Huhupu 16 - Ma Jou ai Demo-demo o Totobelohoka

Ma Jou wahidoaka manga inomo o totaleo o puyu de o mana

¹ Yomahidodogumu o Elimoka gea de ahao o Isiraele ma nyawa yosoboli yogila-gila de yowohama o Sini ma tonaka ma kakaahaika. De ona yohupuoka o Mesiiroka adonoka manga mede moi de manga wange ngimoi de motoa de ahao yomahiadonika o Elimi de o Sinai ma loku ma hidogoronaka de genangoka de manga inomo duru yahikurangoka hiadono manga hininga yokokihuha.

² De duru yomulaenge yahigurubungu o Musa de o Harunika ma titi yahikurangoka manga inomo.

³ Ho manga hininga imulaenge itipoko de yokurubungu ato, “Adodoa ho ngini nimiao nenangino? Nako Ma Jou o Yawe woigo womihohonenge koaho ka o Mesiirokahi dika de womihohonengoka. Angamoi doka o Mesiiroka miakelengauku mia hidogoronaka o bohoko aoma-omangiye de o aewani ma roehe de naga o roti ho miolomo ka hiadono duru imipunuhoka. Masara abeika nenangoka abe nimiaoino, o kiaka nanga inomo? Ngini nimiao nenangino la ngomi mata-mata mikokihonenge ma titi o hafini.” Hokogea yahigurubungu o Musa de o Harunika.

^4-5 De manga demo gea Ma Jou o Yawe woihene de ahao wihingahu o Musaika wato, “Abeika, Ngohi ahao tapuraraha nginiuku o roti o Horogaka de auku la ka idadi gea ena nia inomo. Ho naa ka idadi ti ngini o Isiraele ma nyawa nia inomo nimagoraka dika de gea ena iniwedono ngini mata-mataika masara naga ma hiaturu abe kiani nianiiki. Ho nahingahu ani kokawaahaika abe o wange-wangeiye gea manga doomu ma goronaino yohupu yomale manga inomo abe yawedono duru o wange moi dika, ufa ifoloi. Hokogea manga inomo ma hiaturu yaniiki o wange motoaino masara o wange ma butaanga gea kiani yomadoraka o inomo abe yawedono hiadono o wange hinootoino. Hokonaa tohiaturu la tatailako ahi nyawa manga hingounu abe ahi hiaturu naa yaniiki itiai eko yaniiki ko itiaiua.” Hokogea Ma Jou wihingahu o Musaika.

⁶ De ahao o Musa de o Harunu manga kokawaaha yatoomuino de yahingahu o Isiraele ma nyawaika gea ato, “O wange ilobioka de ahao ngini duru nihioriki de itararono abe ko ngomiua minihihupu o Mesiiri ma tonakino masara Ma Jou o Yawe gea Una winihihupu.

⁷ De ahao o ngorumino de ngini niakokimake Ma Jou o Yawe ai medebini ma dararono abe wonahimatoko ngoneino. Ngini nimihigurubungu ngomino masara ngini o wange naa nenangoka ko ma titiua ngomioka de aino. Ho igoungu nia gurubungu ma demo ma dumutu Ma Jou o Yaweika angamoi gea Una winiao nenangino de nia gurubungu ma demo gea woihene.

⁸ Ho ngini ahao winihidoaka o roehe abe ka idadi niaolomo o futu naa. De ahao o ngorumino de winihidoakoli o roti hiadono duru inikokiwedono homoi-homoiika o roehe de o roti. Ho de gea ena wodiaioka de duru winihitararono nginika abe ma titi o kia dika niakurubungu ngaro ufa de ngomino nimihigurubungu angamoi nia gurubungu ma demo gea ma dumutu duru Ma Jou o Yaweika!” Hokogea o Musa de o Harunu yahingahu ona mata-mataika.

⁹ De ahao o Musa wihingahu o Harunika wato, “Ngona naa kiani nahitararono ona mata-mataika abe iwihigurubungu Ma Jou o Yaweika. Ho naa nahuloko la ona yomatoomuino yomariidi Ma Jou o Yawe ai himangoka angamoi woihenoka manga gurubungu ma demo.” Hokogea wihibehehongo ho o Harunu wodiai.

¹⁰ Ho o Harunu watoomuino o Isiraele ma nyawa gea de ma oraha ka watemohi onangika de yolega doka o tonaka ma kakaahaika abe genangoka o lobi ma lou abe yahihira-hira. De duru manga lako ma dumutu ka enangika dika angamoi o lobi gea duru ihailoa de ma dararono angamoi Ma Jou o Yawe ai medebini ma dararono wohipootekika o lobi ma goronaka gea.

¹¹ De Ma Jou o Yawe wotemo o Musaika wato,

¹² “Musa, Ngohi toihenoka o Isiraele ai totoforauku manga gurubungu ma demo gea. Ho naa ngona nahingahu onangika ahi demo naa, nato, ‘Ngini bootino o wange ilobioka de ahao niamake o roehe de gea ena ka idadi niaolomo. De ahao itebini o ngoru-ngoruminoli niamake o roti abe ka idadi niaolomo hiadono ka idadi inikokipunuhoka. Hokogea Ngohi Ma Jou tomahitaana nginika abe Ngohi naa Ma Jou o Yawe ti ngini nia Jou.’ Ho ngona Musa kiani ahi demo gea nahingahu onangika.”

¹³ Ho ipahaino abe ma wange ilobioka de naga o totaleo, ma romanga o puyu, duru kohangoe iboaino hiadono ka yaderefeuku o Isiraele manga tau-tauino mata-mataika ho ka hiadono akokitamunoka de o totaleo gea. De ma ngoru-ngorumino naga o gagini yodiriiuku o tonaka ma lokuoka.

¹⁴ De ka de ma akere gea ihagaka de itiriiuku o lape moi o tonaka ma lokuoka manga roti abe ma rupa hoka o nawoko ma unafa ma mangaluhu. De gea ena idadi manga inomo.

¹⁵ Ho de o Isiraele ma nyawa yamake gea de ko ihiorikua o wani o kia gea hiadono yomakokeleha ato, “O mana?” Abe de to ona manga demo ma titi, “Ka o wani o kia naa?” De o Musa wahingahu onangika wato, “Gea ena Ma Jou wonahidoaka to ngone nanga inomo.

¹⁶ De Una wonahulokoka la homadoraka de naga de ma dudugaka. Ho ngini ma inomo naa nimadoraka ka hiadono nimakegetongo la homoi-homoiika niamake o litere ahohinooto la gea inikokiwedono nia tau homoi-homoiika angamoi hokogea Ma Jou o Yawe wohikaaturu.” Hokogea o Musa wahitararono onangika.

¹⁷ De o Isiraele ma nyawa yaniiki ai hiaturu gea ho manga inomo gea yomadoraka masara utu yale o litere hinooto ifoloi de naga utu ko adonua o litere hinooto yale.

¹⁸ Masara gea ahao homoi-homoiika ka de manga inomo yogopoa manga dudugauku de duru aomanga hiadono imahipasino ho yomakegetongo homoi-homoiika o litere ahohinooto. Ho ona yomakokidoraka ma ngoe eko ma hohutulu dika masara ka de yatuga de gea yakokiwedono manga tau mata-mataika.

¹⁹ De ahao o Musa wahingahu onangika wato, “Naa ufa niawohanga ngini o wange moi dika nia inomo ho nako niolomo ma baha de naga ma hou, de ufa niagogono. De ngaro niato nimagogono la itebini o ngorumino de ahao, masara enangoo ma ko idadiua.” Hokogea o Musa wahitiari.

²⁰ Masara ona utu ko iwihigihenua de manga inomo ma hononga yomagogono hiadono o ngorumino masara ka de ma ngorumino de yomelaka ka hiadono yogailoka. Ho ka de o Musa wahioriki yodiai hokogea de duru wangamo onangika.

²¹ Ho gea o wange-wangeiye ona ka yongoru-ngorumu yomaino-inomo de o mana gea yomale dika abe yawedono manga perelu o wange moi. De ma inomo o mana gea yagoraka ko yamataua ho ma hou yanoaika de ka de o wange ihauku de iwaroka.

²² Ma adonoka o wange butaanga de kiani yaniiki Ma Jou ai hiaturu ho yomadoraka o nyawa homoi-homoiika o mana o litere aia-iata. De ahao o Isiraele manga dimo-dimono iwihingahu o Musaika abe yodiai hokogea.

²³ De wahingahu onangika wato, “Hokogea nidiai itiai. Hokonaa Ma Jou o Yawe ai pareta wato, ‘Ngohi tohiaturu la itebini ngini mata-mata nimahiaini. Abe o wange ma tumidoka gea Ngohi tomadingakoka to Ngohi ahi wange.’ Hokogea Ma Jou wohiaturu ho nia inomo nimahinyole eko nihakai abe o wange naa iniwedono nia inomo de ma hononga gea ka idadi niagogono la idadi nia inomo itebini.”

²⁴ De o Musa ai hitararono gea yaniiki de ngaro yagogono masara hoka ma dihiraua angamoi ngaro ka hiadono ma dawangeino de ko yomelaua de ko yogailua ho ka idadiohi manga inomo.

²⁵ De o Musa wahingahu wato, “Ngaro niloiki ma hoanika niolingiri o mana masara ko niamakeua o wange naa angamoi Ma Jou o Yawe wohiaturu la nia inomo iniwedono o Hiaini ma wangeoka la ngone homahiaini de homahihohininga ma titi Una.

²⁶ Ho ngini o wange butaangaino nia mana nimagoraka masara o wange ma tumidi abe o Hiaini ma wangeoka Una ko wapurarahua o inomo gea.”

²⁷ Hokogea o Musa wahingahu onangika masara ona utu ko iwingakua ho yoiki yolingiri masara duru ko iwa ho yolio yomahomoa.

²⁸ De ahao Ma Jou o Yawe wileha o Musaika wato, “Hokokia ma dekanohi ngini nioluku nianiiki ahi pareta de hiadono ahi hiaturu gea ko nihingounua?

²⁹ Ngini kiani nihiorikoo o Hiaini ma wange ma titi abe Ngohi Ma Jou o Yawe tinihidoaka o wange gea la duru igou-goungu ngini nimahiaini. Gea ma titi hiadono o wange ma butaangaka de tinihidoaka nia inomo la iniwedono o wange hinootoino gea. Ho o wange tumidi gea de kiani ngini mata-mataika nimarii-riidoka nia tauoka. Ko idadiua nitagi-tagi o Hiaini ma wangeoka.” Hokogea Ma Jou wataere.

³⁰ Ho ona mata-mata yomahiaini o wange ma tumidoka gea.

³¹ De manga inomo gea o Isiraele ma nyawa ihiromanga o mana angamoi ko ma moiuahi yamake ho ko ihiorikua ena o wani o kia. De o mana gea iarehe hoka o baru ma ketoko de imutiti hoka o roti abe naga de ma hisapuru o ofungu ma gula.

³² De o Musa wahingahu wato, “Hokonaa Ma Jou o Yawe wonahibehehongo, wato, ‘Ngini kiani o mana o duduga moi abe ma dola o litere hinooto nionoauku o botouku la gea niahimatoko nia dano-danonguku ka hiadono yolape-lapeuku. Hokogea nidiai la ka idadi onangoo yamake nia inomo abe tinihidoaka ma oraha tinihihupu o Mesiiri ma tonakino. Abe ma oraha nitagi-tagi o tonaka ma kakaahaika de tinihiolomo de o inomo gea.’ Hokogea Ma Jou wonahibehehongoka.”

³³ Ho o Musa wihuloko o Harunika wato, “Harunu, naa kiani o boto moi naleino abe ma duduga nonoa o mana o litere hinooto. De gea nonoa ibooto de ahao nagogono ma boto gea Ma Jou o Yawe ai himangoka abe o ngi gea Una womadingakoka, genangoka nakelenga o mana gea. Hokogea nodiai la ka idadi gea niahimatoko nia dano-danonguku ka hiadono yolape-lapeuku.” Hokogea o Musa wihuloko ai riakika.

³⁴ Ho o Harunu wodiai duru imaketero hoka Ma Jou o Yawe wihibehehongo o Musaika. Ho ika-ika de manga hohininga o mana gea wonoa Ma Jou ai peti ma goronauku la ka ihikaika naga manga himatoko yolape-lapeukuoli.

³⁵ De o Isiraele ma nyawa ahao manga dekana yotagi-tagi o tonaka ma kakaahaka gea manga taongo moruatino ma dekanino. De hokogea manga dekana yaolomo manga inomo o mana gea ka hiadono yowohama o Kanani ma tonakika abe genangoka naga o nyawa manga datomo ho o mana gea Ma Jou ko wapurarahokaua.

³⁶ De manga duduga abe yapake la manga mana yatuga gea nako iomanga imaketero de o litere hinooto. De manga duduga gea nako to ona manga demo ma romanga, “o omere.” De manga duduga moioli naga ma amoko ma romanga, “o efaa.” De “o efaa” gea imaketero de “o omere” ngimoi ho o efaa nako iomanga imaketero de o litere monaoko.