Huhupu 11 - Ma Jou ai Demo-demo o Totobelohoka

Ma Jou ai hohowono ma baha de o hone-honenge o domorika

¹ De Ma Jou o Yawe wihingahu o Musaika wato, “Ngohi naa tohiboali o hohowono moiokahi o Firaunu de ai kokawaahaika. Ka de o hohowono gea yadaene de ahao o Firaunu winihigunoa niloiki nenangoka, de gea ka hiadono winihitataiti la nisobo de winiribuutu hiadono ngini abe nigogere nenangoka ko moiokaua.

² De naa noiki o Isiraele ma nyawaika de nahingahu onangika abe ka de o hohowono naa ipaha de ona, ngaro o nauru eko o ngofeka, ma, ka idadi yomakokigahoko homoi-homoi o Mesiiri ma nyawaika abe naga manga datekoka. De gea ena abe yomagahoko to ona manga kiahonanga abe yodiai o gurasino de o haakaino.”

³ Hokogea ma dihirainohi de Ma Jou o Yawe wohiaturokau la ahao hokogea idadi abe o Mesiiri ma nyawa ka yosanangi yahidoaka manga kiahonanga o Isiraele ma nyawaika ma oraha yosobo. Hokogea yosanangi mangale ma titi Ma Jou wahihawana hiadono ko yalawanokaua onangika. De ona o Mesiiri ma tonaka mata-mataika hiadono manga poparetaoo iwigorakiye o Musa de manga horomati unangika.

⁴ Hokogea hiadono o Musa wotomoroini woikoli o Firaunika la Ma Jou ai demo gea ka wadofangoli unangika wato, “Ahi koano, hokonaa Ma Jou o Yawe ai demo ngonaika, wato, ‘Ahao o futu moiuku ngade-ngade o futu gorona Ngohi totagi-tagi o Mesiiri ma tonaka ma amokika.

⁵ Ka de Ngohi totagi-tagi de ahi hohowono tohiboa o hone-honenge abe adaene o domo-domoro o nauru mata-mataika o Mesiiroka. De o hone-honenge gea itagi o tau homoi-homoiika ngaro o nyawa abe yokokurutiye eko yototipokouku masara manga ngofaka o domoro o nauru yokokihonenge. Ho gea ma titi o Firaunu to ngona ani ngofaka o domoro unangoo wohonenge ngaro ngona, ai baba nogogere ani kuaha ma kaderaka. De ngaro o huhuloko o ngofeka abe munangohi imihitipokouku ma, to munangoo ami ngofaka o domoro wohonenge. De o aewani o dofo ma ngofaka o domoro ahao enangoo ikokihonenge.

⁶ De ahao ani nyawa yokokiari ona mata-mata kahumutaigarika kohaamokiye ma ilingi o gari ani tonakoka mata-mataika. Abe ko ma moiuahi ani tonakoka naga o gari hokogea ma amokiye de gea ka de ipaha de ko ma moiokauali naga hokogea ma amokiye o Mesiiri ma nyawa yoari ma titi manga domo-domoro ko yakokiiwaka.

⁷ Masara o Isiraele ma nyawa manga ngioka duru iriidi de ko moiua ma gigoro hiadono ngaro manga kaho ma ko iroanginoua.’ Hokogea Ma Jou o Yawe ai demo ngona o Firaunika la ngini duru niwihioriki abe Una wonahidotelega ngini o Mesiiri ma nyawa de ngomi o Isiraele ma nyawa, de gea wonaetongo homakohowono to Una ai himangoka.

⁸ De ma oraha o hone-honenge inikokidaenoka de ahao o Firaunu ani popareta ma nyawa ani datekoka naa, ona ahao yokokiboa ngohino de yomaponuku ahi himangoka de duru yomagahoko ngohino ato, ‘Musa, nomataiti nomatingaka ngomino de ani nyawa mata-mata kiani nakokiao la ngini ka ma moi nikokihupuoka mia tonakino.’ Hokogea ti ngini nia huhuloko ma demo ngohino de ahao ngohi de o Isiraele ma nyawa mikokisobo!” Hokogea o Musa de ai ngamo witemo o Firaunika ibooto de ahao wosobo ai ngamo ka itagiohi.

⁹ De idadi hokogea angamoi ma dihirainohi Ma Jou o Yawe wihingahuokau o Musaika wato, “O Firaunu ko winihigihenua angamoi Ngohi ahi mau la ka idadi tohidogo ahi heheranga ma dodunguu o Mesiiroka abe genangino tapake la tomahimatoko o nyawaika ahi kuaha ma buturungu.” Hokogea ma dihiraino Ma Jou womahingahuoka.

¹⁰ De Ma Jou ai heheranga mata-mata gea o Musa de o Harunu yodiai la gea o Firaunu ka idadi wamake mata-mata. Masara Ma Jou o Yawe wohitogowini to Firaunu ai hininga ho hiadono woluku o Isiraele ma nyawa wahigunoa ai tonakino yohupu.