Huhupu 10 - Ma Jou ai Demo-demo o Totobelohoka

Ma Jou ai hohowono naa ma tufange de o kabotara wapake

¹ De Ma Jou o Yawe wihingahu o Musaika wato, “Naa kiani nigilioli o Firaunika de nitemoli unangika nihingahu ahi demo angamoi Ngohi tihitogowinoka to una ai hiningaka de ai nyawa abe iwitobaduhunu onangoo manga hininga tohitogowini. Hokogea tohiaturu la ka idadi de ahi heheranga ma dodunguu tahimatoko o nyawaika ahi kuaha ma buturungu.

² De ngini o Isiraele ma nyawa ahao ka idadi niade-ade nia ngofa-ngofakika de nia dano-danonguku ma titi o heheranga naa abe todiaioka la tiniduhunu. Hokogea o Mesiiri ma nyawa tahikangela la gea ngini nihihioriki Ngohi abe tiniduhunoka nia kangelaino de Ngohi naa Ma Jou o Yawe.” Hokogea Ma Jou wihingahu o Musaika.

³ Ho o Musa de o Harunu yoikoli o Firaunu ai tauika la iwitemoli ato, “Mia koano, Ma Jou o Yawe abe o Ibarani ma nyawa manga Jou, hokonaa wonileha ngonaika wato, ‘Muruonoka de ngona nahigunoa ahi nyawa yohupu o Mesiiri ma tonakino la ka idadi yomahuba Ngohiye? Ngona kiani nomahitipokouku ahi himangoka la ibootohi nohilawana Ngohi Ma Jou o Yaweino.

⁴ Abe nako ngona ka nolukohi nahigunoa yohupu, Ngohi itebini ahao tohiboaino ani tonakino o kabotara duru kohangoe.

⁵ De ahao iboaino kohangoe o kabotara hiadono ani tonaka mata-mataika atamunoka de o kabotara gea ka hiadono ko namakeokaua ani tonaka. De ma kabotara gea ahao aolomo mata-mata abe o es ma awana ma hou ngaro nia gota eko nia datomo utu nia redioka, ma, aolomo hiadono yakokimataka.

⁶ De o kabotara gea iningohama ngaro to ngona ani tau eko ani duduhunu ma nyawa manga tau gea mata-mata iniomanga de o kabotara. De ani kokawaahaoo hokogea to onangoo manga tau homoi-homoiika yangohama hokogea. Ngaro nia tofora ma dihira ma ko yamakeuahi ma kabotara ma ngoe hoka ma oraha naa iboaino angamoi duru ma dodihiraka de hiadono ma oraha naa de ko ma moiuahi inihikangela ani tonakoka de o kabotara abe tohiboaino naa.’” Hokogea Ma Jou ai demo wihingahu o Firaunika ibooto de o Musa womaidulu de una de o Harunu yosoboka.

⁷ Ka de o Musa wosoboka de o Firaunu ai duduhunu abe naga ai datekoka ona iwileha o Firaunika ato, “Mia koano, ma dekana naa o nauru gea wodadioka hoka o baatoko mia hidogoronaka. Ho ufa ka ihikaika ninoaika la wonahikangelahi! Kiani ai nyawa gea nahigunoa yoiki la yomahuba manga jouika, gea Ma Jou o Yawe. Abeika, to ngone nanga tonaka duru iwederoka! Ngona nohioriki! Ho ufa ngona ka nomarii-riidoka dika hiadono ka ihikaika nihigunoa wonahikangelahi angamoi ko kiaikaua ma ngekomo miloara!” Hokogea manga hitiari o Firaunika.

⁸ Ho o Firaunu ai nyawa wahidingoto la o Musa de o Harunu yaleinoli. Ka de iwihimangoli de wahingahu onangika wato, “Ngini niloiki dika! Ka idadi nimahuba ti ngini nia jouika, Ma Jou o Yawe gea. Ma, ihira tinilehahi, nia nyawa, onagona honanga yoiki yomahuba nia Jouika?”

⁹ De o Musa wipaluhu wato, “Ngomi mata-mata kiani mingodumu miloiki la ka idadi mihirame-rame ma amoko ma titi mia horomati Ma Jou o Yaweika. Ho to ngomi mia ngofa-ngofaka o nauru de o ngofeka, de o bobereki, de ngaro mia duduono mia aewani o dofo, ma, mata-mata ka ma moi miakokiao ma oraha miloiki.” Hokogea o Musa wihitararono o Firaunika.

¹⁰ De ai demo gea o Firaunu duru ko wosanangiua wato, “Kalioli ka nimamata nihupu! Ho naa, itararono nia hininga ma modorou. Nako niato hokogea nidiai la ka nimahidutuono nikokihupu de igoungu, kiani Ma Jou o Yawe winiduhunu angamoi ngohi duru toluku nia ngo-ngofeka de nia ngofa-ngofaka niao niamamataka!

¹¹ Abe nako ngini igoungu niloiki ma titi nimahuba nia Jou o Yaweika kiani nohiaturu la ngini o nau-nauru dika nikokiloiki la gea ka idadi tinihigunoa. De kiani hokogea ti ngini nia gogahoko, ma nako ngini mata-mata nikokihupu, o, gea ngohi duru toluku.” Gea o Firaunu wotemo de ai ngamo ibooto de ahao to una ai nyawa o Musa de o Harunu duru yakiniiki hiadono yahihupu ma hoanika.

¹² De ahao Ma Jou o Yawe wihingahu o Musaika wato, “Musa, naa ani giama nagorakiye la ma kabotara gea nahokino! Adonoka ma oraha o Mesiiri ma amokika o kabotara atamunu la ka idadi manga datomo abe o es ko amataua ena gea yahou o kabotara.”

¹³ Ho gea o Musa wagoraka ai tutukunu de o Mesiiri ma tonaka ma amokika wohibairi de gea Ma Jou wodiai la italoko o wange ma hiwariha de italoko o wange moi hiadono ngade-ngade itebini la waoino o kabotara abe o hidaloko gea aniikino de hokogea Ma Jou wohiboaino o kabotara duru kohangoe.

^14-15 De igoungu iboaino ma kabotara gea hiadono o Mesiiri ma tonaka atamunoka de o kabotara. Ho ma tonaka mata-mataika ahengoka de o kabotara kohangoe gea, de mata-mata iwangoiye manga redioka yadangi. De o gota ma hofoko abe ko awederua de o es ma awana, gea o kabotara ka yotengouku aolomo. O kabotara gea aolomo amataka ho hiadono ko iwaka ma bihi-bihi o ruruubuoka eko o gotaka o Mesiiri ma tonakoka mata-mataika. De ngaro ma dihirainohi de ka hiadono ma oraha naa naga, masara duru ko iwa abe o Mesiiri ma nyawa yamake o kabotara duru kohangoe hokogea.

¹⁶ De o Firaunu duru womataiti o Musa de o Harunu wahokinoli de womangaku onangika wato, “Ngohi naa marai tomangaku ahi howono nia Jou o Yaweika de nginikaoo tahowonoka.

¹⁷ Ho naa togahoko la ahi howono naa niaofi de nihiniata nia Jou o Yaweika la o hohowono abe ngade-ngade inahohonenge naa wagorakoka ngohino. O kabotara naa imihiwederoka ngomi ho kiani duru nimigahoko!” Hokogea o Firaunu ai toduba ma demo o Musa de o Harunika.

¹⁸ Ho naa o Musa wosobo de womaniata Ma Jou o Yaweika la ma kabotara gea waofi o Mesiiri ma tonakino.

¹⁹ De Ma Jou o Yawe wihigihene ho wodiai la ma hidaloko ihidoduruino italoko. Ho abe ma dodihiraka italoko de ma kabotara gea yaoino, masara naa italokoli la ma kabotara ihigilioli ma poretika. De kohabuturungu italoko hiadono o kabotara mata-mataika yakokiaoka o gahioko. O gahi gea ihiromanga o Bongo-bongo ma gahi. De ma kabotara genangoko yao de yakokilutuoka hiadono moioo de ko iwaka o Mesiiri ma tonakoka.

²⁰ Masara ngaro o kabotara gea ko iwaka ma, o Firaunu ko wahigunoauali o Isiraele ma nyawa yohupu angamoi Ma Jou o Yawe ai hininga wohitogowini.

Ma Jou ai hohowono naa ma hiwo de o fufutu ma dubuho

²¹ De ahao Ma Jou o Yawe wihulokoli o Musaika wato, “Musa, ani giama nohidoakiye natumutu o dihangiye la o Mesiiri ma amokika yadaene de o fufutu abe ma dubuho hiadono o nyawa yakokimao.”

²² Ka de hokogea Ma Jou wihuloko de o Musa duru wariko-rikotiye ai giama wotumutu o dihangiye de o fufutu iboa hiadono duru ifufutuoka. De o wange hangeino ma dekana o Mesiiri ma tonaka atamunoka de ma fufutu de ma dubuhoka gea.

²³ Ho o Mesiiri ma nyawa ko yomahiorikua ho ko kiaikauahi yoiki, masara manga tonaka ma hononga abe genangoka o Isiraele ma nyawa yogogere, to ona manga ngioka naga ma dodararono.

²⁴ De o Firaunu wibehehongo o Musa woboa. Ho gea yomarihimangoli de o Firaunu wihuloko o Musaika wato, “Ngini naa nikokiloikoka! Ka idadioka niloiki nimahuba Ma Jou o Yaweika. De ngaro nia ngo-ngofeka eko nia ngofa-ngofaka ma, ka idadi niakokiao masara nia domba de nia duduono utu mata-mata kiani nianoaika nenangoka.” Hokogea o Firaunu ai demo.

²⁵ Masara o Musa wipaluhu o Firaunika wato, “Mia koano, nako ngomi miloiki kiani naga mia huhuba o aewani o dofo ho kiani nomihigunoa la mia duduono mata-mata miaoka la mia huhuba naga abe ka idadi mimahihuba Ma Jou o Yaweiye.

²⁶ Abe to ngomi mia duduono ahao miakokiao hiadono ngaro mia aewani o dofo ma kuliti moioo de ko mianoaikaua nenangoka. Angamoi utu ahao miapake la wiwileleani mia Jou o Yawe. Masara kiani mia dumutu mimahiadonikaka de ahao ka idadi miairiki mia aewani mata-mataino abe ka idadi mimahihuba Ma Jou o Yaweiye.” Hokogea o Musa wihitararono o Firaunika.

²⁷ Masara ka de o Firaunu woihenino de Ma Jou wapake manga demo gea la wohitogowinoli o Firaunu ai hininga hiadono ma moioli ai behehongo waturuuruoli ho hiadono o Isiraele ma nyawa ko wahigunoauali yohupu.

²⁸ De wibanarata o Musaika wato, “Ngona naa nohupuoka ahi tauoka! Ufa hiadono ngohi tonimakeoli ngona! De nako ma wange gea ngohi tonimakeoli de ma wange gea ngona nohonenge!” Hokogea o Firaunu ai ngamo ma demo.

²⁹ De o Musa wipaluhu wato, “Nako ani hininga hokogea ngohioo tato ngaro ibootohi homakamakeoli!” Ka de wotemo hokogea de wosobo o Musa.