Himatoko 22 - Ma Jou ai Demo-demo o Totobelohoka

¹ De ahao ipahaino ma malaekata gea wohihimatoko ngohino o akere moi ihahurika, abe ma akere gea nako yaokere, ka idadi o wowango yahidoaka o nyawaika. De ma akere gea duru ileto-letongo abe hoka o hakaru ma leto-letongo gea ma romanga o kristala ma meletongo. De gea ihahuru Ma Jou de o Domba ma Ngofaka manga kadera ma hohailoaka de aino

² la duru o ngekomo ma goronaino ihahuru. De ma akere gea ma arihonongaka naga iwango o gota abe enangoo nako ma hofoko yaolomo gea ka idadi o wowango yahidoaka o nyawaika. De ma gota gea naga to ena ma hofoko o fara ngimoi de hinooto, de gea imakiniiki de ma mede, ho o mede moi gea ma hofoko moi, de ahao o mede ma himangoka de gea ma hofoko aturuuruoka ho o fara moioli. Hokogea ma hofoko o fara ngimoi de hinooto gea imakiniiki de ma mede. De nako ma gota ma hoka, ena gea yapake la o dunia ma nyawa mata-mataika ibootohi yagogama masara ka ihikaika manga badanga isosanangi dika.

³ De genangoka duru ko iwa o kiahonanga eko o nyawa onagona dika abe Ma Jou wahohowono de o koboto. De o kota ma goronaka gea naga Ma Jou de o Domba ma Ngofaka manga kadera ma hohailoa, de to Una ai nyawa mata-mata genangoka yodadioka ai gogilaongo la ahao ka ihikaika iwileleani Unangika.

^4-5 De gea ko ma titiua iwileleani dika, masara nagali abe yodadi yokoano la ai nyawa gea yokoano de de Una ka hiado-adonika. De ona ma oraha gea ahao ka idadi yomalega Unangika de iwimake ai himanga. De to Una ai romanga ahao ihitulihika abe ona manga pea ma nyore-nyoreoko homoi-homoiika. De genangoka duru ko iwaka yofutu de ko yonganonokaua o hilo de o wange ma dararonika, angamoi nanga Baluhu idodutu Ma Jou ahao wahitararono onanguku de to Una ma hirete ai dararono.

⁶ De ahao ma malaekata gea wohitemo ngohino wato, “Naa ma hingahu ma demo-demo abe naa ngona noihenoka, gea ka ma gou-goungu dika de ka idadi nangaku enangika. Masara abeika, nako ma dihiraino nanga Baluhu idodutu Ma Jou ai hingahu ma demo ma ngoe wahidoaka ai uru ma dodofangika. De hokogea ma dihiraino Una wapake ai nyawa la winihingahu ai hingahu ma demo nginika, masara ma oraha naa naga imakohowono de abe ma dodihiraino, angamoi ma oraha naa Una gea wohihingahu ai demo ngohi ai malaekatino de wohihidingoto la gea ka idadi ngohioli tinihimatoko abe ngini ai gogilaongika. De gea ai himatoko de ai demo mata-mata kanganoino tinihimatokoka ho naa nihiorikoka ma titi hokokia abe ko itedekanokaua de kiani idadioka.” Hokogea ma malaekata ai demo ngohino.

O Yohanese wohibobaha ai buku naa

⁷ De ahao nanga Baluhu idodutu o Yesusu wotemo wato, “Abeika nitotoihene! Ngohi naa ko itedekanokaua de toboa! Ho onagona dika abe yangaku naa ma bukuino ma demo de yatobaniiki o hingahu ma demoino naa abe to Una ai hiningaka de auku iboa, ona gea duru de manga utumoka!” Hokogea to nanga Baluhu ai demo.

⁸ De ngohi naa o Yohanese, de mata-mata gea abe toihenoka de abe tamakeoka de ahi lako, gea ngohi ma hirete abe toihene de tamake. Ho gea toihene de tamake ipahaino de gea ngohi tomamotumuku o malaekata ai himangoka abe ma himatoko gea una wohihimatoko, angamoi ngohi tato tomahuba ma malaekatika gea.

⁹ Masara gea ma malaekata wohitaere ngohino wato, “Ufa hokogea nodiai! Angamoi ngohi naa ka to Una ai gilaongo abe imaketero hoka ngonali de hoka nanga gogianongoru utuoli ai uru ma dodofanga. De ngaro ona mata-mata abe ahao yatobaniiki ma demo abe naa ma bukuoka, ma onangoo gea iwileleani Unangika. Ho ngone mata-mata homaketero dika abe hileleani Unangika, ho ufa ngona nohihigiriiri ngohino! Ho kiani Ma Jouika dika ngona nomahuba!”

¹⁰ De ahao una wohitemoli ngohino wato, “O hingahu ma demo-demo abe ma bukuoka naa, gea to Una ai hiningaka de auku iboa, ho ufa ma hingahu naa nagogono o nyawaino, ma kiani o nyawa ihioriki. Angamoi ma oraha itigioka abe o kia dika wohingahuoka, gea idadioka.

¹¹ De onagona dika abe manga hiningaka yomaputuhu ato manga wowango ma dodorou de ma pese-peseke ka yaniiki, ona gea ka idadi yogila-gila dika yaniiki abe hokogea manga hiningaka. Masara onagona dika abe yomaputuhu ato o wowango ma totiai de ma debi-debini yaniiki, ona gea kiani ka ihikaika yatobaniiki o totiai de o debi-debini manga wowango ma goronaka. Ho naa ngohi tonganono abe ngini duru niafikirohi ma demo-demo abe naga ma buku naa ma dolaka la ka idadi nihidodiai nimaputuhu.” Hokogea ma malaekata ai demo ngohino.

¹² De ahao nanga Baluhu idodutu wotemoli wato, “Abeika nitotoihene! Ngohi naa ko itedekanokaua de toboa! De gea ma oraha toboa de ahao Ngohioka naga o nyawa mata-mataika manga kokiwowango ma datoro ma hibalaha, la gea de ahao tahikokodoku o nyawa homoi-homoiika manga hibalaha abe hokokia imaniiki de manga boriwowango ma datoro.

¹³ De Ngohi naa abe ihihiromanga ma Lifunu de ma Baha, angamoi ko kia-kiauahi idadi de Ngohi nagau, de Ngohi duru ko iwa ahi bobaha. De ngaro mata-mataika ma gea Ngohi abe tohidadi, de ngaro o kia dika naga ma bobaha, ma genangoo Ngohi naa tohibobaha.”

¹⁴ “De onagona dika abe manga howo-howono akokiofioka ho hiadono ona yotebi-tebinoka, ona gea yomaketero abe hoka o baju yafokaka ho duru iarehoka o baju gea. De ona gea duru de manga utumoka, angamoi ona yahigunoa la yowohama ma kota ma goronaika abe ma dadaduhu ma ngoranino yowohama, de gea yahigunoa la o wowango ma gota ma hofoko ka idadi yaolomo.

¹⁵ Masara nako ona utu abe yotobadiai itorou, ona gea ahao ko yowohamua ma kota ma goronaika. Abe ona gea ka ihikaika yaniiki manga dodiai, eko ngaro ona abe yomakitigi ko itiaiua, eko ngaro ona yatomaka o nyawa, eko ngaro ona abe yomahuba-huba o popangaoika, eko ngaro ona abe manga hiningaka duru yosanangi la o ngelu-ngeluku yaniiki, ma ona mata-mata gea duru ko idadiua Ma Jou ai kotaika yowohamika masara to ona manga ngi, gea hatoli imakitingakika.”

¹⁶ “De Ngohi naa o Yesusu, de ahi malaekata tihidingoto nginika la una o hingahu ma demo naa mata-mata winihingahu abe ngini o gogarejaika la gea nihioriki de niangaku. De Ngohi naa o Dautu ai totoforauku, abe una gea ma dodihiraino o Yahudi ma nyawa manga koano. De nagali ihihiromanga Ngohino ato Ngohi naa o Koruku ma Beka abe ma murumu gea itigi-tigi itebini de duru itararono ma dihangoka.” Hokogea nanga Baluhu idodutu ai higaro ma demo.

¹⁷ De naa Ma Jou o Womaha de onangoo abe yodadioka o Domba ma Ngofaka ai darunu, ona mata-mata yakokiahoko o nyawaika ato, “Abeika niainohi!” Ho onagona dika abe yototoihene ma demoino naa kiani onangoli yahoko o nyawa utuika ato, “Abeika niainohi Unangino la niwiniiki!” De gea onagona dika abe manga ngomaha yodudungu de yoigo o wowango ma akere yaokere, ona gea ka idadi yoboa dika de o wowango ma akere gea ngaro ufa de yofangu ma ka idadi yomale dika de yaokere la ona gea yowango.

¹⁸ De naa ngohi o Yohanese tinihitiari ngini mata-mataika abe niihene o buku naa ma demo, angamoi ngohi ma hirete tamakeoka de toihenoka naa ma buku ma dola mata-mata, ho tinihingahu abe ma buku ma demo gea Ma Jou ai hiningaka de aino wonahimatoko. De hokonaa tinihitiari tato, o nyawa onagona dika abe o demo utu ihidogo o buku naa ma demoika, onangika gea ahao Ma Jou wohidogo ma kokangela abe ihitulihuku o buku naa ma goronaka la gea wahipoha onanguku.

¹⁹ De hokogenangoo nako o nyawa onagona dika de yakuranga eko yatumungu o demo utu abe o buku naa ma goronaka, ona gea ahao ko yamakeua o hidoku o Wowango ma gotaino eko o kota ma debi-debinino abe gea ena naga ihitulihuku o buku naa ma dolauku. Angamoi ona gea Ma Jou ko wahigunoaua la o Wowango ma gota ma hofoko yaolomo. De ngaro manga ngi abe o kota ma debi-debini ma goronaka, ma duru ko iwa, angamoi Una ko wahigunoaua la ona yowohama ma kota ma goronaika.

²⁰ De nanga Baluhu idodutu o Yesusu Una gea ma hirete abe wamake de ahao wohidofangoli ngohino ma titi naa ena mata-mata ihitulihukuoka. De Una gea womahingahu wato, “Ngohi naa tagou-goungu tato ko itedekanokaua de toboa.” Hokogea Una womahingahu. De ngohi topaluhu tato, “Amin! Duru toigo la Ngona noboainoli, abe Ngona ahi Baluhu idodutu o Yesusu.” Hokogea ngohi topaluhu.

²¹ De naa tinigahoko ngini mata-mataika la nanga Baluhu idodutu o Yesusu ai owa winihikodoku nginika.