Huhupu 20 - Ma Jou ai Demo-demo o Totobelohoka

¹ De ahao Ma Jou wahibehehongo o Isiraele ma nyawaika hokonaa wato,

² “Ngohi naa Ma Jou o Yawe abe ti ngini nia Jou, de gea Ngohi tinihihupu o Mesiiri ma tonakino abe ona genangoka inihidadi manga huhuloko de manga hiaturu nginika duru kohadubuhoholi. Ho naa Ngohi tinihidoaka nginika ahi pareta naa:

³ Ngini ko idadiua nimahijou utuika angamoi Ngohi dika ti ngini nia Jou.

⁴ Ngini ko idadiua nimadiai nia pangao o kia dika ma rupa ma, gea ena ko idadiua. Ngaro nianiiki nihirupa-rupa o kia dika naga o dihangoka, eko o duniaka, eko o akere de o gahi ma goronaka, eko o tonaka ma timiuku, ma, ko idadiua mata-mata.

⁵ Abe ngini ka ihikaika moioo de ko idadiua nimahuba eko nimaponuku o popangaoika angamoi Ngohi naa Ma Jou o Yawe ti ngini nia Jou. De Ngohi todohata o pangaoika ho gea ngini tinigoana done genangino naga inihikatingaka Ngohino. De ma titi o nyawa ihidohata Ngohino hiadono hokogea yodiai de ona gea ahao tahohowono ka hiadono manga totoforauku yolape hangeuku de yolape iatuku.

⁶ Masara ona abe ihihingounu Ngohi de yaniiki ahi pareta ahao onangika tadora hiadono manga gawo ma pukuku de hiadono yolape o sana moiuku manga ngoeuku.”

⁷ “Ngohi Ma Jou o Yawe ti ngini nia Jou de ngini ko idadiua ahi romanga nimahigogule. Ho ngini abe ahao ahi romanga Ma Jou o Yawe niawea-weara de ahao Ngohi tinihohowono.”

⁸ “Ngini kiani niohohininga o Hiaini ma wange nihikatingaka o wange utuino la ma wange gea nia horomati itagi Ngohino.

⁹ O wange butaangaino gea Ngohi tinihidoaka nginika la nia karajaanga mata-mata nimakarajaanga.

¹⁰ Masara ka de adono ma wange tumidi de nia karajaangino nimahiaini. O wange ma tumidi gea Ngohi tomadingakoka ho nginioo kiani niodingakoka la nihitunguu nia horomati Ngohino Ma Jou o Yawe ti ngini nia Jouino. Ho ti ngini nia karajaanga nimahiaini ngaro ngini de nia ngofa-ngofaka o nauru de o ngofeka, de nia nyawa o duduhunu ngaro o nauru de ngaro o ngofeka, de nia aewani, de o nyawa ma homoaino abe yogogere nginioka, ma, ona mata-mataika kiani yomahiaini.

¹¹ Ngohi o wange butaangaino totulaada o dunia de o dihanga de o gahi, de ngaro to ena ma dola mata-mataika, masara gea mata-mata o wange butaangaino dika de tabootoka totulaada. Ho de ma wange ma tumidi gea ko totulaadokaua ho ma wange gea Ngohi tohiowa de duru tomadingakoka Ngohino ho ma wangeoka gea ona yamake ma owa abe manga hiaini ihititi manga horomatioka Ngohino.”

¹² “De ngini kiani de nia horomati nia babaika de nia memeika hiadono niahingounu de niao irahai la nia ngumuru ikurutu nia tonakoka abe Ngohi Ma Jou o Yawe ti ngini nia Jou tinihidoaka nginika.”

¹³ “Ngini ko idadiua o nyawa niatoma.”

¹⁴ “Ngini ko idadiua nimakitigi de o nyawa ngaro onagona dika nako ko nia fekatua eko ko nia rokatua.”

¹⁵ “Ngini ko idadiua nitohiki.”

¹⁶ “Ngini ko idadiua o nyawa niadofa-dofanga de niahiade-ade itorou.”

¹⁷ “Ngini ko idadiua niohafini o nyawa utu manga tau, eko manga fekata, eko manga duduhunu o nauru eko o ngofeka, eko manga hapi, eko manga aewani utu, de ngaro to ona manga kia dika naga, ma, ko idadiua niohafini enangika.” Hokogea Ma Jou ai pareta ngimoi o Isiraele ma nyawaika.

O Isiraele ma nyawa manga hawana naga Ma Jouika

¹⁸ Ka de o nyawa mata-mata gea yoihene ma kuruuhu de o guguli ma ilingi kohaamokiye gea, de yamake o leletongo de ma loku yahawoka de o nofo hokogea, de duru yokokihawana ka hiadono yokokifafara ho yomatingaka ma gurutika.

¹⁹ De ona yogahoko o Musaika ato, “Musa, kiani ngona dika nomitemo ngomino de minitotoihene. Masara ufa nihigunoa la Ma Jou womitemo ngomino done mihonenge.”

²⁰ De o Musa wapaluhu onangika wato, “Ngini ufa nihawana! Ma Jou ko winihohonengua ma winitaili dika. Una hokogea woboa de ai dodunguu la winihimatoko ai buturungu abe inihiheranga la igoungu niwimodongo Unangika. De nia modongoka gea irahai la gea ena ka ihikaika iniduhunu la ufa niahowono Unangika.” Hokogea o Musa wahitararono onangika.

²¹ Masara ona ko yomahitiginokaua ho ko manga gurutika yomatingaka. De o Musa una dika womahitigika o loku ma nofoika abe yahawoka gea duru idadioka o fufutu. De Ma Jou naga o fufutu ma goronaka gea.

²² De ahao Ma Jou o Yawe wihibehehongo o Musaika wato, “Musa, ahi demo o Horogaino naa kiani nahingahu o Isiraele ma nyawaika hokonaa, ‘Ngini de nia lako niamake ahi dodunguu abe ihihitaana Ngohi Ma Jou o Horogaka de tauku toboa la tinitemo nginika.

²³ Ho ngini kiani ka ihikaika nimahuba Ngohino de nimahihohininga abe ko tinihigunoaua nimadiai o popangao o haakaino eko o gurasino la enangoo genangika nimahuba.’

²⁴ ‘De ma oraha nimahuba Ngohino kiani niapake o huhuba ma ngi abe nimadiai ka o tonakino dika. De ahao nia domba de nia hapi abe nimahihuba Ngohino ka hiadono itinoka gea ena niatufuku o huhuba ma ngi ma lokuoka gea. De ti ngini nia dame ma huhuba abe nimahihuba la nia gogao Ngohino niapaliara, enangoo ka idadi nimahihuba nia huhuba ma ngioka abe nidiai o tonakino gea. Hokogea Ngohi tinihiaturu la ahi romanga utuohi o nyawa yagorakiye de manga horomatioka. Ho nako ahi behehongo naa nianiiki, ngaro o kiaka dika niaika ma, Ngohi ahao toboa nginika de tinihiowa.

²⁵ De nako to Ngohi ahi huhuba ma ngi nidiai o hakaruino, gea ka idadi. Masara iti ufa nia papawa eko nia alata utuoli niapake ma hakaruika done niahowono Ngohino de ma huhuba ma ngi gea taetongo ko itebinua ahi himangoka. Ho ma oraha nimadiai ma huhuba ma ngi de ufa ma hakaru gea niapawa eko niapakoro, masara kiani niagoraka de niafafo dika la idadi o huhuba ma ngi.’

²⁶ ‘De nako to Ngohi ahi huhuba ma ngi ufa nidiai ikurutiye hiadono done naga ma ngute la nidoaiye nimahuba. De ma howono hokogea nidiai mangale ma titi done o nyawa naga nia timiuku abe ka idadi ahao yamake nia mamaleke ma oraha nidoa.’ Hokogea Musa, ahi behehongo onangika, abe kiani ngona nahingahu ahi nyawaika.”