Huhupu 1 - Ma Jou ai Demo-demo o Totobelohoka

O Isiraele ma nyawa yofaa-faatuku o Mesiiroka

¹ De ma oraha o Isiraele ma nyawa yoiki o Mesiiri ma tonakika gea yokokituonoka o Yakubu de ai ngofa-ngofaka de to ona manga feka-fekata de manga ngofa-ngofaka. De hokonaa ai ngofa-ngofaka manga roma-romanga abe iwiniiki:

² o Rubene, o Simeono, o Lewi, o Yehuda,

³ de o Isakara, o Sebulono, o Benyamini,

⁴ de o Daana, o Nafatali, o Gaada de o Asere.

⁵ Masara o Yusupu una wohiraikaka o Mesiiroka. Ho ma oraha genangoka yongodumokali o Mesiiroka to Yakubu ai ngofa-ngofaka de ai dano-danongo idodutu de ona gea manga ngoe yamoritumidi.

⁶ De ika-ika o Yusupu de ai ria-dodoto de ona mata-mata abe yomahikumuru moi de ona, ona yokokihonengoka.

⁷ Masara o Isiraele ai totoforauku ka ihikaika yofaa-faatuku. Hokogea yodogo-dogo hiadono duru de manga buturungoka. De ika-ika de duru ko manga ngoe hiadono ona yodokemoka o Mesiiri ma tonakoka gea.

⁸ De o Mesiiroka manga koano yototuruuru ho hiadono naga o koano womatengoli abe una gea duru ko wihiorikua ma titi o Yusupu abe ma dodihiraino o Mesiiri ma nyawa waduhunu hiadono ka yowangohi.

⁹ De o koano gea watemo ai kokawaahaika wato, “Abeika, naa o Isiraele ma nyawa ka yowoeholi! Abe nako ona de ngone ka onangohi de manga buturungoka.

¹⁰ Ho kiani ngone naa de nanga sosawaro homahikaaturu la ona gea ibootohi yodogo. De nako ngone de nanga musu homaketeparangi de done o Isiraele ma nyawa yomahidogo nanga musuika hiadono yodadi yowoe inaparangi. De nako hokogea yodiai done inahikala de ona ato ka idadi yomahiluasa de yomahihupu nanga tonakino naa. Ho gea ngohi duru toluku idadi hokogea!”

¹¹ Hokogea o Firaunu ai demo ai poparetaika. De ahao ona yomulaenge yomahikaaturu de yahikarajaanga o Isiraele ma nyawaika. De duru de ma dubuho yahipareta onangika abe yaribuutu yahikarajaanga hiadono yahidadi manga huhuloko ma ko iwa manga hewa. Ho hiadono o Isiraele ma nyawa kiani o Firaunu ai kota hinooto iwidiai la genangoka ai kiahonanga ma gogogono. O kota hinooto gea ma romanga o Pitomo de o Ramese.

¹² De ngaro o Mesiiri ma nyawa yahikarajaanga hiadono o Isiraele ma nyawa manga kangela ihidogo ma dubuho, masara imakiniiki de manga ngoe ho ka de manga kangela ihidogo de manga ngoeoo yodogo. De angamoi ka ihikaika o Isiraele ma nyawa ka yodogo-dogo ho o Mesiiri ma tonaka ma amokika yomahikokabarihika de hiadono o Mesiiri ma nyawa duru yamodongo onangika ma titi ko manga ngoe o Isiraele ma nyawa.

¹³ Ho o Mesiiri ma nyawa utuohi ihidogoli manga kangela hiadono duru kohagiriakaholi o Isiraele ma nyawaika yahikarajaanga.

¹⁴ De o Isiraele ma nyawa manga hininga duru de ma dubuhoka ma titi o kangela ma karajaanga gea yamao mata-mataika. Abe o Mesiiri ma nyawa duru yaribuutu manga redi-redioka yokarajaanga irupa-rupa de yahikarajaangoo manga kota ma tau yodiai o telaino abe yafafoiye. Ho gea o Isiraele ma nyawa manga wowango duru kohadubuho hiadono manga hininga ka ihikaika ihuha.

¹⁵ De ahao o Mesiiri manga koano wohiaturu la wato ibootohi yodogo o Isiraele ma nyawa o nau-nauru. De naga o ngofeka yahinooto yatobaduhunu o Isiraele ma ngo-ngofekaika ma oraha yomagerewoto de gea yahinooto manga romanga o ngo Sifera de o ngo Pua. De ona gea yahinooto o Firaunu wabehehongo la yoboa unangino.

¹⁶ De wahuloko onangika wato, “Ma oraha ngini niaduhunu o Ibarani ma ngo-ngofeka yomagerewoto, de nako yomaboa o nauru kiani niahohonengoka masara nako yomaboa o ngofeka, ufa niatoma ho nianoaika dika la yapaliara manga dimono.”

¹⁷ Hokogea wahuloko onangika masara o ngo Sifera de o ngo Pua gea duru iwimodongo Ma Jouika hiadono o Mesiiri manga koano ko iwihingounua. Ho ngaro o ngofaka o nauru yomaboa ma ka yanoaika dika la yowango.

¹⁸ De ahao o Mesiiri manga koano wahokinoli o ngofeka yahinooto gea de wataere onangika wato, “Adodoa ho ngini nidiai hokogea la hiadono o ngofa-ngofaka o nau-nauru de ko niahohonengua?”

¹⁹ De ona iwipaluhu ato, “Mia koano, mimahilooa masara nako o Ibarani ma ngo-ngofeka ko imakadaenua de o Mesiiri ma ngo-ngofeka. Ona yoputurungu ho nako yomagerewoto de duru itaiti, de nako miboa la miaduhunu masara gea ko miadaenikaua de manga ngofaka yomaboaka.” Hokogea yomademo o Firaunika.

²⁰ Ho Ma Jou wasanangi o ngo Sifera de o ngo Puaika de wahidoaka ma owa onangika. De o Isiraele ma nyawa ka yodogo-dogohi manga ngoe de manga buturungu.

²¹ De angamoi o ngofeka yahinooto gea iwimodongo Ma Jouika dika, ho Una wahidoaka ma owa onangika hidutu onangoo manga rokata de manga ngofa-ngofaka yamake.

²² De ahao o Firaunu wahuloko ai kokawaahaika wato, “O nauru mata-mata yomaboa o Ibarani ma nyawaino kiani niaoraino de niaumo o Nili ma akeruku! Ma nako manga ngofa-ngofaka o ngofeka mata-mata nianoaika la yowangohi.” Hokogea o Firaunu ai huhuloko.