Huhupu 12 - Ma Jou ai Demo-demo o Totobelohoka

O Totilakuru duru ma dodihiraka o Mesiiroka

¹ Ma oraha itigioka Ma Jou o Yawe wahihupu o Isiraele ma nyawa o Mesiiri ma tonakino de wahitararono o Musa de o Harunika abe ma oraha yomahidiai yoiki wato,

² “Abe ti ngini nia taongo ko niaetongokaua hoka nia poretino. Abe o mede naa Ngohi tinihiluasa nia kangelaino ho naa idadi o mede ma dodihiraka abe ti ngini nia taongo ma hungi. Ho ka de adonokali o mede naa de o taongo moi ibooto de hokogea niaetongo o tao-taongiye.

³ Ho ngini niahingahu o Isiraele ma nyawa manga doomuika niato, ‘O mede naa ihitunguu o taongo ma hungioli. Ho ka de o mede naa iboa de niaetongo ma wange ngimoiohi de duru ma wange ma ngimoiuku gea kiani o tau ma dutu homoi-homoiika ona o nau-nauru kiani yoiki de yomakokingiriki manga domba ma ngofaka manga dofoino. Hokogea la o tau homoi-homoiika naga manga domba ka ma goohi abe ahao yomahihuba de ahao yaolomo.

⁴ Masara nako o tau moi gea ona ko yowoeua hiadono ko yamataua yaolomo o domba moi abe ka ihidatahumika yaharongo, de gea kiani yahokino manga datekoka manga dodiawo o tau moioli la o tau hinooto gea manga domba moi dika yatoma la yaolomo ihidoomuino. De manga domba ma roehe gea ka yodongolomika hiadono yamataka. Hokogea ma hiaturu la ngini nimakegetongo homoi-homoiika hiadono iniwedono nia inomo mata-mataika.

⁵ De ka idadi yomangiriki manga dofo o domba eko o kabingino, ma kiani yairiki ma ngofaka ma nauru abe ma ngumuru adonoka duru o taongo moi dika. De ihidodiai yairiki abe duru ma bobuturungu de ma rorahai dika ho ko idadiua yale ma domba nako naga ma nabo eko ma heluku.’” Hokogea Ma Jou wahibehehongo o Musa de o Harunika la ma titi gea yahitararono manga nyawaika.

⁶ De naga ma hiaturu utuohi Ma Jou wahingahu hokonaa wato, “De ti ngini nia domba gea abe niaoinoka ahao kiani o wange iatino gea niapaliarohi de duru nihidodiai niapaliara hiadono ma mede naa adonoka ma wange ngimoi de iatoka. Ho duru o wange imahidutuluku o tanggala ngimoi de iatoka de ahao ngini o Isiraele ma nyawa mata-mataika nimakokidoma nia domba.

⁷ De ma oraha o tau homoi-homoiika manga domba yatoaka ma ngomahino de kiani ma awunu yatakunu. De ma tau gea abe yapake la yolomo manga domba ihidoomuino genangoka kiani ma poretoka naga ma dodunguu hokonaa. Manga domba ma awunu gea yatakunino kiani yaoino la ihiehe manga tau ma ngorana ma liate arihonongaiye de daku ma dukurino enangoo ihiehe.

⁸ De duru o futu gea kiani manga domba gea ihidatahumika yaharongo duru o uku ma lokuoka. De o domba ma roehe gea yaolomo de manga gauku o mali ma hoka de ihiode de o roti ko iwa ma ragi.

⁹ De ngini duru ko idadiua o domba ma roehe gea niahakai de ko idadiua ma goo niaolomo. Kiani o dutu moi iahumu niaharongo hiadono ma pea de ma lou de ma warikoo nihidatahumika o uku ma lokuoka.

¹⁰ De ko idadiua niaregu abe niato nimagogonika la itebini de ahao niaolomo, hokogea duru ko idadiua. Ho nako gea niaolomo ibooto de naga nia hou de ko niamataua niaolomo gea ena kiani niatoomuino de nihidaulu la ma dawangeino ko ipotokauahi de ma hou gea itinokau.

¹¹ De hokonaa ngini nimahidiai niolomo ma oraha nimatoomuino la nia domba gea niaolomo. Kiani o dodagi ma pakeanga homoi-homoiika nimahinoauku de gea nihitunguu nia dodagi kohagurutika. De kiani nimasandaaliyeoka de nia dodagi ma tutukunu naga niakokisoino. Hokogea nimahikokidiaioka de ahao nimataiti niolomo angamoi ma oraha gea adonoka to Ngohi Ma Jou o Yawe ahi Totilakuru ma wange.”

¹² “Abe duru o futu gea Ngohi totagi-tagi o Mesiiri ma tonaka ma amokika de totulu-tulu moduku o Mesiiri ma nyawa manga tau-tauika la tatoma manga domoro o nauru mata-mataika de o aewani ma domoro ma nauru enangoo mata-mataika gea takokitoma. De gea ka ma moi o Mesiiroka manga pangao mata-mataika tohidohohowono abe itaana ko iwa to ena ma buturungu manga popangao gea. Ngohi Ma Jou o Yawe totemo.

¹³ De ma titi ti ngini nia domoro o nauru ko tatomaua gea ma titi o domba ma awunu naga nia ngorana ma liateoka. Abe ka de tamake nia dodunguu de Ngohi tinihiorikoka abe ngini, ahi nyawa, naga o tau ma goronaka gea. Abe Ngohi ka de toboa genangino de tamake o domba ma awunu gea de tinitilakuru de ko tinihibinaahaua ma, nako o Mesiiri ma nyawa mata-mataika ahi hohowono gea yadaene.” Hokogea Ma Jou wahingahu onangika.

¹⁴ De ahao Ma Jou wahibehehongo onangika la manga hohininga yodiai abe ai Totilakuru ihirame-rame. Abe Una wato, “De gea Ngohi todiai ma futu gea kiani ngini niohohininga ka ihikaika. Ho o tao-taongiye abe nako adono ma mede naa de ma tanggala ngimoi de iata adonokali de kiani nihirame-rame Ma Jou o Yaweika angamoi ma oraha naa tinitilakuroka. De o garago ma wange gea idadi ahi behehongo nginika ka hiadono nia totoforaukuoo o taongo moi ma moi yodiai ngaro yalape-lapeuku ka hiado-adonika ma, kiani ahi behehongo naa yaniiki.

¹⁵ O Totilakuru ma wange ipaha de ma dawangeinoli nihirame-rameoli ma titi o roti ko iwa ma ragi. De ma titi gea nihirame-rame ka hiadono o wange tumidino ma dekana abe nia roti ko idadiuahi niaolomo de ma ragioka. De nia hidiai ihira gea nia ragi niakokiumo. Abe o wange ihira gea kiani ti ngini nia tau homoi-homoiika niakokitebini ka hiadono o ragi o mui moioo de ko iwa nia tau ma goronaka. De o wange tumidino gea ngaro onagona dika abe yolomo o roti de ma ragioka ona gea ko niaetongokaua o Isiraele ma nyawa manga doomuoka.

¹⁶ De nia rame-rame ma wange ihira kiani ngini nimatingakino Ngohino abe nimatoomuino la nia hininga itagi ka Ngohino dika de nimahuba Ngohino. Ho gea ti ngini nia karajaanga ko niagorakuahi ma wange gea masara ka idadi nia inomo nimahidiai. De ahao o wange ma tumidoka abe o rame-rame ma baha enangoo nihiromanga o Debi-debini ma Wange ho kiani nimatoomuinoli o wange ma baha gea la nia hininga ma dumutu ka Ngohino dika.”

O Roti ko Iwa ma Ragi ma rame-rame ma hiaturu kiani o tao-taongiye o Isiraele ma nyawa yaniiki

¹⁷ “De o Roti ko Iwa ma Ragi ma rame-rame naa tinihibehehongo nianiiki la duru nimahihohininga o wange gea abe Ngohi o Mesiiri ma tonakino tinihikokihupuoka nia regu-reguoka abe nimahitoomu-toomuika de nia dutu homoi-homoiika tinihihupu. De gea ma titi hiadono o rame-rame naa tinihibehehongo nginika la nia totofora ngaro yolape-lapeuku ma ona ka hiado-adonika onangoo yaniiki.

¹⁸ De gea onangoo kiani yaniiki o taongo ma mede ihira de duru o mede yakorona ma tanggala ngimoi de iatuku abe ma oraha o wange imahidutuluku de yomulaenge yaolomo o roti ko iwa ma ragi. De o wange tumidino ma dekana manga inomo o roti gea ena dika abe ma ragi ko iwa ka idadi yaolomo ka hiadono o wange imahidutuluku o tanggala monaoko de moioka.

¹⁹ Ho gea duru o wange tumidino ma dekana abe ko idadiua naga o ragi manga tau ma goronaka ona mata-mataika. De onagona dika abe yolomo o roti eko o inomo utu abe de ma ragioka ona gea manga gogao yatoakoka ngaro o homoa ma nyawaika abe naga nia hidogoronaka eko o Isiraele ma nyawa idodutuika. Ho ona gea abe yatilakuru ma bohono de kiani ona gea ko idadiokaua niaetongo o Isiraele ma nyawa.

²⁰ Ho naa Ngohi Ma Jou tohigalioli tinihingahu abe o kiaka dika ahao ngini nigogere eko ti ngini nia totoforauku yogogere ma kiani o rame-rame ma behehongo naa yaniiki. Ho ma oraha manga rame-rame o Roti ko Iwa ma Ragi de ena duru ko idadiua yaolomo o inomo o kia dika naga abe de ma hisapuroka o ragino o wange tumidi ma dekanino gea.” Hokogea Ma Jou o Yawe ai behehongo de ma hitiarioka onangika abe wihingahu o Musaika.

²¹ Ho o Musa ahao wahokino o Isiraele ma nyawa manga baluhu mata-mata de wahingahu onangika, “Ho naa adonoka ma oraha ngini homoi-homoiika nimakokidoma o totilakuru ma domba abe nimadingakoka la ufa nanga domoro yokokihonenge!

²² De nia domba ma awunu niatakunu o bokoluku de gea ena niapake la nia dodunguu abe nia totilakuru ma domba niatomaka. Ho nia gegehe nimale o hisopo ma jagaino de ena gea niatono-tonouku nia bokolo homoi-homoiuku de ahao nia domba ma awunu gea nihiehe nia ngorana ma liateiye arihonongaiye de dakea ma dukurino. De o futu moiino gea ufa ngini nihupu nia tauino ka hiadono o ngorumino o wange ipotokaiha.

²³ De o futu gea ma oraha Ma Jou woboaino la wakokitoma manga domoro o Mesiiri ma nyawa de Una ka winitilakuru angamoi ka de wamake nia dodunguu o domba ma awunu gea abe nihieheoka nia ngorana ma liate arihononga de dakea ma dukurino de gea ka winitilakuru. Abe ai malaekata gea ena ihiboa o hone-honenge masara Ma Jou ko wohigunoaua ti ngini nia tauika iwohama angamoi naga nia kokitauoka ma dodunguu o awunu gea.” Hokogea Ma Jou ai behehongo nginika.

²⁴ De o Musa wogila-gila watemo onangika wato, “De kiani ngini niohininga abe o behehongo ma hiaturu naa ko ma titiua ma moi dika nianiiki masara ka hiado-adonika o tao-taongiye nanga Totilakuru ma rame-rame nanga totoforauku kiani yaniiki.

²⁵ Ho ma oraha nimahiadonoka o tonakika abe Ma Jou o Yawe wonahibehehongoka ahao genangokaoo kiani o tao-taongiye nihirame-rame imaketero hoka kangano tinihingahuoka nginika.

²⁶ De ma oraha nidiaioli marai nia ngofa-ngofaka ahao inileha-leha nginika ato, ‘Baba, adodoa hokonaa kiani hodiai? De o kia ma titi hokonaa hohirame-rame?’

²⁷ Ka de hokogea nia ngofa-ngofaka inileha de kiani niahitararono onangika hokonaa, niato, ‘Abe ma dodihirainohi ma oraha nanga totofora yogogerohi o Mesiiri ma tonakokahi de Ma Jou o Yawe wodiai o heheranga genangoka abe o Mesiiri ma nyawa dika manga domoro o nauru wakokitoma. Masara nako to ngone nanga totofora yongodumu angamoi Ma Jou wakokitilakuru to ona manga tau mata-mataika ma oraha o ngofaka o domoro wahohonenge. Ho o Mesiiri ma nyawa dika wahohonenge de o Isiraele ma nyawa ko moiua yohonenge. Hokogea Ma Jou o Yawe wonaduhunu hiadono ngone o tao-taongiye o Totilakuru ma rame-rame hodiai. De nanga totilakuru ma domba gea hotoma la hohitunguu nanga horomati Ma Jou o Yaweika.’ Hokogea nia hitararono nia ngofa-ngofakika ma oraha yoleha.” Ka de o Musa hokogea wahingahu ibooto de ona mata-mata genangoka ka ma moi yomaponuku yomahuba abe ihitunguu manga hingounu de manga horomati Ma Jou o Yaweika.

²⁸ De o Isiraele ma nyawa ihingounu Ma Jou ai behehongo mata-mata gea abe o Musa de o Harunu yahuloko onangika la yodiai.

²⁹ Ho de o futu gorona Ma Jou o Yawe watoma o Mesiiri ma nyawa o domoro mata-mataika. Ho o Mesiiri ma nyawa ngaro ona yokokurutiye eko manga dodipokouku ma ona mata-mataika yakokidaene. Ho o Firaunu, o Mesiiroka manga koano, to una ai ngofaka o domoro wohonenge. De ka hiadono o nyawa abe yabuika o bui ma tauoka to ona mata-mataika manga domo-domoroo yokokihonenge. De manga aewani o dofo ma ngofaka ma nauru o domoro enangoo ikokihonenge.

³⁰ De o futu gea o Mesiiri manga koano, de ai popareta ma nyawa, de ai kokawaaha mata-mataika yatodokana hiadono yokokimomiki, angamoi o Mesiiri ma tonaka ma amokika ona kahumutaigarika angamoi o Mesiiri ma nyawa manga tau ihigetongo homoi-homoiika naga o honenge.

O Firaunu wahigaro onangika la yomataiti yohupu

³¹ De ma futu gea dika de o Firaunu wabehehongo o Musa de o Harunu, ho ka de yoboa unangika de ma koano wahuloko onangika wato, “Ngini o futu naa dika de niloikoka! Ngini de o Isiraele ma nyawa mata-mata nikokihupuoka naa ahi tonakino! Ho naa niloikoka abe nimagahokoka la nimahuba Ma Jou o Yaweika.

³² De ngini niakokiaoka ti ngini nia kabingi, de nia domba, de nia hapi hoka nengokadau nigahokoka. Moi dika togahoko de gea la ngaro naa nisobo ma ngohioo nihihiowa.” Hokogea o Firaunu wahigaro la yomataiti yohupu.

³³ De o Mesiiri ma nyawa mata-mataika onangoo yahuloko o Isiraele ma nyawaika la kiani yomataiti yohupu manga tonakino ato, “Ngini nimataiti niloikoka done ngomi mikokihonenge mimamata.” Hokogea manga hininga ma huha ma demo.

³⁴ De o Isiraele ma nyawa yakokigoraka manga tarigu abe yapehakoka ma ko iwa ma ragi de ko yahinyoleuahi. De o roti ko iferoua gea yapoparuhaino manga ngoeroka de ka ma moi ihidomoku.

³⁵ De o Isiraele ma nyawa yomakokigahoko o Mesiiri ma nyawaino manga kiahonanga hoka o Musa wahulokoka yodiai. Ho o Mesiiri ma nyawa manga ngaukuku, manga ali-ali, manga gule, manga gogoli, de manga kiahonanga mata-mata abe o gurasino de o haakaino yomagahoko. De manga pakeangoo ma rorahai enangoo gea yomagahoko.

³⁶ De angamoi Ma Jou o Yawe o Mesiiri ma nyawaika wodiai la manga hawanino naga manga horomati o Isiraele ma nyawaika ho yosanangi yahidoaka dika. Ngaro o kia dika yogahoko ma gea yahidoaka o Isiraele ma nyawaika. De hokogea yomagora o Mesiiri ma nyawa manga kiahonanga.

O Mesiiri ma tonaka yanoaka

³⁷ De ma oraha yosobo o Ramese ma kotaka yotowongi de manga dumutu o Sukoto. De manga ngoe nako o balu-baluhu o nau-nauru dika yaetongo yasana o ratuhu butaanga de nagahi manga ngo-ngofeka de manga ngofa-ngofaka.

³⁸ De naga o nyawa utuoli abe ko o Isiraele ma nyawaua masara onangoo yomakiniiki. De naga to onangoo manga duduono kohangoe abe manga aewani o dofo irupa-rupa.

³⁹ De ma oraha manga dodagi ma goronaka de yomahiaini la yolomo de ahao yomagoraka manga bobaruhaino manga tarigu ma goo ko iwa ma ragi de genangoka de ahao yahinyoleohi la gea idadi manga inomo. De manga roti ma goo dika yomahibilaono abe ko iwa ma ragi angamoi yomatataiti yohupu o Mesiiri ma tonakino.

⁴⁰ De gea o Isiraele ma nyawa yogogere o Mesiiri ma tonakoka manga dekana adonoka manga taongo o ratuhu iata de moruange ibooto.

⁴¹ De duru o wange gea Ma Jou o Yawe ai nyawa yohupu de manga regu-reguoka abe yomahitoomu-toomuika o dutu homoi-homoi ho gea yokokisobo duru o wange gea de yadaene manga taongo o ratuhu iata de moruange ma dekanino o Mesiiroka.

⁴² De angamoi Ma Jou o Yawe duru wagoana o Isiraele ma nyawa ma futu gea ai hohowono itagi o Mesiiroka ho o tao-taongiye nako ma wange gea adonokali de ona mata-mataika yomahigoana manga hohininga abe o roti ko iwa ma ragi ma hiaturu yaniiki. Hokogea ona ihitunguu manga horomati Ma Jou o Yaweika ma titi ai gogoana onangika la ka idadi wahihupu o Mesiirino. De ngaro o Isiraele ma nyawa yolape-lapeuku ka ihikaika hokogea yodiai manga totoforauku.

⁴³ De Ma Jou o Yawe wahingahu o Musa de o Harunika wato, “Abe ma oraha adonoka nia Totilakuru ma rame-rame nihirame-rame de naga ma hiaturu utuohi abe kiani nianiiki. Abe o Totilakuru ma inomo ko idadiua yaolomo abe ona o homoaino ma nyawa.

⁴⁴ Ma nako naga nia tauoka nia huhuloko abe nimaijaino de una gea ka idadi waolomo iti niwihunakahi la o Isiraele ma nyawa manga behehongo ma dodunguu gea naga ai badangoka.

⁴⁵ Masara o nyawa abe inirekatino nia tauoka eko yomahidodogumikahi jai-jai nginioka, ona gea ko idadiua yaolomo o Totilakuru ma inomo gea.”

⁴⁶ “De o Totilakuru ma inomo gea kiani niaolomo nia tau ma goronaka dika. De ufa nihiloi-loiki ma hoanika nihihupu. De ko idadiua o domba ma kobongo gea niatobiki.

⁴⁷ De o Totilakuru ma hohininga ma inomo gea kiani ngini mata-mataika nimakokile la o Isiraele ma nyawa mata-mata ihirame-rame ma titi o Totilakuru.” Hokogea Ma Jou wahitararono onangika o Totilakuru ma rame-rame ma hiaturu.

⁴⁸ De ahao Ma Jou wodogo ma hitararono o Musa de o Harunika abe ma titi o homoa ma nyawa, wato, “De nako o homoaino ma nyawa naga o tau moi inidioniki nginika abe duru yoigo yaniiki o Totilakuru ma rame-rame, kiani o nau-nauru mata-mata manga tauoka kiani yakokihunakahi de ahao ka idadi o Totilakuru ma inomo onangoo yomale de yaolomo. Hokogea ma hiaturu de gea ahao ona niaetongo o Isiraele ma nyawa imaketero hoka ngini idodutu. Ma iti ufa niawohanga abe duru ko idadiua o nauru yaolomo o Totilakuru ma inomo nako ko yomahunauahi.

⁴⁹ Ho ma pareta naa o nauru mata-mataika adaene abe yogogere nginioka ngaro ona o homoa ma nyawa eko o Isiraele ma nyawa idodutu ma kiani yomahuna nako o Totilakuru ma rame-rame yaniiki.” Hokogea Ma Jou o Yawe ai hiaturu ma hitararono onangika.

⁵⁰ De o Isiraele ma nyawa mata-mataika duru yaniiki itiai abe Ma Jou o Yawe wahulokoka o Musa de o Harunika.

⁵¹ De duru o wange gea Ma Jou o Yawe womulaenge o Isiraele ma nyawa wahihupu de manga regu-reguoka abe yomahitoomu-toomuika o dutu homoi-homoi la ma oraha wahihupu gea de wao hokogea de manga datoroka.