Himatoko 13 - Ma Jou ai Demo-demo o Totobelohoka

¹ De ahao ngohi tamake o gahioka de aiye ihupu o aewani abe duru o fara moi ma rupa. De naga to ena ma pea tumidi de ma tataduku naga ngimoi, de gea ma tataduku amomoiika naga o koano ma sapeo imahisapeouku. De naga ma pea amomoiika gea de ma roma-romangoka ihitulihika, de ma romanga gea mata-mata o romanga abe iwingelo Ma Jouika.

² De ma aewani gea ma rupa hoka o fuhuku ma boki ma ago-agomo, masara to ena ma lou duru ilago-agomo abe hoka o beruanga ma aewani ma lou ma rupa, de to ena ma uru duru ilago-agomo abe hoka o singa ma uru ma rupa. De abe ma naga ena gea yahidoaka naa ma aewanino to ena ma buturungu de ma kuaha kohaamoko la ka idadi ma aewani naa ena yahikoano o duniaka.

³ De naa ena ma aewani ma pea moioka naga o nabo ma bokeke tamake hoka ma pea naa atomaka, masara o honenge ma nabo gea iaikoka ho ka iwangohi! Ho gea o dunia ma nyawa mata-mataika duru yoheranga ma titi o aewani naa ena de duru yokokiigo hiadono ka ihikaika yanii-niiki enangika.

⁴ De ona mata-mata yomahuba ma nagaika angamoi ena yahidoakoka to ena ma kuaha abe naa o aewani moiinoli. De ona gea yomahuba naa ma aewani moiinoli ato, “Ka onagona yomatoteroino de ma aewani naa? De ka onagona yakunu yaparangi de yahikala enangika? Ko moiua!” Hokogea o nyawa manga higiriiri ma demo abe yomahijou ma aewanika gea.

⁵ De gea ma aewani ihigunoa la duru imahigiriiri de duru iwingelo Ma Jouika ma titi to ena ma demoino. De gea ihigunoaoo la ena yahipareta o duniaka abe o mede moruata de hinootoino ma dekana, abe gea o taongo hange de ma honongaino ma dekana.

⁶ Ho ena gea duru iwingelo-ngelo Ma Jouika, abe ngaro Ma Jou ai romangika eko ngaro onangika mata-mata abe yomanoa to Una ai ngioka o Horogaka, masara gea mata-mata ka ihikaika iwingelo de iwidoana Unangika.

⁷ De ena gea ihigunoa la ka idadi yaparangi de yahikala Ma Jou ai nyawaika abe o duniakahi, de ihigunoaoo la yahipareta o nyawa mata-mataika, abe ngaro o dutu amomoiika de ngaro ona manga doomu amomoiika abe yomahibetongo moi, de ngaro o pareta ma kokawaaha amomoiika, ma ona mata-mataika ka idadi ma aewanioli yahipareta onangika.

⁸ De gea o dunia ma nyawa mata-mata ahao yomahuba enangika, masara nako ona abe manga roma-romanga naga ihitulihukuokau o Wowango ma Bukuoka, ona gea ko ihigiriiriua enangika. Abe ma buku gea to o Domba ma Ngofaka ai Buku, abe ma dihiraino de yahohonenge ma Dombaika gea. De ona gea abe manga romanga nagau atulihuku ma bukuoka, gea manga romanga tanu duru ma dodihirakahi abe o dunia naa ko wotulaadauahi de ihitulihukuokau manga roma-romanga gea. Masara nako o nyawa utu mata-mata, ona ihigiriiri o aewanika gea abe o gahioka de aiye ihupu.

⁹ De onagona dika de manga ngaukoka kiani ihigihene naa ma demoino.

¹⁰ Ma dihiraino de Ma Jou wohiaturoka la to Una ai nyawa utu yataokino de yatoma. Ho onagona dika nginioka abe Una wato ahao ngini initaokino, ngini gea kiani initaoko de inibuika. De onagona dika abe Una wato ahao o nyawa initoma, ngini gea ahao kiani nihonenge ma titi o nyawa manga giamoka. De ngaro ahao kiani idadi hokogea nginioka, masara ma oraha gea ngini Ma Jou ai nyawa kiani nimatongohono de ufa nimahipipidili nia ngongakuino.

O Aewani moioli dau o tonakiye ihupu

¹¹ De ipaha de ahao ngohi tamake o aewani moioli, masara naa ena ma aewani dau o tonakiye ihupu. De to ena ma tataduku hinooto gea hoka o domba ma ngofaka ma tataduku ma rupa, de to ena ma demo ma ilingi gea hoka o nagali ma ilingi.

¹² De naa ena ma aewani ma kuaha o duniaika gea duru imaketero de hoka o aewani ihira-hira gea ma kuaha abe dau o gahioka de aiye ihupuiye. De o aewani ihira-hira ma himangoka de naa o aewani itoturuino abe o tonakiye ihupuiye yoduhunu abe gea yahipareta de yaribuutu o dunia ma nyawa mata-mataika la ona yomahuba o aewani ihira-hiraika, abe to ena gea ma honenge ma nabo iaikoka de ka iwangohi ma aewani gea.

¹³ De ma aewani itoturuino gea o heheranga ma dodunguu ma ngoe itobadiai de genangino duru yahiheranga o nyawaika, abe hoka moi o uku ihiguti daku ma hoanoka de auku dau o duniauku, de gea ma heheranga idiai o nyawa manga ngoe manga himangoka.

¹⁴ De mangale ma titi ma heherangino gea itobadiai o aewani ihira-hira ma himangoka ho hiadono duru yabudi o dunia ma nyawaika. De gea yabudioka de ahao yahuloko onangika la o pangao moi yodiai ma rupa hoka o aewani ihira-hira ma rupa, abe ena gea naga ma bokeke abe ihihohonengoka de o humaranga o dopo-dopoino masara naa ka imomikokali ma honengino ma aewani ihira-hira gea.

¹⁵ De ihigunoa o aewani itoturuika la ihidoaka o womaha abe ma pangaoika la hiadono ena gea ka idadi itemo-temo. De gea ma pangao yahuloko o nyawaika ato, “Ngini onagona dika abe ko nimahubaua ngohino, ngini gea ahao kiani initoma.” Hokogea ma pangao itemo onangika.

¹⁶ De ma aewani itoturuino gea yaribuutu o dunia ma nyawa mata-mataika la yahitunguuoka de o dodunguu moi abe manga giama ma nirakoka eko manga pea ma nyore-nyoreoko. Ho ona mata-mata, ngaro o nyawa abe manga gogere ikurutiye eko ngaro ko kia-kiaua manga gogere, de ngaro ona de manga tiwioka eko ona yohu-huha, de ngaro ona abe yodadioka o nyawa manga gilaongo eko ngaro ko o gilaongua ma nyawa, masara ona mata-mataika kiani yahitunguuoka de ma dodunguu gea.

¹⁷ De onagona dika abe ko iwa manga dodunguu, ona gea ahao ko idadiokaua o kiahonanga yomaijaino eko yofukunu. De gea ma dodunguuoka naga o aewani ihira-hiraika ma romanga eko to ena ma romanga ma nomoro.

¹⁸ De ma titi naa ena ngone ka idadi hataoko itiai iti abe naga de nanga sosawaroka. Abe onagona dika de manga tobahiorikoka ka idadi yamake ma aewani ihira-hiraika ma nomoro ma titi, de gea o nyawa womatengo ai nomoro, abe gea ai nomoro o ratuhu butaanga de moributaanga de butaanga.