ngofa-ngofaka manga leleani ma pakeanga.

²⁹ De Ma Jou wihingahuohi o Musaika ma titi ai riaka o Harunu ai karajaanga, wato, “De o Harunu ka de una wowohama o Debi-debini ma Ngiika de o Isiraele ma nyawa manga dutu yangimoi de yahinooto onangoo manga romanga wakokiaoino angamoi o Isiraele ai ngofaka yangimoi de yahinooto. De manga roma-romanga naga ai alu ma dadatokoka abe ka ihikaika idadi o hohininga Ngohi Ma Jouika. De ai alu ma dadatoko gea o Harunu wapake la ka idadi wamake to Ngohi Ma Jou o Yawe ahi hininga o Isiraele ma nyawaika.

³⁰ De naga o hitararono de o hitotiai ma dodunguu ma kiahonanga abe enangoo kiani o Harunu wonoa ai alu ma dadatoko ma juberauku. Abe ma kiahonanga gea una de ai ngofa-ngofaka yapake la ihitunguu nako to Ngohi ahi hininga adaene eko ko adaenua ma oraha yomaputuhu manga hiaturu o Isiraele ma nyawaika. Ho ma oraha o Harunu wowohama Ngohi Ma Jou o Yawe ahi himangino de o hitararono de o hitotiai ma dodunguu ma kiahonanga gea kiani naga to una ai aluoka. Hokogea o Harunu ka ihikaika wao ma dodunguu ma kiahonanga gea ma oraha una naga Ngohi Ma Jou o Yawe ahi himangoka.”

³¹ “De to Harunu ai baju ma guru-gurutuku abe ipelaka hinootoka arigumuruku, abe iwihitunguu iwidingakoka Ngohi Ma Jouino, kiani o ngoere ma bihi-bihino dika yodiai.

³² De daku nidiai ma baju ma tomarino abe niodumo ma lawe ma hai-haiti la ma ngoere ipirini de ufa itaiti ma lawe itoaka.

³³ De niodiaioo ma rupa hoka o delima ma hofoko de o lonceng ma hohumuduru la ena gea nihiduguriti ai baju dau ma barenino la ena mata-mata idii-dideuku la ma oraha wotagi-tagi de naga ma ilingi ai bajuoka. De ma didide ma rupa o delima ma hofoko nidiai o laweino abe duru iputurungu de niatonoka o solouku abe ma bihi-bihi ma dutu, de utu ma solo ma wuu-wuuku, de utu ma solo ma doka-dokaruku. De nako ma lonceng ena gea mata-mata kiani nidiai o gurasi ma dutuino.

³⁴ De ma oraha nihiduguriti de gea nihikokatoaka o delima ma hofoko de ma lonceng ai baju dau ma barenino.

³⁵ De o Harunu ai baju gea kiani wapake ma oraha wohileleani. De ai baju ma lonceng ma ilingi idadi ai dodunguu abe o nyawa ka idadi yoihene ma oraha wowohama de wohupu Ngohi Ma Jou o Yawe ahi himangino o Debi-debini ma Ngioka abe Ngohi tomadingakoka. De nako o Harunu ai baju gea ka ihikaika wapake ma oraha wohupu wowohama wohileleani, gea una ko wohonengua.” Hokogea Ma Jou ai hiaturu ma demo abe kiani o Musa wohidodiai waniiki.

^36-37 De Ma Jou wohigila-gila ai hiaturu ma demo abe ma titi manga hidemo ai pakeanga, wato, “De o Harunu ai pea ma nyore-nyoreoko kiani iwihidiliko de ai tuaa ma dodunguu o gurasi ma dutuino de ma dulihi ma demo, ‘Ma Debi-debini Ma Jou o Yawe ai Himangoka.’ Ma dodunguu nidiai ma rupa hoka o ban ma haeke ma kiani hatoli ikurutu de ahao ai tuaa ma riwoto ma datekoko iwihidapakiti de o ngoere ma bihi-bihi abe yobuludioka.

³⁸ Hokogea ka ihikaika womahitunguu ai pea ma nyore-nyoreoko abe watagongo manga medebini Ma Jouika ma oraha manga huhuba wahihuba Ma Jouika. Mangale ma dodunguuoka ma dulihi, ‘Ma Debi-debini Ma Jou o Yawe ai Himangoka,’ de ma titioka abe nako ma oraha yomahuba de naga yodiai ihowono Ngohino, gea o Harunu wamoku ma hohowono gea. Ho o Harunu ka ihikaika womahidodiai abe ma oraha o Isiraele ma nyawa manga huhuba wahihuba Ngohi Ma Jou o Yaweino la ma oraha yomahuba de Ngohi ka idadi ai nyawa tadafongo.”

³⁹ “De o Harunu ai pakeanga gea kiani niodiai de o lawe ma alu-aluhino to una ai baju ma guru-gurutuku abe to ena ma panga enangoo ma guru-gurutu. De hokogenangoli ai tuaa nidiai de o lawe ma alu-aluhino abe ma rupa hoka womahipakitino. De nako ai goronaino ma bulu gea kiani o nyawa yodiai abe duru yososawaro yoguriti ma bunga-bunga.” Hokogea Ma Jou wohiaturu la o Harunu ai pakeanga yodiai duru imakadaene de Ma Jou ai mau. De ahao wihingahuoo o Musaika abe hokokia kiani o Harunu ai ngofaka yaiata manga leleani ma pakeanga yodiai, wato,

^40-42 “De kiani ngini niadiaioo to Harunu ai ngofa-ngofakoo manga pakeanga. Ho to onangoo manga baju ma guru-gurutuku, de manga goronaino ma bulu, de manga sapeo naga la onangoo manga rupa yorahai hiadono o nyawa manga horomati naga onangika. De manga pakeanga gea abe yahitunguu manga medebini ahi himangoka ho niadiai to ona manga pakeanga abe manga badangika idateke de enangoo o lawe ma alu-aluhino nidiai de kiani ma duduga manga goronaka de auku hiadono manga bukuino la duru manga bululunu yatatokoka.” “De gea manga pakeanga mata-mata yadiai ibooto de ahao naga ma oraha abe ngona, Musa nahinoa o Harunika de ai ngofa-ngofakika. De ma oraha manga pakeanga gea nahinoaka onangika de kiani nale o minya abe ihidingakoka Ngohino de gea ena nagopoa manga peauku ka ma moi de o hingahu ma demo ma titi o hohidemo manga karajaanga. Hokogea ma dodunguu abe ona natingakoka Ngohino la ihileleani. Abe manga leleani ma karajaanga hoka ona yahihuba ti ngini nia huhuba Ngohiye de ngini mata-mataika inihidemo Ngohino.

⁴³ De manga pakeanga ma guru-gurutuku gea kiani ka ihikaika yapake abe ma oraha yowohama ahi Ngi ma Debi-debinoka de ma oraha yahihuba o nyawa manga huhuba ahi haharongo ma huhuba ma ngioka. De ma oraha yodoaiye o haharongo ma ngioka de ufa o nyawa yabawilika de yamake abe ko itiaiua ona yomalega genangika. Ho nako manga pakeanga gea ko yapakeua gea yahowono Ngohino de hiadono Ngohi tahohonenge. Ahi hiaturu naa ko iwa ma dogumu o Harunu de ai ngofa-ngofakika ka hiadono ai totoforauku.” Hokogea Ma Jou wihibehehongo o Musaika.