Huhupu 26 - Ma Jou ai Demo-demo o Totobelohoka

Ma Jou wahingahu abe ai Tau o Ngoerino ma goronaka yokabatingi de o ngoere de hokokia yakelenga ma kiahonanga

^31-33 De Ma Jou wohigila-gila ai hingahu o Musaika wato, “De Musa, ahi Tau o Ngoerino doka ma goronaka mata-mataika o Debi-debini ma Ngi masara kiani ngini niokadingaka de niobatingi de o ngoere abe niadide. Hokogea niobatingi de ma hononga abe o ngoranino niwohama nihiromanga o Debi-debini ma Ngi. Masara dokali ma honongaka abe ahi Peti genangoka ena gea ngini nihiromanga o Debi-debini ma Ngi abe Ngohi Ma Jou Tomadingakino. De ma dadatoko o ngoerino gea kiani ona abe duru yososawaro yapake yodumo de o lawe ma alu-aluhu de o lawe o domba ma gogoino abe niatonoka o solouku abe ma bihi-bihi ma dutu, de utu ma solo ma wuu-wuuku, de utu ma solo ma doka-dokaruku. De kiani o dadatoko ma ngoere gea yoguriti ma bunga-bunga ma rupa hoka o malaekata o Kerubu abe ka enangohi de ma kuahaka. De la ka idadi niadide ma ngoere gea kiani niodiai o liate iata o akasia ma gotaino abe niahawoka de o gurasi ma dutu. De o liate gea amomoiika nidiai de ma lalaketoka abe enangoo o gurasino. Ma liate iata gea nidiai ibooto de ahao amomoiika nihigoko la ma lifunu nihipasi o liate ma nanaouku abe nidiai o haakaino. Ho ka de o dadatoko o ngoerino gea niadide ibooto de gea nihikatingakoka o Debi-debini ma Ngi de o Debi-debini ma Ngi abe Ngohi Tomadingakino. Ho ahao o Behehongo ma Peti niakelenga abe doka o Ngi ma Debi-debinoka abe enangohi tomadingakoka Ngohino.

³⁴ Ho gea ahi Peti nihingohama o Ngi Tomadingakoka gea ibooto de ahao o Peti ma dadamunu, abe ena gea idadi o hikadame ma ngi, niakelenga ahi Behehongo ma Peti ma lokuoka.

³⁵ De doka ma honongakali ahi Tau ma kiahonanga utu niakelenga genangoka de hokonaa ma hiaturu: Nako o meja, abe ka ihikaika naga o roti ma lokuoka la de ma roti gea tomahitunguu Ngohi naga ka ihikaika nginioka, ma meja gea niakelenga ma nirakoka la ma oraha niwohama de ka ihikaika ena gea nagau genangoka. De ma hilo abe naga ma posi o gahumu tumidi niakelenga nia gubadioka la imarihimangino de ma meja. De ka ihikaika kiani ahi Tau o Ngoerino nihigoko la ma oraha niwohama de niohimanga o wange ma dumuniha.”

³⁶ “De ahi Tau o Ngoerino ma ngorana abe genangino niwohama, enangoo de ma dadatoko o ngoerino abe niadide genangoka. De enangoo nidiai o domba ma gogoino de o lawe ma alu-aluhu abe niobuludioka la de ena gea ona yososawaro yodumo de yoguriti ka idadi yodiai de yoguriti ma bunga-bunga. De o lawe ma alu-aluhu de o lawe o domba ma gogoino niapake dika abe niotonokau o solouku abe ma bihi-bihi ma dutu, de utu ma solo ma wuu-wuuku, de utu ma solo ma doka-dokaruku.”